05 ޖުލައި 2016 - 11:49
ލަންޑަން (ޖުލައި 5) - މެންޗެސްޓާ ޔުނައިޓެޑްގެ ކުރީގެ ކުޅުންތެރިއާ ރަޔާން ގިގްސް އަށް ކާމިޔާބު ކޯޗަކަށް ވެވޭނެ ކަމަށް އެ ޓީމުގެ ކުރީގެ ކޯޗު އެލެކްސް ފާގަސަން ބުނެފި އެވެ.
ގިގްސް ވަނީ ފާގަސަންގެ ކޯޗުކަމުގެ ދަށުން ޔުނައިޓެޑަށް ކުޅުމަށް ފަހު އެ ޓީމުގެ އެސިސްޓަންޓް ކޯޗެއްގެ ގޮތުގައި ފާއިތުވި ތިން އަހަރު މަސައްކަތް ކޮށްފަ އެވެ. ޔުނައިޓެޑްގެ ކޯޗުކަމާ ހޯސޭ މޮރީނިއޯ ހަވާލުވުމަށް ފަހު އެސިސްޓަންޓް ކޯޗަކަށް ގެނައީ އޭނާއާ އެކު އަބަދުވެސް މަސައްކަތް ކުރަމުން އަންނަ ރުއީ ފަރިއާ އެވެ. އެއާ އެކު ގިގްސް ވަނީ 29 އަހަރަށް ފަހު ޔުނައިޓެޑް ދޫކޮށްލަން ނިންމައިފަ އެވެ.
ފާގަސަން ބުނީ ގިގްސްގެ ނިންމުމަށް އިހުތިރާމް ކުރަން ޖެހޭ ކަމަށެވެ.
"މޮރީނިއޯގެ ނިންމުން ރަނގަޅު. އެއީ އިތުބާރުކުރެވޭ އަދި އެކުގައި ގިނަ ދުވަސް ވަންދެން މަސައްކަތް ކޮށްފަ ހުރި އެސިސްޓަންޓް ކޯޗެއް ނެގުމަކީ ރަނގަޅު ނިންމުމެއް. ގިގްސްގެ ނިންމުން ވެސް ރަނގަޅު. ކާމިޔާބު ކޯޗަކަށް ވުމުގެ ފެންވަރު ގިގްސްގެ އެބަހުރި. މިއީ އަމިއްލަ ފައި މައްޗަށް ތެދުވަންވީ ވަގުތު،" ފާގަސަން ބުންޏެވެ.
ޔުނައިޓެޑްގެ ކޯޗުކަމުން ފާގަސަން ވަކިވީ 2013 ވަނަ އަހަރު އެވެ. އެ އަށް ފަހު ޖެހިގެން އައި ސީޒަނުގައި ޔުނައިޓެޑުން އެ ޓީމު ހަވާލުކުރީ އެވަޓަންގެ ކުރީގެ ކޯޗު ޑޭވިޑް މޮއިސްއާ އެވެ. މޮއިސްގެ އެސިސްޓެންޓެއްގެ ގޮތުގައި ގިގްސް ވަނީ މަސައްކަތްކޮށްފަ އެވެ. ސީޒަން މެދުތެރެއިން މޮއިސް މަގާމު ވަކިކުރުމުން ސީޒަނުގެ ބާކީ މެޗުތަކުގައި ޓީމަށް އިރުޝާދު ދިނީ ގިގްސް އެވެ. ދެން އެއަށް ފަހު މިދިޔަ ދެ އަހަރު ގިގްސް ހުރީ ލުއީ ވެން ހާލްގެ އެސިސްޓަންޓް އަކަށެވެ.
ފާގަސަން ބުނީ ޕެޕް ގާޑިއޯލާ އާއި އެންޓޯނިއޯ ކޮންޓޭ އަދި ޑިއޭގޯ ސިމިއޯނީ ފަދަ ކާމިޔާބު ކޯޗަކަށް ވުމުގެ ފެންވަރު ގިގްސްގެ އެބަހުރި ކަމަށެވެ.