05 ނޮވެމްބަރ 2017 - 08:13
ރިޔާޒް (ނޮވެމްބަރު 5) - ސައުދީ ޝާހީ އާއިލާގެ އެންމެ މުއްސަނދި އެއް ބޭފުޅާ ކަމަށްވާ ޕްރިންސް ވަލީދު ބިން ތަލާލާ އެކު ހަތަރު ވަޒީރަކު ކޮރަޕްޝަނުގެ ތުހުމަތުގައި ހައްޔަރުކޮށްފި ކަމަށް ބައެއް ނިއުސް އެޖެންސީތަކުން ބުނެފި އެވެ.
ކޮރަޕްޝަން ހުއްޓުވުމަށް ސައުދީގައި އިއްޔެ އުފެއްދި ކޮމިޝަނުގެ އަމުރަށް ވަނީ 11 ޕްރިންސަކު ހައްޔަރުކޮށްފަ އެވެ. މި ކޮމިޝަނުގެ ވެރިއަކީ ވަލީ އަހުދު މުހައްމަދު ބިން ސަލްމާނެވެ. ކޮރަޕްޝަނާ ދެކޮޅަށް ހިންގާ ހަރަކާތެއް ކަމަށް ބުނެ ސައުދީ ރަސްގެފާން ސަލްމާން ވަނީ ބައެއް ވަޒީރުން އިއްޔެ މަގާމުން ދުރުކޮށްފަ އެވެ. ހައްޔަރު ކުރި ހަތަރު ވަޒީރުންގެ އިތުރުން ދެން ހައްޔަރުކުރި 11 ޕްރިންސްގެ ތެރޭގައި ވަލީދު ހިމެނޭ ކަމަށް ސައުދީ އަރަބިއާގެ އަލް އަރަބިއްޔާ އާއި ވޯލް ސްޓްރީޓް ޖާނަލް އިން ބުނެފައިވެ އެވެ.
ޕްރިންސް ވަލީދު ހައްޔަރުކޮށްފި ނަމަ އެއީ 2015 ވަނަ އަހަރު ޑިފެންސް މިނިސްޓަރުގެ މަގާމަށް ވަޑައިގެންނެވި ވަލީ އަހުދު މުހައްމަދު ޝާހީ ވެރިކަމުގައި އިތުރަށް ބާރުގަދަ ކުރަން އަޅާ ފިޔަވަޅެއް ކަމަށް ތަޖްރިބާކާރުން ބުނެ އެވެ. ޕްރިންސް ވަލީދަކީ ސައުދީގެ އިތުރުން ދުނިޔޭގައި ވެސް ނުފޫޒުގަދަ ބިލިއަނަރަކަށްވުމުން ޝާހީވެރިކަމަށް އޭނާގެ އެއްވެސް ނުފޫޒެއް ނުފޯރުވޭނެ ގޮތް ހެދީ ކަމަށް ވެސް ބުނެފައިވެ އެވެ.
އެމެރިކާ އިން ތައުލީމް ހާސިލްކުރައްވާފައިވާ ވަލީދު ވަނީ ސިޓިގްރޫޕް، އެޕަލް، ޓްވެންޓީ ފަސްޓް ސެންޗަރީ ފޮކްސް އަދި ފޯ ސީޒަންސް ފަދަ ބޮޑެތި ކުންފުނިތަކަށް އިންވެސްޓް ކުރައްވައިފަ އެވެ. ޕްރިންސް ވަލީދު 2015 ވަނަ އަހަރު ވަނީ އޭނާގެ މުޅި މިލްކިއްޔާތު ޗެރިޓީ އަށް ހަދިޔާ ކުރަން ނިންމަވާފައިވާކަން އިއުލާން ކުރައްވައިފަ އެވެ.
ޝާހީ ގަރާރަކަށް އުފެއްދި އެންޓި-ކޮރަޕްޝަން ކޮމިޝަނަށް ލިބިދީފައިވާ ބާރުތަކުގެ ތެރޭގައި ތުހުމަތު ކުރެވޭ މީހުން ހައްޔަރު ކުރުމާއި ދަތުރުކުރުން މަނާކުރުމާއި މުދާ ހިފެހެއްޓުން ހިމެނެ އެވެ.
މީޑިއާ ރިޕޯޓްތައް ބުނާ ގޮތުގައި ހައްޔަރުކުރި މީހުންގެ ތެރޭގައި މިހާރުގެ ހަތަރު ވަޒީރެއްގެ އިތުރުން ކުރީގެ ވަޒީރުން ވެސް ހިމެނެ އެވެ.