01 ނޮވެމްބަރ 2017 - 14:18
މުޒައްފަރުގާރު (ނޮވެމްބަރު 1) - ފިރިމީހާ އާއި ފިރިމީހާގެ އާއިލާގެ 14 މީހަކަށް ޒަހަރު އަޅާފައި ހުރި ކިރެއް ބޯންދީގެން އެ މީހުން މަރާލިކަމުގެ ތުހުމަތުގައި އަނބިމީހާ ހައްޔަރުކޮށްފި އެވެ.
ޕާކިސްތާން ފުލުހުން ބުނީ ދާދި ފަހުން ކައިވެނިކުރި އާސިޔާ ބީބީ ފުރަތަމަ އުޅުނީ ޒަހަރު އަޅާފައި ހުރި ކިރު ފިރިމީހާ އަށް ބޯންދޭށެވެ. އެކަމަކު އޭނާ އެ ބޯން ދެކޮޅު ހެދުމުން އެ ކިރަށް ޔޯގަޓް އެޅުމަށް ފަހު ވަނީ ފިރިމީހާގެ އާއިލާގެ އެހެން މީހުންނަށް ބޯންދީފަ އެވެ.
ފުލުހުން ބުނީ އާސިޔާ ބީބީ ސެޕްޓެމްބަރު ކައިވެނި ކުރީ މަޖްބޫރުން ކަމަށެވެ. މުޒައްފަރުގާރު ސަރަހައްދުގައި ގަދަކަމުން މި ކައިވެނި ކުރުވުމުން އާސިޔާ ވަނީ ފިރިމީހާގެ ގެއިން ފިލައިގެން ގޮސް އޭނާގެ އާއިލާ ގާތަށް ދާން މަސައްކަތް ކޮށްފަ އެވެ.
ފިރިމީހާ އާއި އިތުރު 14 މީހެއްގެ މަރުގެ ތުހުމަތުގައި އާސިޔާ މިހާރު ވަނީ ހައްޔަރުކޮށްފަ އެވެ. އަދި އެކަމުގައި ބައިވެރިވި ކަމުގެ ތުހުމަތުގައި އާސިޔާގެ ލޯބިވެރިޔާ އާއި އޭނާގެ ބޮޑު ދައިތަ ވަނީ ހައްޔަރުކޮށްފަ އެވެ.
މުޒައްފަރްގާރު ޑިސްޓްރިކްޓް ފުލުސް އޮފިސަރު އަވައިސް އަހުމަދު މާލިކް ވިދާޅުވީ ކިރަށް އަޅާފައި ވަނީ ކޮން ބާވަތެއްގެ ވިހައެއްކަން އެނގޭނީ ޓެސްޓްތަކަށް ފަހު ކަމަށެވެ.