01 ނޮވެމްބަރ 2017 - 00:02
ދިރާގު ޕޯސްޓްޕެއިޑް ޕެކޭޖުތަކަށް ބޮޑު ބަދަލެއް ގެނެސް، އާންމުކޮށް ބޭނުންކުރާ ގިނަ އެޕްލިކޭޝަންތައް ހިލޭ ބޭނުން ކުރެވޭ ގޮތަށް ހަދައިފި އެވެ.
އާޓް ގެލަރީގައި މިރޭ ލައިވް މިއުޒިކާއި އެކު ބޭއްވި ފޯރިގަދަ ރަސްމިއްޔާތެއްގައި އާންމުކުރި ބަދަލާއި އެކު، ވަޓްސްއެޕް، ވައިބާ، އިންސްޓަގްރާމްގެ އިތުރުން ފޭސްބުކް އަދި ސްނެޕްޗެޓް ހިލޭ ބޭނުން ކުރެވޭނެ އެވެ. ނަމަވެސް، އެ އެޕްތައް ހިލޭ ބޭނުން ކުރެވޭނީ ތިން ޖީބީއާ ހަމައަށެވެ.
ސޯޝަލް މީޑިއާ އެޕްތަކުގެ އިތުރުން ލޯކަލް އެޕްތަކުގެ ތެރެއިން، ދިރާގު އެޕް، ދިރާގު ޕޭ އަދި ބީއެމްއެލް، މޯލްޑިވްސް ފްލައިޓް ޝެޑިއުލް، ސަލާތް އެމްވީގެ އިތުރުން ކިއު ބީ އެޕް ހިލޭ ބޭނުން ކުރެވޭނެ އެވެ.
އޭގެ އިތުރުން ޕޯސްޓްޕެއިޑް ކޮންމެ ޕެކޭޖެއް ގެންގުޅޭ ފަރާތްތަކަށް ލޯކަލް ނެޓްވޯކްތަކަށް އަންލިމިޓެޑް ކޯލްސް ކުރެވޭނެ އެވެ. އަދި އެންމެ ބޭނުން ތިން ގައުމަކަށް، އިންޓަނޭޝަނަލް ކޯލްސް އިން 50 ޕަސެންޓް ޑިސްކައުންޓް ލިބޭނެ އެވެ.
ދިރާގުން މިރޭ އާންމުކުރި ހަތަރު ޕެކޭޖް:
ޕޯސްޓްޕެއިޑް 350: 2 ޖީބީ ޑޭޓާ
ޕޯސްޓްޕެއިޑް 550: 5 ޖީބީ ޑޭޓާ
ޕޯސްޓްޕެއިޑް 750: 10 ޖީބީ ޑޭޓާ
ޕޯސްޓްޕެއިޑް 1،000: 20 ޖީބީ ޑޭޓާ
"އަޅުގަނޑުމެން އަބަދުވެސް ބަލަނީ ކަސްޓަމަރުންގެ ދިރިއުޅުން ފަސޭހަ ކޮށްދޭން، ދިރާގަށް ކުރެވޭނީ ކޮން ކަންތައްތަކެއްތޯ. އެގޮތުން މިރޭ މި ތައާރަފް ކުރާ ޕްރޮޑަކްޓާއި އެކު އަޅުގަނޑުމެން ކަސްޓަމަރުންގެ އަތަށް ހުރިހާ ބާރެއް މި ދޫކޮށްލަނީ،" ޕޯސްޓްޕެއިޑް ޕެކޭޖްތަކަށް ގެނައި ބަދަލު އިއުލާނު ކުރުމުގެ ކުރިން، އެ ކުންފުނީގެ ސީއީއޯ އިސްމާއިލް ރަޝީދު ވިދާޅުވި އެވެ.
ދިރާގުގެ ޗީފް މާކެޓިން އޮފިސާ އިޒަބެލް ހަޖްރީ ވިދާޅުވީ ދިރާގުން އެންމެ ފަހުގެ ޓެކްނޮލޮޖީ އާއި ހިދުމަތްތައް އަބަދުވެސް ދިވެހިންނަށް ފޯރުކޮށްދޭނެ ކަމަށެވެ. އަދި އަލަށް ޕޯސްޓްޕެއިޑަށް ގެނައި ބަދަލާ އެކު "ޑޭޓާ ސެޓް ކޮށްލުމުން ބާކީ ހުރިހާ ކަމެއް ދިރާގުން" ކޮށްދޭނެ ކަމަށެވެ.
"ކޮންމެ ކަސްޓަމަރަކު ވެސް ބޭނުންވާ ވަރަކަށް ޑޭޓާ ސެޓް ކޮށްފައި ޕެކޭޖް ސެލެކްޓް ކޮށްލީމަ ބާކީ ހުރިހާ ކަމެއް އަޅުގަނޑުމެން ކޮށްދޭނަން. ސޯޝަލް އެޕްތައް ވެސް ހިލޭ، ލޯކަލް މުހިންމު އެޕްތަ ވެސް ހިލޭ ދޭނަން. ލޯކަލް ނަންބަަރުތަކަށް ގުޅުން ވެސް އަންލިމިޓެޑް،" އިޒަބެލް ވިދާޅުވި އެވެ.
ދިރާގުން ބުނީ ޕޯސްޓްޕެއިޑްގައިވާ އަގުތަކަކީ މިހާތަނަށް ރާއްޖޭގައި ޕޯސްޓްޕެއިޑް ހިދުމަތަށް ފޯރުކޮށްދޭ އެންމެ ހެޔޮއަގުތައް ކަމަށެވެ. ދިރާގުގެ އާ ޕޯސްޓްޕެއިޑްގައި ފަސޭހައިން ފައިސާ ދެއްކޭ ގޮތްތަކެއްވެ އެވެ. މިގޮތުން ޕޯސްޓްޕެއިޑް އުސޫލުން މަސް ނިމުމުން ފައިސާ ދެއްކުމުގެ އިތުރުން ޕޯސްޓްޕެއިޑް އަދި ޕްރީޕެއިޑްގެ ސިފަތައް އެއްކޮށްފައިވާ ހައިބްރިޑް ޕޭ ސިސްޓަމެއް ވެސް ތައާރަފްކޮށްފައިވެ އެވެ. ހައިބްރިޑް ސިސްޓަމްގައި މަހު ފީ އަދި އާންމުކޮށް ބޭނުންކުރާ ހިދުމަތްތަކަށް ދައްކަންޖެހޭ އަދަދުގެ އިތުރުން ޑޭޓާ ބޫސްޓެއް ނަގައިފިނަމަ އެ ބޫސްޓަކަށް ޕްރިޕެއިޑް އުސޫލުން ފަސޭހައިން ދައްކާލެވެ އެވެ.
މިރޭ ވަނީ ދެ ޑޭޓާ އެޑޯން ވެސް ތައާރަފްކޮށްފަ އެވެ. އެގޮތުން 85ރ. އަށް އެއް ޖީބީ ޑޭޓާ ލިބޭއިރު، 350ރ. އަށް 5 ޖީބީ ޑޭޓާ ލިބޭނެ އެވެ.
ދިރާގުން މިރޭ ބޭއްވި ރަސްމިއްޔާތަށް ދިޔަ ފަރާތްތަކަށް ވަނީ އަގުބޮޑު ހަދިޔާތައް ވެސް ދީފަ އެވެ. އެގޮތުން ގުރުއަތުން ހޮވުނު ފަރާތަކަށް އައިފޯން 8 ޕްލަސްއެއް އަދި އިތުރު ދެ ފަރާތަށް ދެ އައިފޯން 8 ވަނީ ދީފަ އެވެ. އައިފޯނުގެ އިތުރުން، ގުރުއަތުން ހޮވުނު ދެ ފަރާތަކަށް ސެމްސަަންގް އެސް 8 ދެ ފޯން ވެސް ދިނެވެ.