28 އޮކްޓޯބަރ 2017 - 13:13
ނިއު ދިއްލީ (އޮކްޓޯބަރު 28) - ބޮލުން ގުޅިފައިވާ ދެ ކުދިން ވަކިކުރުމުގެ އުނދަގޫ އޮޕަރޭޝަން އިންޑިއާގެ ވެރިރަށް ނިއު ދިއްލީގައި އެ ގައުމުގެ ޑޮކްޓަރުންތަކެއް ކޮށްފި އެވެ.
އުމުރުން ދެ އަހަރުގެ ޖަގާ އާއި ކާލިއާގެ ބޯ ވަކިކުރަން ކުރި އޮޕަރޭޝަނަށް 16 ގަޑިއިރު ހޭދަވި އެވެ. ދެ ކުދިން ވެސް މިހާރު ތިބީ އައިސީޔޫގަ އެވެ. އޮޕަރޭޝަން ކުރުމުގައި 30 ޑޮކްޓަރުން ބައިވެރިވި އެވެ. މިއީ އިންޑިއާގެ ތާރީޚުގައި ވެސް ސަރުކާރުގެ ހޮސްޕިޓަލެއްގައި ކުރި މި ބާވަތުގެ ފުރަތަމަ އޮޕަރޭޝަނެވެ.
އިންޑިއާގެ ދެ ކުދިން ވިހޭ އިރު ވަނީ ބޮލުގެ ލޭ ހޮޅިތަކާއި ސިކުނޑީގެ ޓިޝޫތައް ގުޅިފަ އެވެ. މިއީ އުފަންވާ ތިން މިލިއަން ކުދިންގެ ތެރޭން އެއް ކުއްޖަކަށް ދިމާވާ މައްސަލައެކެވެ. ބޮލުން ގުޅިފައި ތިބޭ ކުދިންނަށް ސިއްހީ ގޮތުން ބޭނުން ކުރާ ޓާމަކީ "ކްރެނިއޯޕޭގަސް" އެވެ. ޑޮކްޓަރުން ބުނާ ގޮތުގައި މި ގޮތަށް ބޯ ވަކިކުރާ ކުދިންގެ ތެރޭން 50 ޕަސެންޓް ކުދިން 24 ގަޑިއިރު ތެރޭ މަރުވެ އެވެ.
ދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައެންސްގެ ޑިކެޓަރު ރަންދީޕް ގުލެރިއާ ވިދާޅުވީ އޮޕަރޭޝަނުގެ ކާމިޔާބުކަން ބެލުމަށް ކުރިއަށް އޮތް 18 ދުވަސް ވަރަށް މުހިންމު ކަމަށެވެ.
"ދެ ކުދިންގެ ވެސް އެހެން ސިއްހީ މައްސަލަތައް އެބަހުރި. ޖަގާ އަށް ހިތުގެ މައްސަލަ ދިމާވެފައިވާ އިރު ކާލިއާގެ ކިޑްނީ މައްސަލަ އެބަހުރި،" ނާރުގެ އޮޕަރޭޝަނާ ބެހޭ ޚާއްސަ ޑޮކްޓަރު އޭކޭ މަހަޕަތުރާ ވިދާޅުވި އެވެ.
ޑޮކްޓަރުން ބުނީ އޮޕަރޭޝަނަށް ފަހު އެންމެ ބޮޑު ގޮންޖެހުމަކީ ދެ ކުދިންގެ ސިކުނޑީގެ ދެ ފަރާތަށް ހަން އެރުވުން ކަމަށެވެ. އޮޕަރޭޝަނުގެ ތެރޭގައި ދެ ކުދިންގެ ބޮލުން ވެސް ވަނީ ބޮޑު ޖާގައެއް ހެދިފަ އެވެ. ބޮލަށް ހަން އެރުވުމަށް ފަހު ދެން އޮންނާނީ ބޮލުގެ ނާށިގަނޑު ހެދުން ކަމަށް ޕްލާސްޓިކް ސާޖަން މަނީޝް ސިންގާލް ވިދާޅުވި އެވެ.
ދެ ކުދިންގެ ފުރަތަމަ އޮޕަރޭޝަން ކުރީ އޮގަސްޓް 28 ވަނަ ދުވަހު އެވެ. އެ ފަހަރު ޑޮކްޓަރުން ވަނީ ދެ ކުދިންގެ ހިތުން ސިކުނޑި އަށް ގުޅިފައިވާ ނާރުތައް ވަކިިކުރަން ބައިޕާސް އޮޕަރޭޝަނެއް ކޮށްފަ އެވެ.