19 އޮކްޓޯބަރ 2017 - 06:18
ޕްރިޔަންކާ ޗޯޕްރާ އަކީ މިހާރު ހަމައެކަނި ބޮލީވުޑް އެކްޓަރެއް ނޫނެވެ. ހޮލީވުޑްގައި ވެސް މިހާރު އޭނާ ނުދަންނަ މީހަކު ނެތެވެ. އެމެރިކާގެ މަޝްހޫރު ސިލްސިލާ "ކުއަންޓިކޯ"ގައި އެލެކްސް ޕެރިޝްގެ ރޯލު އަދާކުރަން ފެށިފަހުން ޕްރިޔަންކާ އަކީ ގްލޯބަލް އައިކަން އަކަށް ވަނީ ވެފަ އެވެ.
ދާދިފަހުން ޕްރިޔަންކާ، 35، އަށް ވަނީ "ވެރައިޓީޒް ޕަވާ އޮފް ވިމެން" ގެ ޝަރަފު ދީފަ އެވެ. އަދި މި ނޫނަސް ބައިނަލްއަގުވާމީ އެކި އެވޯޑުތަކަކާއި ޝަރަފުތަައް ޕްރިޔަންކާއަށް އަންނަނީ ލިބެމުންނެވެ.
ޕްރިޔަންކާއަށް އެވޯޑެއް ދިނުމަށް ބޭއްވި އިވެންޓެއްގައި އޭނާ ބުނީ މަސައްކަތުގައި ފެއިލް ވެދާނެތީ އޭނާ އަބަދުވެސް ވަރަށް ބިރު ގަންނަ ކަމަށާއި އޭނާ ނިދިން މަހްރޫމްވާ އެއް ސަބަބަކީ އެއީ ކަމަށެވެ.
ހޮލީވުޑް މަޖައްލާއަކަށް ދީފައިވާ އިންޓަވިއުއެއްގައި ވެސް ޕްރިޔަންކާ ބުނީ މާ ވަރުގަދަ މީހެއް ކަމުގެ އިހްސާސްތައް އޭނާއަށް ނުކުރެވޭ ކަމަށެވެ.
ފިރިހެނުންނާ އެއް ހަމައެއްގައި ފައި ހަމަކުރަމުން ހިނގިދާނެކަން އަންހެނުން ސާބިތުކޮށްދީފައި ވިޔަސް އެއީ ހަގީގަތުގައި އެހާ ފަސޭހަ ކަމެއް ނޫން ކަމަށް ޕްރިޔަންކާ ބުންޏެވެ. ސަބަބަކީ އަންހެނުންނަކީ މާ ނާޒުކު ބަޔަކަށް ވާތީ ކަމަށް ޕްރިޔަންކާ ދެކެ އެވެ.
"އަހަންނަކީ ވެސް ބައެއް ފަހަރަށް ވަރަށް ނާޒުކު އަނެއް ބައި ފަހަރަށް ވަރަށް މޫޑީ މީހެއް. ނަމަވެސް ޝޫޓިންއަކަށް ސެޓަކަށް ދާއިރު އަހަރެންގެ މިކަހަލަ އެއްވެސް ސިފައެއް އަހަންނެއް ނުދައްކަން. އަހަންނަކީ ވަރަށް ހިތްވަރުގަދަ ކެރޭ މީހެއްގެ ގޮތުގައި ބެލެެވެނީ އެހެންވެ،" ޕްރިޔަންކާ ބުންޏެވެ.
ޕްރިޔަންކާ މިހާރު މަސައްކަތް ކުރަނީ އެމެރިކާގެ ޓީވީ ޗެނަލަކުން ދައްކާ "ކުއަންޓިކޯ" ސީރީޒްގެ ތިން ވަނަ ސީޒަންގަ އެވެ. އޭނާ ބޮލީވުޑް ފިލްމުތައް އަލުން ކުޅެން ފަށަން ހަމަޖެހިފައިވަނީ މި ސީޒަންގެ މަސައްކަތް ނިންމުމަށް ފަހު އަންނަ އަހަރުގެ އޭޕްރީލް ހިސާބުގަ އެވެ.