18 އޮކްޓޯބަރ 2017 - 06:23
އަހަރެންގެ ފިރިމީހާ އަހަރެންދެކެ ވަރަށް ލޯބިވެއެވެ. އަހަރެންގެ ކޫސަނިކަންތައްތައް ބަލައެވެ. އަހަންނަކީ ވަރަށް ފެންސިރު މީހެކެވެ. ތަނަކުން ރީތި ގަހެއް، ފައިވާނެއް ނުވަތަ ބުރުގާއެއް ފެނުނަސް އަހަރެން ބޭނުންވެއެވެ. ވަގުތުން ގަނެދެއެވެ. އަހަރުމެން ދެމަފިރިންގެ ވަރަށް ބޮޑު ބިރެއް އޮވެއެވެ. ފުރަތަމަ ވަކިވާނީ ކާކު ހެއްޔެވެ؟ ޖަވާބު ނޭނގޭ ސުވާލެކެވެ. ހިތް ނުތަނަވަސް ކުރުވާ ސުވާލެކެވެ. އެދުމަކީ، އެކުއެކީގައި ވަކިވުމެވެ. އެހެން ނުވެއްޖެ ނަމަ، ގާތްގާތުގައި ވަކިވުމެވެ.
ތަޤުދީރު ނިޔާކުރި ގޮތުން، ފުރަތަމަ ވަކިވާންޖެހުނީ ފިރިމީހާއަށެވެ. ބޮޑު ބައްޔެއްގައި އުޅެން ނުޖެހި، ކުއްލިގޮތަކަށް ނިޔާވީއެވެ. މިސްކިތުގައި ނަމާދުކުރަން ހުއްޓައެވެ. އުފާކުރުން ޙައްޤު މަރެކެވެ. އެހެނަސް ހިތްދަތިވި ދަނޑިވަޅެކެވެ. ދިރިހުރިހައި ހިނދަކު ފިރިމީހާގެ އުފާވެރި ހަނދާންތައް ދެމިހުންނާނެއެވެ. ބުނެފައިވާ ހިތްހެޔޮ ބަސްތަކުން އަހަރެން ރޮއްވާނެއެވެ. އޭނައަކީ، އެހާ ވެސް ހެޔޮ، އޯގާތެރި ފިރިއެކެވެ. އަހަރުމެންނަށް ލިބިފައިވަނީ އަށް ދަރިންނެވެ. މުޅީން ވެސް އަންހެންކުދިންނެވެ. ފިރިމީހާ ނިޔާވިއިރު ކައިވެނިކޮށްގެން އުޅެނީ ދެ ކުދިންނެވެ. ފިރިމީހާއަށް ފެނުނީ އެންމެ ކާފަދަރިއެކެވެ.
އެންމެން ވެސް އުޅެނީ އަހަރެންނާ އެކީގައެވެ. ދަރިންނާއި ދަރިންގެ ފިރިން ވެސް ވަޒީފާ އަދާކުރެއެވެ. އެންމެން ވެސް އުޅެނީ ވަރަށް އަވަދިނެތިއެވެ. މާމަދަރިފުޅު ލިބުމުން، އޭނަ ބަލަން ދަރިފުޅު އޮފީހުން ކެނޑޭނެކަމަށް ހީކުރީމެވެ. އެހެނެއް ނުވިއެވެ. ދަރިފުޅު ބަލާނެ މީހަކު ގެންނާނެކަމަށް ހީކުރީމެވެ. އެ ކަމެއް ވެސް ނުވިއެވެ. މާމަދަރިފުޅު ބަލަން ހަވާލުވީ އަހަންނާއެވެ. ފުރަތަމަ މާމަދަރިފުޅެވެ. އޮންނާނީ ކޮން ޝަކުވާއެއް ހެއްޔެވެ؟ ވަރަށް ލޯބިން އެ ކަން ކުރަނިކޮށް، އެހެން ކުއްޖަކަށް ދެވަނަ މާމަދަރި ލިބުނެވެ. އެ ކުއްޖާ ވެސް ބަލަން ހަވާލުވީ އަހަންނާއެވެ. އެކަކުގެ ދަރިފުޅު ބަލައިދެންޏާ އަނެކަކުގެ ދަރިފުޅު ވެސް ބަލައިނުދޭންވީ ސަބަބެއް ނެތެވެ. ތިންވަނަ މާމަދަރިފުޅު ލިބެން ލީނާ ބަނޑުބޮޑުވިއެވެ. އެ ކުއްޖާ ވެސް ބަލައިދޭން އަހަރެން ކިތަންމެހާ ވެސް ބޭނުމެވެ. އެކަމަކު އެއީ ކުޅަދާނަ ކަމަކަށް ނުވާނެކަން އަހަންނަށް އެނގުނެވެ. އަހަރެންގެ އުމުރު އެ ކަމަކަށް ތަނެއް ނުދެއެވެ.
"ދަރިފުޅު ޖެހޭނެ ކުއްޖާ ބަލަން މީހަކު ގެންނަން އިނގޭ،" އަހަރެން ވަރަށް ލޯތްބާއެކު އެދުނީމެވެ. "މި ގޭގަ ހުސް ކޮޓަރި އެބަހުއްޓެއްނު."
ޔަގީނުން ވެސް އެ ޖަވާބާ ދޭތެރޭގައި ލީނާ ހިތްހަމައެއް ނުޖެހުނެވެ. ގެންނަ ބިދޭސީމީހާއަށް މުސާރަ ދޭންޖެހޭތީއެވެ. އަހަންނަށް ކުރިން ލިބުނު ދެ މާމަދަރިން ބަލަމުންދާއިރު ލީނާގެ ދަރިފުޅު ނުބެލީތީއެވެ. ލީނާގެ ދަރިފުޅު ދެކެ އަހަރެން ލޯބި ނުވާކަމުގެ ތުހުމަތު ވެސް އަހަރެންގެ ބޮލުގައި އެޅުނެވެ. އެހެން ބުނުމުގެ ޙައްޤު އޭނައަށް އެބައޮތެވެ. ތެދަކަށް ނުވިޔަސް ވެހެއެވެ. ލީނާއަށް ލިބުނީ އަންހެންކުއްޖެކެވެ. ދަރިފުޅު ބަލަން ބިދޭސީއަކު ގެނައެވެ. އެކަމަކު ދަރިފުޅަށް އަހަރު ނުވަނީސް، އޮފީސް ދަތުރެއްގައި ދެ މަސްދުވަހަށް ލީނާ ފުރައިގެން ދިޔައެވެ. ގެނައި ބިދޭސީއަކީ ވިއްސަކަށް އަހަރުގެ އަންހެންކުއްޖެކެވެ. ދަރިން ބެލުމުގެ އެއްވެސް ތަޖުރިބާއެއް އޭނަގެ ނެތެވެ. އެންމެ ފަހުން ބޮލަށް ތުރާވެގެން ލީނާގެ ދަރިފުޅު ބެލުމުގެ މަސްޢޫލިއްޔަތު ވެސް އަހަރެންގެ ކޮނޑުގައި އެޅީމެވެ.
އަށް މާމަދަރިން އަހަންނަށް ލިބުނެވެ. އޭގެތެރެއިން ފަސް ކުދިންގެ ކަންތައް ބަލަހައްޓަން އަހަންނަށް މަޖުބޫރުވިއެވެ. ދަރިން ބަލަން އެ ކުދިންގެ މަންމައަކަށް ގެއަކު ނުހުރެވެއެވެ. ގެންނަ ބިދޭސީން ކަންތައް ކުރާ ގޮތް އަހަންނަކަށް ކަމަކުނުދެއެވެ. ބޭނުން ނަމަ ލޯމަރައިލައިގެން އަހަންނަށް ހުރެވުނީހެވެ. އެހެނަސް ބިދޭސީންގެ އަތުން ފެންވަރާކަށް ބައެއް މާމަދަރިން ބޭނުމެއް ނޫނެވެ. ފެންވަރުވައިގެން ނެރޭއިރު ގައިން ކިލައެއް ނުފިލައެވެ. ކުއްޖާ ނުކާން އެއްފަހަރު ގަދަހަދައިލުމުން ކާންދޭން އިތުރު މަސައްކަތެއް ކުރާކަށް ބިދޭސީމީހާ ބޭނުމެއް ނުވެއެވެ. އެ މަންޒަރު ފެންނަނީ އަހަންނަށެވެ. ހިތަކަށް ކުޅަދާނައެއް ނުވިއެވެ. އަހަރެން ދަރިން ބޮޑެތިކުރީ އެހެނެއް ނޫނެވެ. އެ ކަމާ ވެސް ހަވާލުވީމެވެ. ރައްޓެއްސަކާ އަނގަތަޅައިލާކަށް ނީނދެވެއެވެ. ދެ ނަމާދު ދޭތެރޭގައި ޤުރުއާން ކިޔަވަން އިންނަން ވެސް އަހަރެން ބޭނުމެވެ. ކުޑަމިނުން، އަރާމުކޮށްލާކަށް ނޯވެވެއެވެ. ކުޑަކުދިން ހަޅޭއްފަޅޭއް ލަވާނެއެވެ. އެނދަށްއަރައި ފުމެ ހަދާނެއެވެ. އެއީ ކުދިން އުޅޭ ގޮތެވެ. ހަޅޭއްލަވައިގެން ހުއްޓުވާކަށް ބޭނުމެއް ނުވެއެވެ.
ދުވަސްކޮޅަކުން އަހަރެންގެ ގައިގަ ރިއްސަން ފެށިއެވެ. ލުޔެއް ލިބެނީ ހިނގުން ފަދަ ލުއި ކަސްރަތެއް ކުރީމައެވެ. ހަފުތާއެއް ވާންދެން ހިނގަން ދެވުނެވެ. ވަގުތު ނުވެގެން އެ ކަން ހުއްޓައިލީއެވެ. މުސްކުޅިންނަށް ޚާއްޞަ ޔޯގާ ކިލާހަކަށް ދިޔައީމެވެ. ދެ ދުވަހުން އެއް ދުވަހު ކިލާސް އޮވެއެވެ. ދެވެނީ މަހަކު ހަތަރު ކިލާހަށެވެ. ކޮންމެވެސް މާމަދަރިއެއްގެ ކަމަކާ ހެދި ކިލާސް ކެންސަލުކުރަން ޖެހެއެވެ. އެކި ކުދިން އިސްކޫލުން އަންނަނީ އެކި ވަގުތުއެވެ. ކުދިންގެ މައިން ގެއަކު ނުތިބެއެވެ. ފިރިންނަށް ވެސް ވަގުތު ވަނީ މަދު ފަހަރަކުއެވެ. އެއީ އެއް މައްސަލައެވެ. ގިނައީ އަންހެން މާމަދަރިންނެވެ. އެއީ އަނެއް މައްސަލައެވެ. ނުލާހިކު ލޯބިލޯބި ކުދިންނެވެ. އަހަރެން ދެކެ ހުރިހައި ކުދިން ވެސް ވަރަށް ލޯބިވެއެވެ. އަހަންނަށް ވަރިހަމަ ކިޔައިގެން ހުންނަން ހިތަކަށް ކުޅާދާނައެއް ނޫނެވެ. މަންމަ އަޅާނުލާބަލާށޭ އަހަރެންގެ ދަރިން ބުނެއެވެ. ދެން އަޅާލާނީ ކާކު ހެއްޔެވެ؟ އެ ކަމެއް ނުވިސްނެއެވެ.
އަހަރެންގެ އެންމެ ދޮށީ ދަރިޔަކީ ރާޝިދާއެވެ. އެންމެ ފަހުން ކުދިން ހޯދީ އޭނައެވެ. ދޮށީ ދަރިފުޅަށް ހަތަރު އަހަރު ފުރިފައިވާއިރު، އޭރު ވެސް އޭނަ ބަނޑުބޮޑެވެ. ހަފީޒަކީ ރާޝިދާގެ ފިރިމީހާއެވެ. އޮފީހުގެ ފަރާތުން ހަފީޒަށް ކިޔެވުމުގެ ފުރުޞަތު ލިބުނެވެ. ދާންޖެހެނީ ސިންގަޕޫރަށެވެ. ދެ އަހަރު ދުވަހުގެ ކޯހެކެވެ. ރާޝިދާ ދާން ބޭނުންވިއެވެ. އަހަރެން ވެސް ގޮވައިގެންނެވެ.
"މަންމަޔަކަށް ނުދެވޭނެ،" އަހަރެން އިންކާރު ކުރީމެވެ. "މަންމަ މިކޮޅުގަ ބަހައްޓާ!"
"ދެން މަންމަ ކީއްކުރަން މާލޭގަ ހުންނަނީ؟" ރާޝިދާ ބުންޏެވެ. "އެންމެންގެ ދަރިން ބަލަން ގޭގަ އިނދެގެން މަންމައަށް ކޮން ރެސްޓެއް ލިބޭނީ؟ ސިންގަޕޫރަށް ގޮސް އަރާމުކުރަން ހުރީމަ ނިމުނީ. ނުޖެހޭނެ އެއްވެސް ކަމެއް."
"އޭރުން މުޅި ގެ ބޮއްސުންލާނޭ ދަރިފުޅާ!" އަހަރެން ބުނީމެވެ.
"މަންމާ! މަންމަ ނުޖެހޭނެ އެ ކަމާ ވިސްނާކަށް،" ރާޝިދާ ކުރެއް ނުކުރިއެވެ. "ގޭގަ އުޅޭ މީހުން ގެ ބަލަހައްޓާނެ. ބޭނުމިއްޔާ ފޯނުން ގުޅާފަ ވާނުވާ ވެސް ބެލޭނެއްނު."
ރާޝިދާ ދެކޭގޮތުގައި އަހަރެން ބެލުމުގެ ޒިންމާ އުފުލަންޖެހޭނީ އޭނައެވެ. އަހަރެން ވަރަށް އުފާވިއެވެ. ރާޝިދާ އަމިއްލައަށް އެ ޒިންމާ ނެގީތީއެވެ. ހިތަށްއެރިއެވެ. އެ ފަދައިން ދެކޭ ދަރިން ވެސް މިހާރު ހާދަހާ މަދުވެއްޖެއެވެ. އަހަރެން ސިންގަޕޫރަށް ފުރީ ނުތަނަވަސް ހިތަކައިގެންނެވެ. އެއް ދަރިފުޅަށް ޓަކައި އެހެން ހުރިހައި ދަރިން ދޫކޮށްލަންޖެހޭތީއެވެ.
ސިންގަޕޫރަށް ދެވުނުތާ މާ ގިނަ ދުވަހެއް ނުވެ ރާޝިދާ ވިހެއެވެ. ވިހައި ގަދަވާއިރަށް ރާޝިދާ ވަޒީފާއެއް ހޯދިއެވެ. ހެނދުނު އިރުއަރާއިރަށް ދެމަފިރިން ގެއިން ނުކުމެއެވެ. އެނބުރި އަންނަނީ ހަވީރުއެވެ. ދެ މާމަދަރިން ގޮވައިގެން އަހަރެން އިންނަނީ އެކަނިމާއެކަންޏެވެ. ގޭގައި ހުންނަނީ ދެ ކޮޓަރިއެވެ. ދެމަފިރިންނަށް އެއް ކޮޓަރި، އަހަންނާއި ދެ މާމަދަރިންނަށް އެއް ކޮޓަރިއެވެ. ރެޔާއި ދުވާލު ދެ ކުދިން ގޮވައިގެން އުޅެނީ އަހަންނެވެ. މާމަދަރިން ދެކެ ލޯބިނުވަނީއެއް ނޫނެވެ. އެހެންނަމަވެސް، ދަރިންބަލަން ގެނެސްފައިވާ ބިދޭސީއަކަށް ވުރެ އަހަރެންގެ ހާލު ދެރައެވެ. އަހަރެންގެ އަތަކު އެންމެ ލާރިއެއް ވެސް ނެތެވެ. މާލެއިން ގެނައި ހެދުންތައް ބާވެ، ބައެއް ހެދުން ނުލެވޭ ވަރު ވެއްޖެއެވެ. ފައިސާ ދޭން ކިޔުމަކީ، ފިރިމީހާ ދުނިޔޭގައި ހުރިއިރު ވެސް އަހަރެން ކުރި ކަމެއް ނޫނެވެ. ކުރަން ފަސޭހަކަމެއް ވެސް ނޫނެވެ. އެ ކަން އެނގޭތީ ފިރިމީހާ މަހަކު ވަކި ވަރެއް އަހަންނަށް ދެއެވެ. ބުނާކަށް ނުޖެހެއެވެ. ރާޝިދާ އަބަދު ދައްކަނީ އަތްމަތި ދަތި ވާހަކައާއި، ލިބޭ އެއްޗަކުން ކިރިޔާ ދެކޮޅުޖެހޭ ވާހަކައެވެ. އަމުދުން އެއްޗެއް ދޭން ބުނާނެ ހިތްވަރެއް އަހަރެންގެ ނުހުރެއެވެ.
އަށް ދަރިން ބަލައިބޮޑުކުރުމަށް ފަހު މުސްކުޅިވި ދުވަހު އަނެއްކާ ވެސް ކުޑަ ދެ ކުދިން ބަލަންޖެހުނީއެވެ. އެ ކަމާ ޝަކުވާކުރަނީއެއް ނޫނެވެ. އެހެންނަމަވެސް، ދޮށީ ކުއްޖާ ވަރަށް ހަލަންޏެވެ. އޭނަގެ ފަހަތުން ދުވާނެ ހިތްވަރެއް އަހަރެންގެ ނެތެވެ. އޭނައަށް އަނިޔާއެއް ވެއްޖެއްޔާ ރާޝިދާ ވަރަށް ހިތްހަމަނުޖެހެއެވެ. ބަންދު ދުވަހެއް ލިބޭއިރަށް ކުދިން ގޮވައިގެން ރާޝިދާގެ ދެމަފިރިން ކޮންމެވެސް ތާކަށް ދެއެވެ. ގެ ބަލަން އިންނަންޖެހެނީ އަހަންނެވެ. އެއީ އަހަރެން އުންމީދުކުރި ގޮތެއް ނޫނެވެ. ދަރިންނަކީ ލޮލުގެ ފިނިކަމޭ ބުނާ އަޑު އަހަމެވެ. ބަލިއެނދުގައި އޮންނަންޖެހޭ ދުވަހު ދަރިންގެ އެހީތެރިކަން ލިބޭނެޔޭ ކިޔާ އަޑު ވެސް އަހަމެވެ. އަށް ދަރިން ބޮޑުކޮށްފީމެވެ. އެކަމަކު، އެ ފަދަ ދުވަހެއް އަހަންނަށް ފެންނާނެކަމުގެ ކުޑަ ވެސް އުންމީދެއް ނެތެވެ.
ހިތަށްއަރައެވެ. ފިރިމީހާ ދުނިޔޭގައި ހުރި ނަމައެވެ. އޭނަ ނެތުމުން އަހަރެން ވަރަށް އެކަނިވެއްޖެއެވެ. ވަރަށް ބާކީވެއްޖެއެވެ. ވިސްނަން އޮއްވައި ހަގު މަންޖެ ރޯން ފެށި އަޑު އިވުނެވެ. އޭނަ ބަލިވެއުޅޭތާ ދެ ދުވަސް ވަނީއެވެ. ދޮށީ ކުއްޖާ ވެސް އުޅެނީ ކެއްސުންގަނޑެއް ލައިގަނެގެންނެވެ. އެކަކު ނިދާއިރަށް އަނެކަކު ހޭލައެވެ. ވަރުބަލިވެފައި ހުރިވަރުން އަހަންނަށް ރޮވޭވަރު ވިއެވެ. ގަޑިން ދަންވަރު ބާރަ ޖަހަނީއެވެ. ރާޝިދާގެ ދެމަފިރިން ވީ ޕާޓީއަކަށް ގޮހެވެ. ހިތްވަރު ކޮށްފައި އަހަރެން ތެދުވީމެވެ. ހަގު މަންޖެ ނަގައި ނާނާކިޔަން ފެށީމެވެ. މަންމައަކީމެވެ. މާމައަކީމެވެ. ބަލިވުމުން ކުޑަ ދަރިފުޅަށް ވާނެ އުނދަގޫ އަހަންނަށް އިހުސާސް ކުރެވެއެވެ. އިއްތިފާޤުން އަހަންނަށް ލިބުނު ހުރިހައި ކުދިންނަކީ ވެސް އަންހެންކުދިންނެވެ. މަންމައިންނެވެ. މަޔެއްގެ ހިތަށް ކުރާނެ އަސަރު އެ އިން އެންމެ ކުއްޖަކަށް ވެސް ނުވިސްނުނީ ކީއްވެގެންބާއެވެ؟ ދަރިން ބޮޑުކުރުމުގައި އަހަންނަށް ހެދުނު ގޯހަކީ ކޮބައިބާއެވެ؟ ލޮލުން ކަރުނަ ފުހެލައިފައި މާމަދަރިފުޅުގެ ނިތްކުރީގައި ބޮސްދިނީމެވެ. އަހަންނަށް ކަށަވަރެވެ. ވަރަށް އަވަހަށް އަހަރެން ބަލިއެނދުގައި އޮށޯންނަން ޖެހޭނެއެވެ. އެ ދުވަހަކުން ދެން ކަންތައް ވާނީ ކިހިނެއްބާއޭ ހިތަށްއަރައެވެ.
ނިމުނީ