15 އޮކްޓޯބަރ 2017 - 11:30
ޖަލުގައި ހުރި ކުރީގެ ނައިބު ރައީސް އަހުމަދު އަދީބުގެ ގަޔަށް އިންޖެކްޝަނެއް ޖެހުމުގެ ހުއްދަ އަށް ކަރެކްޝަނަލް ސާވިސްއިން އާއިލާގެ ކިބައިން އެދުމުން އެކަމަށް އާއިލާއިން ދެކޮޅު ހަދާފައިވާތީ އަދީބުގެ ފަރުވާ ހުއްޓާލާފައިވާ ކަމަށް އަދީބުގެ އާއިލާއިން މިއަދު ބުނެފި އެވެ.
އަދީބުގެ އާއިލާއިން މިއަދު ނެރުނު ބަޔާނެއްގައިވަނީ އަދީބު ހޮސްޕިޓަލަށް ގެންގޮސް އޭނާގެ ގަޔަށް ޖެހުމަށް މަސައްކަތްކުރީ ސީޓީ ސްކޭން ހެދުމަށް ކަމަށް ބުނެ ކަމަށާއި އެހެން ނަމަވެސް އެއީ އަދީބަށް ކުރިމަތިވެފައިވާ ސިއްހީ މައްސަލަތަކާ ގުޅޭ ސްކޭނެއް ކަމަށް ނުވާތީ އެ އިންޖެކްޝަން ޖެހުމަށް އަދީބުގެ އަނބިކަނބަލުން ދެކޮޅު ހެއްދެވި ކަމަށް އެ ބަޔާނުގައިވެ އެވެ. އިންޖެކްޝަން ޖެހުމުގެ ހުއްދަ ދޭނީ ޑޮކްޓަރާ ބައްދަލު ކުރެވޭ ގޮތް ހަމަޖައްސައިދިނުމުން ކަމަށް އާއިލާއިން ބުނުމުން އެކަމަށް ކަރެކްޝަންސް އިން ދެކޮޅު ހެދި ކަމަށާއި މިހާރު ފަރުވާ ކަންކަން ވެސް ހުއްޓާލާފައިވާ ކަމަށް އެ ބަޔާނުގައިވެ އެވެ.
"އާއިލާގެ ފަރާތުން އެކަމަށް އިއުތިރާޒް ކުރުމުން އޭގެފަހުން އަހުމަދު އަދީބުގެ ބޭސްފަރުވާގެ ކަންކަން ހުއްޓާލާފައިވާ ވާހަކަ ވެސް އެންމެހައި ފަރާތްތަކުގެ މައުލޫމާތަށްޓަކައި ދަންނަވަމެވެ،" އެ ބަޔާނުގައިވެ އެވެ.
އެ ބަޔާނުގައިވާ ގޮތުން އިންޖެކްޝަން ޖެހުމަށް އާއިލާއިން ދެކޮޅު ހެދުމުން ސީޓީ ސްކޭން ހެދުމަށް އަދީބު އެއްބަސްވެފައިވާ ކަމަށް ކަރެކްޝަންސް އިން އާއިލާ އަށް އެންގިި އެވެ. އެހެން ނަމަވެސް އެ ސްކޭނާ ބެހޭ ގޮތުން އެއްވެސް ވާހަކައެއް ކަރެކްޝަންސްއާ ނުދައްކާ ކަމަށް އަދީބު އާއިލާ އަށް އަންގާފައިވާ ކަމަށް އެ ބަޔާނުގައިވެ އެވެ. އެހެންވެ ކަރެކްޝަންސްގެ ނިޔަތާ މެދު އެ ބަޔާނުގައި އާއިލާއިން ވަނީ ސުވާލު އުފައްދައިފަ އެވެ.
"އާއިލާ އަށް ސައްހަ މައުލޫމާތު ނުދީ އާއިލާގެ ފަރާތުން ލިޔުމުގައި ސޮއި ކުރުމަށް ބާރު އެޅުމުގެ ގޮތުން ދޮގު މައުލޫމާތު ދީފައިވުމަކީ ކަރެކްޝަނަލް ސާވިސްގެ ނިޔަތާ މެދު ޝައްކު އުފެދޭ ކަމެކެވެ،" އެ ބަޔާނުގައިވެ އެވެ.
އެ ބަޔާނުުގައިވާ ގޮތުން ޖަލުގައި ތިބި ގައިދީންނަށް ދޭންޖެހޭ ފަރުވާ ނުދިނުމުގެ މައްސަލަތަކުގައި މުއައްސަސާތަކުން އިހުމާލުވަމުންދާ ކަމަށާއި ހިއުމަން ރައިޓްސް ކޮމިޝަން ވެސް އޮތީ އެކަމަށް ނުކުޅެދިފައި ކަމަށް އެ ބަޔާނުގައިވެ އެވެ. ގައިދީން ކުއްލި ގޮތަކަށް މަރުވުމުގެ ހާދިސާގައި އާންމުވެފައިވާ ކަން ފާހަގަކޮށް އެ ބަޔާނުގައި ގޮވާލާފައިވަނީ މުއައްސަސާތަކުން އަޅަންޖެހޭ ފިޔަވަޅުތައް އެޅުމަށެވެ.
މިކަމާ ބެހޭ ގޮތުން ކަރެކްޝަންސް އިން އަދި އެއްޗެއް ނުބުނެ އެވެ.