10 އޮކްޓޯބަރ 2017 - 13:16
ހުޅުލެ އާއި މާލެއާ ދެމެދު އަޅާ ބްރިޖްގެ މަސައްކަތް ކުރަމުންދާ ސަރަހައްދަށް ވަންނަ އުޅަނދުތަކާ މެދު ފިޔަވަޅު އަޅާނެ ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން ނެރެފައިވާ އިއުލާނެއްގައި ވަނީ ބްރިޖްގެ މަސައްކަތް ކުރަމުންދާ ހުޅުލެ އާއި މާލެއާ ދެމެދު އޮންނަ ކަނޑުއޮޅި (ގާދޫކޮލު) އަށް ވަނުން މިދިޔަ އަހަރުން ފެށިގެން ޓްރާންސްޕޯޓް އޮތޯރިޓީން މަނާކޮށްފައިވާ ކަމަށެވެ. އެ ސަރަހައްދު އެނގޭނެ ހެން ބޮއި ހަރުކޮށްފައި ވިޔަސް ބައެއް އުޅަނދުތައް މިހާރަކަށް އައިސް އެ ސަރަހައްދަށް ވަދެ އުޅޭ ކަން ފާހަގަކުރެވޭ ކަމަށް އެ އިއުލާނުގައިވެ އެވެ.
"މިއާ ޚިލާފަށް މި ސަރަހައްދުގެ ތެރެއަށް ވަންނަ އުޅަނދުތަކާ މެދު، މިފަދަ ކަންކަމާ މެދު އަމަލު ކުރުމަށް ހަމަޖެހިފައިވާ އުސޫލުގެ ތެރެއިން ފިޔަވަޅު އަޅަމުން ގެންދާނެ،" އެ އިއުލާނުގައިވެ އެވެ.
އެ އިއުލާނުގައި ބުނެފައިވާ ގޮތުގައި އެ ސަރަހައްދަށް ވަދެ އުޅުމަކީ މަސައްކަތަށް ބުރޫ އެރުމުގެ އިތުރުން އާންމު ފަރާތްތަކަށް އޮތް ނުރައްކަލެކެވެ.
ޗައިނާ ސަރުކާރުގެ އެހީގައި ހަދަމުންދާ ބްރިޖްގެ މަސައްކަތް ބާރު ސްޕީޑްގައި ކުރަމުންދާއިރު އަންނަ އަހަރުގެ މެދު ތެރޭގައި ބްރިޖް ހުޅުވައި، ބޭނުން ކުރަން ފަށާނެ ކަމަށް ސަރުކާރުން ވަނީ ބުނެފަ އެވެ.