10 އޮކްޓޯބަރ 2017 - 09:28
ރޭކަވިކް، އައިސްލެންޑް (އޮކްޓޯބަރު 10) – ކޮސޯވޯ އަތުން 2-0 އިން މޮޅުވެ އަންނަ އަހަރުގެ ވޯލްޑް ކަޕުން ފުރުސަތު ހޯދައި އެ މުބާރާތުގައި ވާދަކުރާ އެންމެ އާބާދީ ކުޑަ ގައުމުގެ ޝަރަފް އައިސްލެންޑަށް ލިބިއްޖެ އެވެ.
މިދިޔަ އަހަރުގެ ޔޫރޯގެ ދެ ވަނަ ބުރުން އިންގްލެންޑް ކަޓުވާލައި ގިނަ ބަޔެއްގެ ސަމާލުކަން ހޯދި އައިސްލެންޑުގެ އާބާދީއަކީ 335،000 އެވެ. އެ ގައުމަކީ ދުނިޔޭގެ އެންމެ ޝަރަފްވެރި ފުޓްބޯޅަ މުބާރާތުގައި ވާދަކުރާނެ، އެއް މިލިއަނަށް ވުރެ އާބާދީ މަދު ފުރަތަމަ ގައުމެވެ.
ރޭގެ މެޗުގައި އައިސްލެންޑަށް ގޯލް ޖަހައިދިނީ އެވަޓަންގެ ގިލްފީ ސިގާސަން އާއި ބާންލީގެ ޔޮހާން ގުޑްމުންޑްސަން އެވެ. އައިސްލެންޑުގެ ގްރޫޕް އައި ގެ އެއް ވަނަ ހޯދީ 22 ޕޮއިންޓާ އެކު އެވެ. މި ގްރޫޕުގެ ދެ ވަނަ އަށް، 20 ޕޮއިންޓާ އެކު ދިޔަ ކްރޮއޭޝިއާ އަށް ޖެހޭނީ ޕްލޭއޮފް ކުޅޭށެވެ.
ކްރޮއޭޝިއާގެ އިތުރުން ޔޫކްރޭނާއި ތުރުކީ އަދި ފިންލެންޑް ފަދަ ގައުމުތައް ހިމެނުނު ގްރޫޕަކުން އައިސްލެންޑް އެއް ވަނަ ހޯދުމަކީ ބޮޑު ހައިރާންކަމެކެވެ. ރޭ އެ ޓީމު އަތުން ބަލިވި ކޮސޯވޯގެ ކޯޗު އަލްބާޓް ބުންޔަކީ އައިސްލެންޑުގެ ކާމިޔާބަކީ ކުދި ގައުމުތަކަށް ހިތްވަރެއް ކަމަށެވެ.
ވޯލްޑް ކަޕުގައި މިހާތަނަށް ވާދަކުރި އެންމެ އާބާދީ މަދު ގައުމަކީ 1.37 މިލިއަން މީހުންގެ އާބާދީއެއް އޮތް ޓްރިނިޑާޑް އެންޑް ޓޮބޭގޯ އެވެ.