06 އޮކްޓޯބަރ 2017 - 10:54
ދުނިޔޭގެ އެންމެ އަގުބޮޑު ކުޅުންތެރިއާ އަށް ވާން ލިބޭ ފުރުސަތު އެއްވެސް ކުޅުންތެރިއަކު ދޫކޮށްލަފާނެ ހެއްޔެވެ؟ އެކަމަކު މިދިޔަ 10 އަހަރުގެ ތެރޭގައި ކްރިސްޓިއާނޯ ރޮނާލްޑޯ އާއި ލިއޮނަލް މެސީ ފިޔަވައި ބެލޮންޑިއޯ އެވޯޑް ކާމިޔާބުކުރި ހަމައެކަނި ކުޅުންތެރިއާ ކަމަށްވާ ބްރެޒިލުގެ ކަކާ ވަނީ އެންމެ އަގުބޮޑު ކުޅުންތެރިއާ އަށް ވުމުގެ ފުރުސަތު ދޫކޮށްލައިފަ އެވެ. އިންގްލެންޑުގެ މެންޗެސްޓާ ސިޓީން 2009 ވަނަ އަހަރު ހުށަހެޅި ބޮޑު އަގަށް އޭރު އޭސީ މިލާނަށް ކުޅެމުން ދިޔަ ކަކާ ނޫނެކޭ އެ ވަގުތު ސިޓީ އޮތް ހާލަތުގެ ސަބަބުންނެވެ.
ކަކާ އަށް 2009 ވަނަ އަހަރުގެ ޖެނުއަރީ މަހު ސިޓީން ވަނީ 112 މިލިއަން ޔޫރޯ ހުށަހަޅައިފަ އެވެ. އޭރުގެ ރެކޯޑް ޓްރާންސްފާ އަކީ 2001 ވަނަ އަހަރު ޔުވެންޓަސް ދޫކޮށް 77 މިލިއަން ޔޫރޯ އަށް ރެއާލް މެޑްރިޑަށް ބަދަލުވި ޒިނެދިން ޒިދާންގެ ޓްރާންސްފާ އެވެ.
"ސިޓީ އަށް އަހަރެން ވިއްކާލަން އޭރު މިލާނުން ވެސް ނިންމި. ހަމައެކަނި މަދުވީ ސިޓީގެ އެއްބަސްވުމުގައި އަހަރެންގެ ސޮއި. އަހަރެން ސިޓީއާ ގުޅޭގޮތުން ވަރަށް ގިނަ ކަންތައްތައް ބެލިން. ސިޓީން ބޮޑު މުސާރައެއް ދިނަސް. އެ ތަނުގައި އަހަރެންގެ އާއިލާ ދިރިއުޅޭނެ ގޮތާ އެ ކަންތައްތައް ވެސް އޮޅުން ފިލުވިން. މި ހުރިހާ ކަންތައްތަކެއް އޭރު ދިޔައީ އަހަރެންނަށް ބޮޑު ބޮލުރިހުމަކަށް ވަމުން،" ކަކާ ބުންޏެވެ.
އޭނާ ބުނީ ސިޓީ އަށް ނުދާން ނިންމީ މިލާން ދޫކޮށްލަން ޖެހޭ ސަބަބެއް ނެތުމުން ކަމަށެވެ.
"އަހަރެން ވިސްނިގޮތުގައި މިލާން ކަހަލަ މުއްސަނދި ތާރީހެއް އޮތް ރަނގަޅު ޓްރެކެއްގައި އޮތް ކްލަބެއް ދޫކޮށް ސިޓީ ކަހަލަ މުޅިން އަލަށްފަށާ ޕްރޮޖެކްޓްގެ ފުރަތަމަ މަޝްހޫރު ކުޅުންތެރިއަކަށް ވެގެން އަހަންނަށް ކުރާނެ މާ ބޮޑު ފައިދާއެއް ނެތް. އެހެންވެ ސިޓީގެ ހުށަހެޅުމަށް ނޫނެކޭ ބުނީ،" ކަކާ ބުންޏެވެ.
އެ އަހަރު ސީޒަން ނިމުމުން ކަކާ ވަނީ މިލާން ދޫކޮށް ރެއާލަށް ބަދަލުވެފަ އެވެ. ރެއާލުން ކަކާގެ ސޮއިހޯދީ 68.5 މިިލިއަން ޔޫރޯ އަށެވެ. އެ ފަހަރުގެ ޓްރާންސްފާ މާކެޓްގައި ކްރިސްޓިއާނޯ ރޮނާލްޑޯ ވަނީ މެންޗެސްޓާ ޔުނައިޓެޑް ދޫކޮށް އޭރުގެ ދުނިޔޭގެ ރެކޯޑް އަގަކަށް ރެއާލާ ގުޅިފަ އެވެ. ރޮނާލްޑޯ ބަދަލުވީ 94 މިލިއަން ޔޫރޯ އަށެވެ.
ކަކާ ރެއާލް ދޫކޮށް މިލާނާ އަލުން ގުޅުނީ 2013 ވަނަ އަހަރު އެވެ. އެއް ސީޒަނުގައި އެ ޓީމަށް ކުޅުމަށް ފަހު ކަކާ މިހާރު ކުޅެމުން އަންނަނީ އެމެރިކާ ލީގުގެ އޯލަންޑޯ ސިޓީ އަށެވެ.