01 ޖުލައި 2016 - 18:19
އައިޖީއެމްއެޗްގައި އަލަށް ހެދި ކެތުލެބްގައި މިއަދު ހަތަރު މީހަކަށް ހިތުގެ ބައްޔަށް ކާމިޔާބުކަމާ އެކު ފަރުވާދީފި އެވެ.
އެތަނުގެ ހިދުމަތް ފެށުމުގެ ގޮތުން ތިން މީހަކަށް ފަރުވާދިނުމަށް ފަހު ނޫސްވެރިންނާ ވާހަކަދައްކަވަމުން އެ ހޮސްޕިޓަލުގެ ސީނިއާ ކާޑިއޮލޮޖިސްޓް ޑރ. އަލީ ޝަފީގް ވިދާޅުވީ ހަފުތާއަކު ތިން ހަތަރު މީހަކު ހިތުބަލީގައި އެ ހޮސްޕިޓަލަށް އަންނަ ކަމަށެވެ. އަދި މަހަކު 15 ވަރަކަށް މީހުން ފަރުވާ ހޯދަން ރާއްޖެއިން ބޭރަށް ފޮނުވަން ޖެހޭ ކަމަށް ވެސް އޭނާ ވިދާޅުވި އެވެ.
"މިއަދަކީ ވަރަށް ތާރީހީ ދުވަހެއް. އަދި މިއީ ވަރަށް ގިނަ ބަޔަކު އިންތިޒާރުކުރަމުން އައި ކަމެއް. މިހާރު މިތަނުގައި ބޭނުންކުރާ ސެޓަޕަކީ އެންމެ ފަހުގެ ސެޓަޕެއް. އިތުރު ޕްރޮސީޖާތައް ހެދެމުންދާ ވަރަކަށް އަޅުގަނޑުމެންދާނީ މެޝިން އަޕްގްރޭޑްކުރަމުން،" ޑރ. އަލީ ވިދާޅުވި އެވެ.
އޭނާ ވިދާޅުވީ އެ ހޮސްޕިޓަލުން މަސައްކަތްކުރަނީ ހިތުގެ ހުރިހާ ބަލިތަކަށް ކުރިޔަށް އޮތް ދެ އަހަރެއްހާ ދުވަހުގެ ތެރޭގައި ފަރުވާ ދޭން ފެށުމަށް ކަމަށެވެ.
އެ ހޮސްޕިޓަލުގައި މަސައްކަތްކުރައްވާ އިންޑިއާގެ މެޑްޓްރީނާ ހޮސްޕިޓަލްގެ ސުޕަ ސްޕެޝަލިސްޓް ޑރ. ޕްރަތާބް ވިދާޅުވީ މިއީ ދިވެހިންނަށް ލިބުނު ވަރަށް ބޮޑު ލުއި ފަސޭހަ ހިދުމަތެއް ކަމަށެވެ. އަދި މިއީ ރާއްޖޭގެ ސިއްހީ ދާއިރާގައި ވެސް ފާހަގަކޮށްލެވޭނެ ދުވަހެއް ކަމަށް އޭނާ ވިދާޅުވި އެވެ.
"ފުރަތަމަ ފަހަރަށް އެންޖީއޯގްރާމް އާއި އެންޖިއޯ ޕްލާސްޓީގެ ހިދުމަތް މިދެވުނީ. ވަރަށް ކާމިޔާބު ކަމާއެކީ ފުރަތަމަ ތިން މީހުންނަށް ވެސް ފަރުވާދީފައިވަނީ. ދެ މީހަކަށް ވަރަށް ސީރިއަސް ފަރުވާ ދޭން ޖެހުނު. އެއީ ދެ އެންޖިއޯ ޕްލާސްޓީ ލައްވަން ޖެހުން. އަނެއް މީހާ ވަރަށް ފަސޭހަކޮށް އެންޖިއޯގްރާމް ހެދުނު،" ޕްރަތާބް ވިދާޅުވި އެވެ.
އޭނާ ވިދާޅުވީ އައިޖީއެމްއެޗްގައި 24 ގަޑިއިރު ހިތުގެ ބަލިތަކަށް ފަރުވާދޭނެ ކަމަށެވެ. އަދި ހުކުރު ދުވަސް ފިޔަވައި އެހެން ކޮންމެ ދުވަހަކު އޯޕީޑީން އެޕޮއިންޓްމަންޓް ހެދޭނެ ކަމަށް ވެސް ޑރ. ޕްރަތާބް ވިދާޅުވި އެވެ.
"މިތަނުން ހިދުމަތް ހޯދަން އަންނަ ކޮންމެ މީހަކަށް ވެސް ފަރުވާދޭނަން. އަދި އަޅުގަނޑުމެން 24 ގަޑިއިރު މިތަނުގައި ފަރުވާދޭނަން. މިތަނުގައި ދުނިޔޭގެ އެންމެ ފަހުގެ ފަރުވާ ދެވޭނެ. މިތަނުގައި މިއަދު ދެވުނު ދެ އެންޖިއޯޕްލާސްޓީ އެހެން ތަނެއްގައި ނަމަ ބައިޕާސް އޮޕަރޭޝަންކުރާނީ. އެކަމަކު އަޅުގަނޑުމެން ﷲ ވާގިފުޅާއެކު މިވަނީ ވަރަށް ކާމިޔާބު ކަމާއެކީ ފަރުވާދީފައި،" އޭނާ ވިދާޅުވި އެވެ.
އައިޖީއެމްއެޗުން ބުނީ މިއަދު ފަރުވާ ދިން ހަތަރު މީހުން ވެސް މާދަމާގެ ވަގުތެއްގައި ދޫކޮށްލާނެ ކަމަށެވެ.