30 ސެޕްޓެމްބަރ 2017 - 16:32
ރިޔާޒް (ސެޕްޓެމްބަރު 30) - ސައުދީ އަރަބިއާގައި އަންހެނުން ކާރު ދުއްވަން ފެށުމުން މަގު މަތީގެ އެކްސިޑެންޓްތައް މަދުވާނެ ކަމަށް އެ ގައުމުގެ ދާޚިލީ ވަޒީރު ޕްރިންސް އަބްދުލް އަޒީޒް ބިން ސައުދު ބިން ނާއިފް ވިދާޅުވެއްޖެ އެވެ.
ސައުދީ ވަޒީރު ވިދާޅުވި ބަސްފުޅަށް ބާރު ލިބޭ އެއްވެސް ހެއްކެއް ދައްކަވައިފައެއް ނުވެ އެވެ. ނާއިފް ވިދާޅުވީ އަންހެނުން ކާރު ދުއްވަން ފެށުމުން މަގުމަތީގެ ރައްކާތެރިކަން ތައުލީމީ ޕްރެކްޓިހަކަށް ބަދަލުވާނެ ކަމަށެވެ.
ސައުދީ އަރަބިއާ އަކީ މަގުމަތީގެ އެކްސިޑެންޓްތައް އެންމެ ގިނައިން ހިނގާ އެއް ގައުމެވެ. އެކްސިޑެންޓްތަކުގައި އެ ގައުމުގައި އެވްރެޖްކޮށް ދުވާލަކު 20 މީހުން މަރުވާ ކަމަށްވެ އެވެ.
އަންނަ އަހަރުގެ ޖޫން މަހުން ފެށިގެން ސައުދީ އަރަބިއާގައި އަންހެނުންނަށް ކާރު ދުއްވޭނެ އެވެ. އެ ނިންމުން ރަސްގެފާންގެ ގަރާރަކުން އިއުލާންކޮށްފައި ވަނީ މި މަހު 27 ވަނަ ދުވަހު އެވެ. ރަސްގެފާނުގެ މި ނިންމެވުމާ އެކު ކާރު އުފައްދާ ދުނިޔޭގެ ބޮޑެތި ކުންފުނިތަކުން ވަނީ ސައުދީގެ އަންހެނުންނަށް އަމާޒުކޮށް އިޝްތިހާރު ކުރަން ފަށައިފަ އެވެ.
ސައުދީގެ ދާޚިލީ ވުޒާރާގެ ތަރުޖަމާނަކު ވިދާޅުވީ އަންހެނުންނަށް ކާރު ދުއްވުމުގެ ހުއްދަ ދިން ނަމަވެސް ލައިސަންސް ދޫކުރާނީ 18 އަހަރުވެފައިވާ މީހުންނަށް ކަމަށެވެ.
ސައުދީގައި އަންހެނުންނަށް ކާރު ދުއްވުމުގެ ހުއްދަ ދިނުމުން އެ ގައުމުގެ އަންހެނުން ޑްރައިވަރުންގެ ގޮތުގައި ގެންގުޅޭ 800،000 ވަރަކަށް މީހުންގެ ތެރޭން ގިނަ ބައެއްގެ ވަޒީފާ ގެއްލޭނެ އެވެ. ސައުދީގައި 18 އަހަރުން މަތީގެ އަންހެނުންގެ އާބާދީ 10 މިލިއަނަށް އަރާ ކަމަށް ތަފާސް ހިސާބުތަކުން ދައްކަ އެވެ.