01 ޖުލައި 2016 - 04:39
މާސޭ، ފްރާންސް (ޖޫން 30) - ޕެނަލްޓީ ޖަހައިގެން ޕޮލެންޑް 5-3 އިން ބަލިކޮށް ޔޫރޯ ފުޓްބޯޅަ މުބާރާތުގެ ސެމީ ފައިނަލުން ހަތަރު ވަނަ ފަހަރަށް ޕޯޗުގަލް މިރޭ ޖާގަ ހޯދައިފި އެވެ.
ގްރޫޕް ސްޓޭޖުގައި ކުޅުނު ތިން މެޗު ވެސް އެއްވަރުވެ އަދި ދެ ވަނަ ބުރުގައި ކްރޮއޭޝިއާ އަތުން އިތުރު ވަގުތު ކުޅެ މޮޅުވި ޕޯޗުގަލް ގަދަ ހަތަރު ޓީމުގެ ތެރެއަށް ދިޔައިރު މުބާރާތުގައި އަދި ފުރިހަމަ ވަގުތުގެ ތެރޭ އެ ޓީމަށް މޮޅެއް ހޯދިފައެއް ނުވެ އެވެ.
މިރޭގެ މެޗުގެ ފުރިހަމަ ވަގުތާއި އިތުރު ވަގުތު ހަމަވި އިރު ދެ ޓީމު އޮތީ 1-1 އިން އެއްވަރުވެފަ އެވެ. ޕެނަލްޓީ ޝޫޓް-އައުޓް ގައި ޕޯޗުގަލްގެ ފުރަތަމަ ހަތަރު ޕެނަލްޓީ ކްރިސްޓިއާނޯ ރޮނާލްޑޯ، ރެނާޓޯ ސަންޗޭސް، މުޓީނިއޯ ކާމިޔާބުކުރި އެވެ. ޕޮލެންޑުގެ ފުރަތަމަ ތިން ޕެނަލްޓީ ރޮބަޓް ލެވޮންޑޮސްކީ އާއި މިލިޗް އަދި ގިލްޗް ކާމިޔާބުކޮށްފައިވަނިކޮށް މައްސަލަ ދިމާވީ ހަތަރު ވަނަ ޕެނަލްޓީ ޔަކޫބް ބްލާސްކޮވިސްކީ ޖެހުމުން ޕޯޗުގަލް ގޯލްކީޕަރު ރުއި ޕެޓްރީޝިއޯ މަތަކުރުމުންނެވެ. އެއާ އެކު ޕޯޗުގަލްގެ ފަސް ވަނަ ޕެނަލްޓީ ކުއަރެސްމާ ކާމިޔާބުކޮށް އެ ޓީމު ސެމީ އަށް ގެންގޮސްދިނެވެ.
ސެމީ ފައިނަލުގައި ޕޯޗުގަލް ބައްދަލުކުރާނީ ކުއާޓާ ފައިނަލުގައި ބެލްޖިއަމާއި ވޭލްސް ކުޅެ މޮޅުވާ ޓީމަކާ އެވެ.
މިރޭގެ މެޗުގައި ލީޑު ނެގީ ޕޮލެންޑުންނެވެ. އެ ޓީމަށް ދެ ވަނަ މިނެޓުގައި ގޯލް ޖަހައިދިނީ ދުނިޔޭގެ އެންމެ މޮޅު އެއް ފޯވާޑް ރޮބަޓް ލެވޮންޑޮސްކީ އެވެ. މިއީ އޭނާ މުބާރާތުގައި ޖެހި ފުރަތަމަ ލަނޑެވެ. ޕޯޗުގަލަށް އެއްވަރުކޮށްދިނީ 33 ވަނަ މިނެޓުގައި، ރެނާޓޯ އެވެ. އޭރިއާ ތެރެއިން އޭނާ ފޮނުވާލި ބޯޅަ ގޯލުގެ ތިރީ ކަނަށް ވައްދާލީ ޕޮލެންޑުގެ ޑިފެންޑަރެއްގެ ފައިގައި ޖެހިފަ އެވެ. މިރޭގެ މެޗާ އެކު، ބަޔާން މިއުނިކަށް ބޮޑު އަގުގައި ސޮއިކޮށްފައިވާ ރެނާޓޯ ވެފައިވަނީ ޔޫރޯ ނޮކްއައުޓް މެޗެއްގައި ލަނޑު ޖެހި އެންމެ ޒުވާން ކުޅުންތެރިޔާ އަށެވެ.
"އަހަރެމެން އަންނަނީ ވަރަށް ބުރަކޮށް މަސައްކަތްކުރަމުން. އަދި އަހަރެމެންނަށް ހޯދޭނެ އެންމެ ރަނގަޅު ނަތީޖާ ހޯދަމުން މި އަންނަނީ. މީހުން ފާޑުކިޔާ އެކަމަކު އެކަމާ ނުވިސްނަން މިހާރު މި އޮތީ ސެމީ ފައިނަލުގައި،" ރެނާޓޯ ބުންޏެވެ.
ޕޮލެންޑުގެ ކޯޗު އެޑަމް ނަވަލްކާ ބުނީ ފުރިހަމަ ވަގުތުގެ ތެރޭގައި މުބާރާތުގައި އެ ޓީމު ބަލިނުވާ ކަމަށާއި އެހެންކަމުން މުސްތަގުބަލާ މެދު ބޮޑު އުއްމީދެއް ކުރެވޭ ކަމަށެވެ.
"މުޅި މުބާރާތުގައި ވެސް ވަރަށް ވިސްނައިގެން، މޮޅަށް ކުޅުނު އަހަރެމެންގެ ކުޅުންތެރިން. އެހެންވެ މިގޮތަށް ބަލިވުމަކީ ވަރަށް ހިތްދަތިކަމެއް،" އޭނާ ބުންޏެވެ. "އެކަމަކު ޓީމާ މެދު އުއްމީދު ބޮޑު."