30 ސެޕްޓެމްބަރ 2017 - 06:20
ކެނެޑާ އަށް ނިސްބަތްވާ މަޝްހޫރު ލަވަކިޔުންތެރިޔާ ޝެނަޔާ ޓްވެއިން 15 އަހަރަށް ފަހު އާ އަލްބަމެއް ނެރެފި އެވެ.
މިހާރު ވިއްކަން ފަށާފައިވާ "ނައު" އަކީ ދިރިއުޅުމުގައި ދިމާވި ބޮޑެތި ދަތި އުނދަގޫތަކެއް ކަޑައްތުކުރުމަށް ފަހު އޭނާ އެކުލަވާލި އަލްބަމެކެވެ. އޭގެ ތެރޭގައި މިއުޒިކް ޕްރޮޑިއުސަރު ރޮބަޓް މަޓް ލޭންގްއާ ކުރި ކައިވެނި 2008ގައި ހިތި ގޮތަކަށް ރޫޅިގެންދިޔުމާއި ލައިމް ޑިޒީސްގެ ސަބަބުން އަޑަށް ދިމާވި މައްސަލަތައް ހިމެނެ އެވެ.
"ޔޫ އާ ސްޓިލް ދަ ވަން" ފަދަ ހިޓް ލަވަތައް ކިޔާފައިވާ ޓްވެއިން އާ އަލްބަމާ ބެހޭގޮތުން ދެމުން އަންނަ އިންޓަވިއުތަކުގައި ބުނަނީ "ނައު"ގައި ހިމެނެނީ ކުޑައިރުން ފެށިގެން އޭނާ ތަޖުރިބާކޮށްފައިވާ ކަންކަމުގެ މައްޗަށް ބިނާކޮށް ހަދާފައި ލަވަތަކެއް ކަމަށެވެ.
އޮންޓަރިއޯ އަށް ނިސްބަތްވާ ޓްވެއިން ބޮޑުވީ ފަގީރު ހާލުގަ އެވެ. އަދި ކާރު އެކްސިޑެންޓެއްގައި މައިންބަފައިން މަރުވުމާ ގުޅިގެން، ހަގަށް ތިބި ތިން ކޮއްކޮ ބެލީ ވެސް އޭނާ އެވެ.
ފަސް ގްރެމީ އެވޯޑް ހޯދުމުގެ އިތުރުން، އެންމެ ގިނައިން ލަވަ ވިއްކި އަންހެން ކަންޓްރީ އާޓިސްޓްގެ ރެކޯޑް ދަމަހައްޓަމުން އަންނަ ޓްވެއިން 90ގެ އަހަރުތަކާއި ދެހާހުގެ އަހަރުތަކުގައި 100 މިލިއަނަށް ވުރެ ގިނަ އަލްބަމް ވިއްކާފައިވެ އެވެ. ތިން އަލްބަމަކަށް ޑައިމަންޑް ސެޓްފިކެޓް ލިބިފައިވާ ހަމައެކަނި އަންހެނަކީ ވެސް އޭނާ އެވެ. އެ އަލްބަމްތަކަކީ "ދަ ވުމަން އިން މީ"، "ކަމޯން އޯވާ" އަދި ތާރީޚުގައި ވެސް އެންމެ ގިނައިން ވިކިފައިވާ އަލްބަމްތަކުގެ ތެރޭގައި ހިމެނޭ "އަޕް!" އެވެ.
ކެނެޑާގެ ސީޓީވީ ނިއުސްއާ ވާހަކަދައްކަމުން ޓްވެއިން ބުނީ އާ އަލްބަމް "ނައު" އިން އޭނާ ކިޔައިދެނީ އެތައް ކަމަކުން އަރައިގަނެ، ސަލާމަތްވާން ކުރި ދަތުރެއްގެ ވާހަކަ ކަމަށެވެ. އަލްބަމަށް ނަން ދިނީ ވެސް އެ ގޮތަށް ބަލައިގެން ކަމަށާއި މިހާރު ވިސްނުން ހުރީ ހަމައެކަނި މި ވަގުތު އޭނާ ހުރި ހިސާބާ މެދު ކަމަށެވެ. ދާން ބޭނުންވަނީ ކިހާ ހިސާބަކަށްތޯ ނުވަތަ ދާން އޮތީ ކިހާ ހިސާބަކަށްތޯ ވެސް ނުވިސްނާ ކަމަށް އޭނާ ބުންޏެވެ.
"ހުރިހާ ލަވަތަކެއް ވެސް ހުންނާނީ، އަނދިރިކަމުން އަލިކަމަށް އަދި ހިތާމަ އިން އުފާވެރިކަމަށް ދިޔުމާ ބެހޭގޮތުން،" ކަންޓްރީ ޕޮޕްގެ "ރާނީ" ކަމަށް ބެލެވިފައިވާ ޓްވެއިން ބުންޏެވެ.
"ނައު"ގައި ކަންޓްރީ، ރެގޭ އަދި ރޮކް ފަދަ ތަފާތު އެކި ޖޮންރާތަކުގެ ލަވަ ހިމެނެ އެވެ. ބެލެވޭ ގޮތުގައި އެ އަލްބަމްގެ "ޕުއާ މީ" ޓްވެއިން ލިޔެފައިވަނީ ފިރިމީހާ އޭނާގެ އެންމެ ގާތް އެކުވެރިޔާއާ ރައްޓެހިވެ، ބޭވަފާތެރިވި ގޮތާ ބެހޭގޮތުންނެވެ.
މިއީ ޓްވެއިން އެކަނިމާއެކަނި ހުރިހާ ލަވަތަކެއް ލިޔެގެން ނެރުނު ފުރަތަމަ އަލްބަމެވެ.