26 ސެޕްޓެމްބަރ 2017 - 08:19
ރާއްޖޭގެ ފުޓްބޯޅަ ތާރީހުގައި ފުރަތަމަ ފަހަރަށް އޭޝިއަން ކަޕަށް ކޮލިފައިކޮށްދޭން ކުރަމުން އަންނަ އުއްމީދު ދޫކޮށްނުލާ ކަމަށް ގައުމީ ކޯޗު އޮސްޓްރޭލިއާގެ ޑަރެން ސްޓެވާޓް އިއްޔެ ބުނެފި އެވެ.
ކޮންމެ ގްރޫޕަކުން ދެ ޓީމު އޭޝިއަން ކަޕަށް ދާއިރު، ކޮލިފައިންގެ ގްރޫޕް ޑީގެ އެއް ވަނައިގައި މިހާރު އޮތީ ތިން މެޗުން ނުވަ ޕޮއިންޓާ އެކު ފަލަސްތީނެވެ. ދެ ވަނައިގައި އޮތް އޮމާނަށް ތިން މެޗުން ހަ ޕޮއިންޓް ލިބުނު އިރު ރާއްޖެއަށް ތިން މެޗުން ލިބުނީ ތިން ޕޮއިންޓެވެ. ބޫޓާނަށް އަދި ޕޮއިންޓެއް ނުލިބެ އެވެ.
އޮމާންގައި އެ ގައުމާ ދެކޮޅަށް ރާއްޖެ އެންމެ ފަހުން ކުޅުނު މެޗުން ތަފާތު ބޮޑުކޮށް، 5-0 އިން ބަލިވުމުން ގިނަ ބައެއްގެ ފާޑުކިޔުން ގައުމީ ޓީމަށް ވަނީ އަމާޒުވެފަ އެވެ. އެ ނަތީޖާއާ އެކު އޭޝިއަން ކަޕުން ރާއްޖެ އަށް ފުރުސަތު ލިބުމުގެ ދޮރު ގާތްގަނޑަކަށް ބަންދުވެފައިވާ ކަމަށް ވެސް ގިނަ ބަޔަކު ދެކެ އެވެ.
ކޮލިފައިންގައި ރާއްޖެ ދެން ކުޅޭ މެޗުގައި އަންނަ މަހު 10 ވަނަ ދުވަހު މާލޭގައި ނުކުންނާނީ އޮމާނާ ދެކޮޅަށެވެ.
ރާއްޖޭގެ ޓީމާ މެދު ބައެއް މީހުން އުއްމީދު ކަނޑާލިޔަސް ސްޓެވާޓް ބުނީ އޭނާ އަދިވެސް ހުރީ އޭޝިއަން ކަޕުގެ އުއްމީދުގައި ކަމަށެވެ.
"މިއީ އޭޝިއަން ކަޕްގެ އުއްމީދާ ގުޅިފައިވާ މެޗެއް. ޓީމުތަކުގެ ނަތީޖާތަކުގެ ސަބަބުން މީހުން މަލާމަތްކޮށް ހަދާފާނެ. އެކަމަކު ބޭނުންވާ ޓާގެޓަށް ނުދަނީސް އަހަރެން މިހުރީ ދޫދޭ ގޮތަކަށެއް ނޫން،" އޭނާ ބުންޏެވެ.
ސްޓެވާތް ބުނީ ކުރިއަށް އޮތް ތިން މެޗުގެ ތެރެއިން އޮމާނާއި ފަލަސްތީނުގެ މެޗު ވަރަށް އުނދަގޫވާނެ ކަމަށެވެ. އޭގެ ތެރެއިން އޮމާންގެ އިތުރުން ބޫޓާނާ ދެކޮޅަށް ކުޅޭ މެޗު ވެސް އޮންނާނީ ރާއްޖޭގަ އެވެ. ރާއްޖެ އިން ބޭރުގައި ވާދަކުރާނީ ފަލަސްތީނާ އެވެ.
"މެތަމެޓިކަލީ އަހަރެމެންނަށް އެއްކޮށް ފުރުސަތު ނުގެއްލެނީސް އަހަރެން ހުންނާނީ ޕޮޒިޓިވްކޮށް. އެއީ ކޮލިފައިވުމުގައި އަހަރެމެންނަށް ޕްރެޝަރެއް ނެތް،" ގައުމީ ޓީމު ޕްރެކްޓިސް ފެށުމުގެ ކުރިން ނޫސްވެރިންގެ ސުވާލުތަކަށް ޖަވާބު ދެމުން ސްޓެވާޓް ބުންޏެވެ.
އޭނާ ބުނީ ރަނގަޅު ކުރަން ޖެހޭ ވަރަށް ގިނަ ކަންކަން ގައުމީ ޓީމުގައި އެބަ ހުރި ކަމަށެވެ. އެއީ އޭނާގެ ބޮލުގައި އެޅިފައި އޮތް ޒިންމާއަކަށް ވާތީ އެކަން ކުރާނެ ކަމަށް ވެސް ބުންޏެވެ.
"އޮމާނާ ދެކޮޅަށް އެންމެ ފަހުން ކުޅުނު މެޗަށް ބަލާއިރު ވަރަށް ބޮޑަށް ރަނގަޅު ކުރަން ޖެހިފައި މިއޮތީ. ރަނގަޅު ނުކޮށްފިއްޔާ އަހަރެމެންނަށް އަނެއްކާ ބޮޑު ބައްޔެއް ތަކުރާވާތަން ފެންނާނީ،" ސްޓެވާޓް ބުންޏެވެ.
"ބައެއް ފަހަރު ފުޓްބޯޅައިގައި އެބަ ޖެހޭ އިދިކޮޅު ޓީމު މާ މޮޅުވިއްޔާ އެކަން ގަބޫލުކުރަން. އެ ދުވަހު އޮމާން މޮޅުވިޔަސް އަމިއްލަ ދަނޑުގައި އެކަން ބަދަލުކުރެވޭނެ."
ގައުމީ ޓީމު ޕްރެކްޓިސް ފެށިއިރު ޓީމުގެ ކެޕްޓަން އަލީ އަޝްފާގު (ދަގަނޑޭ) އިއްޔެ ބައިވެރިއެއް ނުވެ އެވެ. ސްޓެވާޓް ބުނީ ތަފާތު ސަބަބުތަކާ ހެދި ދަގަނޑޭ އަށް ވަގުތުކޮޅެއް ދީފައިވާ ކަމަށެވެ.
"އާއިލާއާ އެކު ވަގުތު ހޭދަކޮށްލަން އަޝްފާގަށް އަހަރެން ވަގުތުކޮޅެއް ދިނީ. އެއީ އޭނާ އަންނަނީ އާއިލާއާ ދުރުގައި ޓީމަށް (ނިއު ރޭޑިއަންޓަށް) ކުޅެމުން އަނެއްކާ ގާތްގާތުގައި މެޗުތައް ކުޅެފައި ހުރުމުން ކުދިކުދި އަނިޔާގެ މައްސަަލަ ވެސް އެބަހުރި،" ސްޓެވާޓް ބުންޏެވެ.
"އެކަމަކު އެއީ ނުކުޅެވޭ ވަރުގެ އަނިޔާއެއް ނޫން. ރަށުން ބޭރުގައި އޮމާނާ ދެކޮޅަށް އަޝްފާގު ރަނގަޅު ކުޅުމެއް ދެއްކި. އޭގެ ބޭނުން ދެން ކުޅޭ މެޗުގައި ހިފޭނެ ގޮތެއް ހެދުމަކީ އަހަރެންގެ މަސައްކަތެއް."
އޮމާނާ ދެކޮޅަށް ގަލޮޅު ދަނޑުގައި ކުޅޭ މެޗަށް ސަޕޯޓަރުންގެ އެހީ ވަރަށް ބޮޑަށް ބޭނުން ކަމަށް ކޯޗު ބުންޏެވެ.
"ފުޓްބޯޅައިގައި ދަށް ނަތީޖާއަކަށް ފަހު އަލުން އެނބުރި އަންނައިރު ރަނގަޅު ގިނަ ކަންތައްތަކެއް ފެނޭ. އެކަމަކު މި ކަންތައްތައް ކުރެވޭނީ ސަޕޯޓަރުންގެ އެހީ ވެސް ލިބިގެން. މި ޓީމު ވެސް އެނބުރި އަންނާނީ ވަރުގަދަކޮށް،" އޭނާ ބުންޏެވެ.