24 ސެޕްޓެމްބަރ 2017 - 15:49
ފޮރިން މިނިސްޓްރީގެ ސްޓޭޓް މިނިސްޓަަރަކަށް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ކުރީގެ ގަވަރުނަރު ޑރ. ފަޒީލް ނަޖީބު އައްޔަން ކުރައްވައިފި އެވެ.
ރައީސް އޮފީހުން ބުނިގޮތުގައި ސްޓޭޓް މިނިސްޓަރަކަށް ފަޒީލް އައްޔަން ކުރެއްވީ މިދިޔަ ހަފުތާގެ ބުދަ ދުވަހު އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އެއްބަނޑު އެއްބަފާ ކޮއްކޮ ފަޒީލް ވަނީ ރާއްޖޭގެ ސެންޓްރަލް ބޭންކުގައި ފަސް އަހަރު ވަންދެން މަސައްކަތް ކުރައްވައިފަ އެވެ. އޭގެ ފަހުން އޭނާ މިހާތަނަށް ހުންނެވީ ގަތަރުގެ ބޭންކެއްގެ އިސް މަގާމެއްގަ އެވެ.
ފަޒީލް ވަނީ 1987-2004 ގެ ނިޔަލަށް ޓްރޭޑް މިނިސްޓްރީގެ އެކި ފެންވަރުގެ މަގާމުތައް ފުރުއްވައިފަ އެވެ. އެގޮތުން، ބޭރުގެ ވިޔަފާރިވެރިންގެ ކަންކަން ބެލެހެއްޓެވުމުގައި، އެ މިނިސްޓްރީގެ އިންވެސްޓްމަންޓާއި އިންޓަނޭޝަނަލް ކޯޕަރޭޝަން ބައިގައި ވަރަށް ގިނަ ދުވަހު ފަޒީލް މަސައްކަތް ކުރައްވާފައިވެ އެވެ. އޭގެ ތެރޭގައި ޓްރޭޑް މިނިސްޓްރީގެ އެސިސްޓެންޓް ޑިރެކްޓަރު ކަމާއި އިންވެސްޓްމަންޓްސްގެ މަގާމާއި ޑެޕިއުޓީ ޑިރެކްޓަރު ކަމާއި އިންޓަނޭޝަނަލް ކޯޕަރޭޝަންގެ މަގާމު އަދި ޑިރެކްޓަ އިންޓަނޭޝަނަލް ކޯޕަރޭޝަންގެ މަގާމު ހިމެނެ އެވެ.
އިކޮނޮމިކް މިނިސްޓްރީގެ ސްޓޭޓް މިނިސްޓަރު އަބްދުއްލަތީފް މުހައްމަދަކީ ވެސް މަސީހާއި ފަޒީލްގެ އެއްބަނޑު އެއްބަފާ ބޭބެ އެކެވެ.