24 ސެޕްޓެމްބަރ 2017 - 10:11
ޖިރޯނާ (ސެޕްޓެމްބަރު 24) – ސްޕެނިޝް ލީގުގައި ރޭ ޖިރޯނާ އަތުން ރަށުން ބޭރުގައި 3-0 އިން މޮޅުވެ ބާސެލޯނާ އިން އެ ޓީމުގެ ފޯމް ދަމަހައްޓައިފި އެވެ.
ކުޅުނު ހަ މެޗުން ވެސް މޮޅުވެ 18 ޕޮއިންޓާ އެކު ތާވަލުގެ އެއް ވަނައިގައި ބާސެލޯނާ އޮތްއިރު އެންމެ ގާތުގައި 14 ޕޮއިންޓާ އެކު އޮތީ އެތުލެޓިކޯ މެޑްރިޑެވެ. އެ ޓީމު ވަނީ ރޭ ސެވިއްޔާ އަތުން 2-0 އިން މޮޅުވެފަ އެވެ. ސެވިއްޔާ މިހާރު އޮތީ 13 ޕޮއިންޓާ އެކު ތިން ވަނައިގަ އެވެ. ރެއާލް މެޑްރިޑް ވަނީ ޑިޕޯޓިވޯ އަލަވެސް އަތުން އަތުން ރަށުން ބޭރުގައި 2-1 އިން މޮޅުވެ 11 ޕޮއިންޓާ އެކު ހަތަރު ވަނަ އަށް ޖެހިލައިފަ އެވެ.
ރޭގެ މެޗުގައި ބާސެލޯނާގެ ފުރަތަމަ ދެ ގޯލަކީ ޖިރޯނާގެ ކުޅުންތެރިން އަތުން ބައިކޮޅަށް ވަން ލަނޑުތަކެކެވެ. ފުރަތަމަ ލަނޑު 17 ވަނަ މިނެޓުގައި އަޑައޭ ބެނިޓޭޒް އަތުން ވަންއިރު ދެ ވަނަ ލަނޑު 48 ވަނަ މިނެޓުގައި ވަނީ ގޯކާ އިރައިޒޮޒް އަތުންނެވެ. ބާސެލޯނާގެ ތިން ވަނަ ލަނޑު 69 ވަނަ މިނެޓުގައި ކާމިޔާބުކޮށްދިނީ ލުއިސް ސުއަރޭޒެވެ.
އެންމެ ފަހުން ކުޅުނު މެޗުން ބަލިވެފައިވާ މެޑްރިޑުން ރޭ ރަށުން ބޭރުގައި އަލަވެސް އަތުން މޮޅުވިއިރު މެޑްރިޑުގެ ދެ ލަނޑު ވެސް ޖެހީ ޑެނީ ސަބާޔޮސް އެވެ. ފުރަތަމަ ލަނޑު އޭނާ 10 ވަނަ މިނެޓުގައި ޖަހާފައިވަނިކޮށް އަލަވެސްގެ މަނޫ ގާސިއާ ވަނީ 40 ވަނަ މިނެޓުގައި އެއްވަރުކޮށްފަ އެވެ. އޭގެ ތިން މިނެޓު ފަހުން ސަބާޔޮސް ވަނީ އަލުން ލީޑު ނަގައިދީފަ އެވެ.
އަމިއްލަ ދަނޑުގައި ސެވިއްޔާ އަތުން އެތުލެޓިކޯ މެޑްރިޑް މޮޅުވިއިރު ލަނޑުތައް ޖަހައިދިނީ ޔަނިޗް ކަރަސްކޯ އަދި އެންޓޮއިން ގްރިޒްމަން އެވެ.