24 ސެޕްޓެމްބަރ 2017 - 08:58
ރައްޔިތުންގެ މަޖިލީހުގެ ރިޔާސަތުގެ މޭޒު، 10 ފޫޓު އުހުގައި ބަހައްޓަން ސްޓޭޖެއް ހެދުމުގެ މަސައްކަތް ސިފައިން ކުރަމުން އަންނަ ކަމަށް އިދިކޮޅު ފަރާތްތަކުން ތުހުމަތުކޮށްފި އެވެ.
ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް ވިދާޅުވީ އެ ސްޓޭޖް ހަދަނީ މަޖިލިހުގައި ޖަވާބުދާރީވާން ވަޒީރުން ވަޑައިގެން ތިއްބަވާ ހާއްސަ ގޮނޑިތަކާ ހިސާބުން ފެށިގެން ކަމަށެވެ. އެ މަސައްކަތުގައި ސިފައިން އަވަދިނެތި މަޖިލީހުގެ ތެރޭގައި އުޅެމުން އަންނަ ކަމަށް ވެސް އޭނާ ވިދާޅުވި އެވެ.
ނަމަވެސް އެކަމާ ގުޅިގެން މަޖިލީހުގެ އިދާރާގެ ބަހެއް ލިބޭ ގޮތް ނުވި އެވެ.
މަހްލޫފް ވަނީ ސިފައިން ސްޓޭޖް މަސައްކަތް ކުރަމުން އަންނަ ކަމަށް ވިދާޅުވެ، ފޮޓޯއެއް ވެސް ޓުވިޓާގައި އާންމު ކުރައްވައިފަ އެވެ. އެ ޓުވީޓުގައި އޭނާ ވިދާޅުވީ ބިއްލޫރި ކޮށީގެ ބަދަލުގައި 10 ފޫޓު އުހުގައި މަސީހު އިންނަވާ ގޮތަށް ބޮޑު ސްޓޭޖެއް ޗެމްބަރު ތެރޭގައި ހަދަން ސިފައިން މަސައްކަތް ކުރަމުން އަންނަ ކަމަށެވެ.
އެ މަސައްކަތެއް ބައްލަވަން ރޭގެ ވަގުތެއްގައި މަހުލޫފް މަޖިލީހަށް ވސް ވަޑައިގެންނެވި އެވެ. ނަމަވެސް ސިފައިން ހުރަސް އެޅުމުން އެތަނަށް ނުވެންނެވުނު ކަމަށް އޭނާ ވިދާޅުވި އެވެ.
މަހްލޫފް ވިދާޅުވި ގޮތުގައި އެ ސްޓޭޖް ހަދައި، އެތަނުގައ ގޮނޑިކޮޅު ބެހެއްޓުމުން މަޖިލީހުގެ މެމްބަރުންނަށް މަސީހު އިންނަވާ މޭޒާ ކައިރިއެއް ނުވެވޭނެ އެވެ. އަދި މަސީހު ޗެމްބަރަށް ވަދެނުކުންނަވާ ދޮރު ކައިރީ ސިޑިއެއް ވެސް ހަދާފާނެ ކަމަށް އޭނާ ވިދާޅުވި އެވެ.
އާންމު ގޮތެއްގައި މަސީހު މަޖިލީހަށް ވަންނަވައި، އަދި ނިކުންނަވައި ހައްދަވަނީ މޭޒު ކައިރީގައި ހުންނަ ދޮރުންނެވެ. އެކަމަކު އެއީ މެމްބަރުން ބޭނުން ކުރައްވާ ދޮރެއް ނޫނެވެ.
"ބެލެވޭ ގޮތުގައި މެމްބަރުންނަށް ދެން މަސީހު އިންނަވާ މޭޒާ ކައިރިއެއް ނުވެވޭނެ. ވަޒީރުން ތިއްބަވާ ގޮނޑިކޮޅުތައް ހުރި ހިސާބު ހަ ފޫޓަށް އުސްކޮށްފައި، މަޖިލީހުގެ ރިޔާސަތު ހިމެނޭ ސަރަހައްދު 10 ފޫޓަށް އުސްކުރަން ނިންމާފައިވާ ކަމުގެ މައުލޫމާތު ލިބެނީ،" މަހްލޫފް ވިދާޅުވި އެވެ.
އޭނާ ވިދާޅުވީ މަސީހަކީ މަޖިލީހުގެ މިހާރުގެ ރައީސް ކަމަށް ގަބޫލުނުކުރައްވާ ކަމަށާއި އެމަނިކުފާނުގެ އިތުބާރު ނެތް ކަމަށް 45 މެމްބަރުން ސޮއިކުރެއްވުމާ އެކު، މަގާމުން ވަކިވެފައިވާ ކަމަށެވެ. އެހެންވެ، ޗެމްބަރަށް ބޮޑެތި ބަދަލުތަކެއް ގެންނަނީ ގަދަބާރުން އެ ގޮނޑީގައި އެމަނިކުފާނު އިންނަވަން ކަމަށް މަހްލޫފް ވިދާޅުވި އެވެ.
މަހުލޫފް ވިދާޅުވި ގޮތުގައި މިއީ ދުނިޔޭގެ އެއްވެސް ތަނެއްގައި ކަންކަން ކުރާ ގޮތެއް ނޫނެވެ. އެހެންކަމުން ރާއްޖެ އިން މި ފެންނަނީ ވަރަށް ހަޑި ހުތުރު މަންޒަރެއް ކަމަށް ވިދާޅުވި އެވެ.
ޖުލައި 31 އިން ފެށިގެން ބޭއްވި ހުރިހާ ޖަލްސާތަކެއް މަސީހު ރިޔާސަތުގައި އިންނަވައިގެން ކުރިއަށް ގެންގޮސްފައިވަނީ ސިފައިންގެ އެހީތެރިކަމާ އެކުގަ އެވެ. އިދިކޮޅު ފަރާތްތަކުން ތަކުރާރުކޮށް ބުނަމުން އަންނަނީ މަސީހު ރިޔާސަތުގައި އިންނެވިހާ ހިނދަކު، ޖަލްސާތައް ކުރިއަށް ނުގެންދެވޭނެ ކަމަށެވެ.
ރައްޔިތުންގެ މަޖިލިސް ޗުއްޓީގައި އޮތްއިރު، ދެން ޖަލްސާތައް ފަށާނީ އަންނަ މަހު އެވެ.