22 ސެޕްޓެމްބަރ 2017 - 06:29
މި ހަފުތާގެ ހުކުރު ދުވަހު ތިން ފިލްމެއް ރިލީޒްކުރާނެ އެވެ. އެއީ ނިއުޓަން އާއި ހަސީނާ އަދި ބޫމީ އެވެ. މިއީ ބެލުންތެރިންނަށް ވަރަށް ތަފާތު ތަޖުރިބާތަކެއް ކުރެވޭނެ ފިލްމު ތަކެކެވެ. މި ތިން ފިލްމު ވެސް ތަފާތެވެ.
ފުރަތަމަ ފިލްމު "ނިއުޓަން" އަކީ ރާޖްކުމާރު ރާއޯގެ ފިލްމެކެވެ. އޭނާ އަކީ މި ސީޒަންގައި އެންމެ ހިނގާ އެކްޓަރެވެ. މޮޅު ފިލްމެއް ބަލާލަން ބޭނުން މީހުން ރާޖްކުމާރުގެ ފިލްމުތައް ބެލުމަށްް ޝައުގުވެރިވެ އެވެ. ސަބަބަކީ އޭނާގެ ހުނަރުގެ ސަބަބުން ވަރަށް އާދައިގެ ފިލްމެއް ވެސް މޮޅު ފިލްމަކަށް ހަދާލުމުގެ ކުޅަދާނަކަން ލިބިފައިވާތީ އެވެ. އަދި ރަނގަޅު ޕާފޯމަންސެއް ރާޖްކުމާރުގެ ފަރާތުން ފެންނާނެ ކަމުގެ ގެރެންޓީ ބެލުންތެރިންނަށް އޮވެ އެވެ. ދާދިފަހުން ރިލީޒްވި "ބަރީލޭ ކީ ބަރްފީ" އިން ވެސް ރާޖްކުމާރު ވަނީ އޭނާއަކީ ހަނދާން ނައްތާލަން ފަސޭހަ އެކްޓަރެއް ނޫން ކަން ސާބިތު ކޮށްދީފަ އެވެ.
އެހެންކަމުން ރާޖްކުމާރުގެ "ނިއުޓަން" ބެލުމަށް ޝައުގުވެރިވާ މީހުން ވެސް ބައިވަރެވެ. މި ފިލްމުގައި ދައްކަނީ އިންތިޚާބާއި އެކަމާ ގުޅިގެން އުފެދޭ މައްސަލަތަކެވެ. ފިލްމުގެ ފުރަތަމަ ޓްރެއިލާއާ އެކު ވެސް ގިނަ ބަޔަކު ތިބީ ފިލްމު ބަލާ ހިތުންނެވެ.
ދެ ވަނަ ފިލްމު "ހަސީނާ ޕާކާ" އަކީ ޝްރައްދާ ކަޕޫރު ލީޑް ރޯލު ކުޅެފައިވާ ފިލްމެކެވެ. މި ފިލްމުގައި ޝްރައްދާ ފެންނާނީ ކުރިން ނުފެންނަ ކަހަލަ ރޯލަކުންނެވެ. އުމުރުން 45 އަހަރުވީ މީހެއްގެ ގޮތުގައި ވެސް މި ފިލްމުން ޝްރައްދާ ފެންނާނެ އެވެ. މި ފިލްމުގެ ބަތަލަކީ ވެސް އަދި ބަތަލާ އަކީ ވެސް ޝްރައްދާއަށް ވާތީ ފިލްމު ކާމިޔާބުވުން އޭނާއަށް ވަރަށް މުހިއްމެވެ. ސަބަބަކީ އިންޑަސްޓްރީގައި ވިކޭ ބަތަލާއަކަށް އޭނާއަށް ވެވޭނީ އޭރުން ކަމަށް ވާތީ އެވެ.
"ބޫމީ" އަކީ ސަންޖޭ ދަތު އެނބުރި އައުން ފާހަގަކުރާ ފިލްމެވެ. މި ފިލްމުގައި ސަންޖޭ ދަތުގެ ދަރިފުޅުގެ ރޯލު ކުޅެފައިވަނީ އަދިތީ ރާއޯ ހައިދްރީ އެވެ. މިއީ ދަރިފުޅު ރޭޕްކުރި މީހުންގެ ކިބައިން ބަދަލުހިފަން ބައްޕައަށް ކުރާ މަސައްކަތް ދައްކުވައިދޭ ފިލްމެކެވެ.