18 ސެޕްޓެމްބަރ 2017 - 12:18
ލީވާޑް އައިލެންޑްސް (ސެޕްޓެމްބަރު 18) - ހަރިކޭން މާރިއާގެ ބާރުގަދަވެ ކެރީބިއަންގެ ލީވާޑް އައިލެންޑްސްއާ ދިމާލަށް މިސްރާބު ޖަހާފައިވާ ކަމަށް އޮފިޝަލުން ބުނެފި އެވެ.
އެމެރިކާގެ ހަރިކޭން ސެންޓަރުން ބުނީ ކެޓަގަރީ 1 ގައި ހުރި ތޫފާން ކުރިއަށް އޮތް 48 ގަޑިއިރު ތެރޭ ބާރުގަދަވެ ކެރީބިއަންގެ ޖަޒީރާތަކާ ގާތްވަމުންދާނެ ކަމަށެވެ. ތޫފާންގެ އިންޒާރު ވަނީ ގުއަޑެލޫޕް، ޑޮމިނިކާ، ކިޓްސް އެންޑް ނެވިސް، މޮންޓްސެރާތު އަދި މާޓިނީކް އަށް ނެރެފަ އެވެ. ތޫފާން މާރިއާ ވެސް ދަތުރު ކުރަމުން ދަނީ ދާދި ފަހުން ކެރީބިއަން އަށް އެރި އިރްމާ ތޫފާނާ އެއް މިސްރާބަކުންނެވެ. ތޫފާން އަރައިފާނެކަމުގެ އިންޒާރު ވަނީ ބްރިޓިޝް ވާޖިން އައިލެންޑްސްގައި ވެސް ނެރެފަ އެވެ. މި ޖަޒީރާތަކަށް ވަނީ ތޫފާން އިރްމާގައި ވެސް ބޮޑެތި ގެއްލުންތަކެއް ލިބިފަ އެވެ. ކެޓަރީ ފަހެއްގެ ތޫފާން އިރްމާގައި ކެރީބިއަން އިން 37 މީހުން މަރުވެ އެތައް ބިލިއަން ޑޮލަރުގެ ގެއްލުން ލިބިފައިވެ އެވެ.
ނޭޝަނަލް ހަރިކޭން ސެންޓަރުން ބުނީ ތޫފާން މާރިއާ ހުރީ ބާބަޑޮސްގެ އިރުން 140 މޭލު ދުރުގައި ކަމަށާއި އެ ތޫފާން ދަނީ ހުޅަނގު އުތުރުން ގަޑިއަކު 13 މޭލުގެ ބާރު މިނުގައި ދަތުރު ކުރަމުން ކަމަށެވެ. އެހެންވެ ހޯމަ ދުވަހުގެ ކޮންމެވެސް ވަގުތެއްގައި އެ ތޫފާން ލީވާޑް އައިލެންޑްސް އަށް އަރާނެ ކަމަށް ލަފާކޮށްފައިވެ އެވެ. ދެ ވަނަ ތޫފާން ހޯސޭގެ ބާރު ވެސް ދަނީ އެޓްލާންޓިކްގައި ގަދަވަމުންނެވެ.
ތޫފާން އިރްމާ އެމެރިކާ އަށް އަރާ 11 މީހުން ވަނީ މަރުވެފަ އެވެ. ފްލޮރިޑާ، ޖޯޖިއާ، ނޯތު ކެރޮލީނާ، ސައުތު ކޮރޮލީނާ އަދި އަލަބާމާ އިން 6.9 މިލިއަން ގެއިން ވަނީ ކަރަންޓް ކެނޑިފަ އެވެ.