18 ސެޕްޓެމްބަރ 2017 - 10:24
ލާހޯރު (ސެޕްޓެމްބަރު 18) - ޕާކިސްތާނުގެ ޕާލަމެންޓުގެ މެންބަރެއްގެ ގޮތުގައި ހުންނެވުމުގެ ޝަރުތު ނަވާޒް ޝަރީފުގެ ކިބައިގައި ނެތް ކަމަށް ސުޕްރީމް ކޯޓުން ޖުލައި މަހު ކަނޑައެޅުމާ ގުޅިގެން އެމަނިކުފާނަށް ގެއްލުނު ޕާލަމެންޓުގެ ގޮނޑި އަށް އަނބިކަނބަލުން ކުލްސުމް ނަވާޒް ވާދަކުރައްވާ ކާމިޔާބު ކުރައްވައިފި ކަމަށް ނުރަސްމީ ނަތީޖާތަކުން ދައްކައިފި އެވެ.
މީޑިއާތަކުން ބުނި ގޮތުގައި ކުލްސުލް އިންތިޚާބު ކާމިޔާބު ކުރައްވާފައި ވަނީ 61،254 ވޯޓުންނެވެ. މިއީ އެންމެ ގާތުން ވާދަކުރި ކެންޑިޑޭޓަށް ވުރެ 14،188 ވޯޓު އިތުރު އަދަދެކެވެ.
ލާހޯރުގެ ގޮނޑި ކާމިޔާބު ކުރުމަކީ ނަވާޒް ޝަރީފުގެ ޕީއެމްއެލް-އެން އަށް ކުރިމަތިވި ބޮޑު ގޮންޖެހުމެކެވެ. ކޮރަޕްޝަނާ އިދިކޮޅު ސްލޯގަނުގެ ދަށުން އިދިކޮޅު ޕާޓީތަކުން ކެމްޕޭން ކުރަމުން ދިޔަ އިރު ޕީއެމްއެލް-އެލް އަށް ކެންޕޭން ކުރަން ޖެހުނީ ކެންޑިޑޭޓާ ނުލަ އެވެ. ކެމްޕޭން ކުރިއަށް ދިޔަ އިރު ކުލްސުމް ގެންދެވީ ކެންސަރަށް އިނގިރޭސި ވިލާތުގައި ފަރުވާ ހޯއްދަވަމުންނެވެ. ކެމްޕޭނުގައި އިސްކޮށް އުޅުއްވީ ދަރިކަނބަލުން މަރިޔަމް އެވެ. އެކަމަނާ ވަނީ މިއީ ސުޕްރީމް ކޯޓުގެ ނިންމުމަށް ފަހު ރައްޔިތުންގެ ހުކުމް އިއްވާ އިންތިޚާބު ކަމަށް ވިދާޅުވެފަ އެވެ.
"މިއީ އާދައިގެ ކާމިޔާބީއެއް ނޫން. ތިޔަ ބޭފުޅުން ތި ބަލިކުރެއްވީ ދަނޑުމަތީގައި ތިބި މީހުން އެކަންޏެއް ނޫން. ނުފެންނަ މީހުން ވެސް ތިޔަ ވަނީ ބަލި ކުރައްވާފައި،" ވަގުތީ ނަތީޖާ އަށް ފަހު ސަޕޯޓަރުންނާ ބައްދަލު ކުރައްވާ މަރިޔަމް ވިދާޅުވި އެވެ.
ސިޔާސީ އެއްވެސް މަގާމެއް އަދާނުކުރައްވާ މަރިޔަމް ވިދާޅުވީ ލާހޯރުގައި ބައްޕާފުޅު ފުރުއްވަމުން ގެންދެވި ގޮނޑި މަންމާފުޅު ކާމިޔާބު ކުރެއްވުމަކީ ބޮޑު ވަޒީރުގެ މަގާމުން ނަވާޒް ޝަރީފް ދުރުކުރުމަށް ކުރި "ނާއިންސާފު ހުކުމް" ރައްޔިތުން ގަބޫލް ނުކުރާކަން ކަމަށެވެ.
ނަވާޒް ޝަރީފު މަގާމުގައި ހުންނެވުމުގެ ޝަރުތު ފުރިހަމަ ނުވާ ކަމަށް ޖުލައި މަހު 28 ވަނަ ދުވަހު ސުޕްރީމް ކޯޓުން ކަނޑައެޅީ ޕެނަމާ ޕޭޕާސް އިން ލީކުކޮށްލި އެމަނިކުފާނުގެ އާއިލާގެ ކޮރަޕްޝަނުގެ މައްސަލަތަކާ ގުޅިގެންނެވެ.
އިންތިޚާބުގައި ބޮޑެތި ހުރިހާ ޕާޓީތަކުން ވާދަކުރި އެވެ. ޕީއެމްއެލް-އެންއާ އެންމެ ބޮޑަށް ވާދަކޮށްފައި ވަނީ ކުރީގެ މަޝްހޫރު ކްރިކެޓް ކުޅުންތެރިޔާ އިމްރާން ޚާންގެ ޕީޓީއައި އާއި ކުރީގެ ބޮޑު ވަޒީރު ބޭނަޒީރު ބުއްޓޫގެ ދަރިކަލުން ބިލާވާލް ބުއްޓޫ ޒަރުދާރީގެ ޕާކިސްތާން ޕީޕަލްސް ޕާޓީ އެވެ.
ޕާކިސްތާނުގެ ތާރީޚުގައި ވެސް ފުރަތަމަ ފަހަރަށް ބަޔޮމެޓްރިކް ވޯޓާ ވެރިފިކޭޝަން މެޝިން ބޭނުންކޮށްގެން ބޭއްވި އިންތިޚާބުގައި 320،000 މީހުން ވޯޓުލި އެވެ.