17 ސެޕްޓެމްބަރ 2017 - 14:54
ޔުނައިޓެޑް ނޭޝަންސް (ސެޕްޓެމްބަރު 17) - މިއަންމާ ސިފައިން ރަކީން ސްޓޭޓުގައި މުސްލިމުންނާ ދެކޮޅަށް ހިންގާ އަނިޔާވެރިކަން ހުއްޓުވަން އެ ގައުމުގެ ލީޑަރު އަން ސަން ސޫކީ އަށް "ފަހު ފުރުސަތު" އެބައޮތް ކަމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވެއްޖެ އެވެ.
ބީބީސީގެ ހާޑް ޓޯކް ޕްރޮގްރާމްގައި ވާހަކަ ދައްކަވަމުން ގުޓަރޭޒް ވިދާޅުވީ ސޫކީ ވަގުތުން ފިޔަވަޅު ނާޅުއްވައިފި ނަމަ ހާލަތު ވަރަށް ނުރައްކާވާނެ ކަމަށެވެ. އަދި އެ ހަމަނުޖެހުންތަކަކީ ނަސްލެއް ނައްތާލުމުގެ ދަރަޖަ އަށް ބަދަލުވެދާނެ ކަމެއް ކަމަށް އދ. އިން ވަނީ އިންޒާރު ދީފަ އެވެ.
ގުޓަރޭޒް މި މޭރުމުން ވާހަކަ ދެއްކެވި އިރު ރަކީން ސްޓޭޓުގައި ސިފައިން ހިންގާ އޮޕަރޭޝަނާ ގުޅޭ ގޮތުން މި ހަފުތާގައި ގައުމާ މުޚާތަބް ކުރައްވާ ސޫކީ ވާހަކަ ދައްކަވާނެ އެވެ. ގުޓަރޭޒް ވިދާޅުވީ ސޫކީގެ ތަގްރީރުގެ ކުރިން ހަމަނުޖެހުން ހުއްޓާލުމަށް އެކަމަނާ އަށް ފަހު ފުރުސަތު އެބައޮތް ކަމަށެވެ.
"އެކަމަނާގެ ތަގްރީރުގައި ހަމަނުޖެހުންތައް ހުއްޓާލާނެކަން އިއުލާން ނުކޮށްފި ނަމަ، ދެން ހާލަތު ވަރަށް ބޮޑަށް ނުރައްކާވެގެން ދާނެ. ރޮހިންޖާ މީހުން އެނބުރި އައުމުގެ ފުރުސަތު ދޭން ޖެހޭނެ،" އދ.ގެ ޖެނެރަލް އެސެމްބްލީގެ ބައްދަލުވުމުގެ ކުރިން ގުޓަރޭޒް ވިދާޅުވި އެވެ.
މުސްލިމުންނަށް ކުރާ އަނިޔާތަކާ ގުޅިގެން ފާޑިކިޔުންތައް އަމާޒުވާން ފެށުމުން ސޫކީ ވަނީ އދ.ގެ ޖެނެރަލް އެެސެމްބްލީ އަށް ވަޑައިނުގަންނަވަން ނިންމަވައިފަ އެވެ. އެކަމަނާ ވިދާޅުވެފައި ވަނީ ރަކީންގައި މިއަންމާ ސިފައިން މުސްލިމުން ހިމާޔަތް ކުރާ ކަމަށާއި ހާލަތު ގޯސް ކަމަށް ދައްކަނީ ފޭކް ޚަބަރުތަކުގެ ސަބަބުން ކަމަށެވެ.
މިއަންމާގެ ހަމަނުޖެހުންތަކުގެ ސަބަބުން ބަންގްލަދޭޝް އަށް އެތެރެވި ރެފިއުޖީންގެ އަދަދު ވަނީ ހަތަރު ލައްކަ އަށް އަރައިފަ އެވެ. ރެފިއުޖީންނަށް ކަނޑައަޅާފައިވާ ސަރަހައްދުތަކުން ބޭރަށް ނުދިއުމަށް ބަންގްލަދޭޝް އިން މިހާރު ވަނީ އަންގައިފަ އެވެ. އަދި މިއަންމާ ރެފިއުޖީންނަށް 14،000 ފޭލިގެ ހަދައިދިނުމަށް ވެސް ބަންގްލަދޭޝް ސަރުކާރުން ވަނީ ނިންމައިފަ އެވެ.