15 ސެޕްޓެމްބަރ 2017 - 12:06
މެންޗެސްޓާ (ސެޕްޓެމްބަރު 15) - ބާސެލޯނާ އަށް ކުޅޭ ތަޖުރިބާކާރު މިޑްފީލްޑަރު އަންދްރެސް އިނިއެސްޓާ މެންޗެސްޓާ ސިޓީ އަށް ގެންނަން އެ ޓީމުގެ ކޯޗު ޕެޕް ގާޑިއޯލާ ބޭނުންވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 33 އަހަރުގެ އިނިއެސްޓާ ވަނީ 2008 އިން 2012 ވަނަ އަހަރު ގާޑިއޯލާގެ އިރުޝާދުގެ ދަށުން މޮޅު ކުޅުމެއް ދައްކައިފަ އެވެ. އަދި އެ މުއްދަތުގެ ތެރޭގައި ބާސެލޯނާ އިން ހޯދި ހުރިހާ ކާމިޔާބީއެއްގައި އިނިއެސްޓާގެ ދައުރު ބޮޑެވެ.
އަންނަ އަހަރުގެ ޖޫން މަހަށް އިނިއެސްޓާ ބާސެލޯނާއާ އެކު ހަދާފައިވާ އެއްބަސްވުމުގެ މުއްދަތު ހަމަވާއިރު، މިހާތަނަށް އިނިއެސްޓާގެ އެއްބަސްވުމާ ގުޅޭގޮތުން އެއްވެސް މަޝްވަރާއެއް ކުރެވިފައިނުވާ ކަމަށް އޭނާއާ ހަވާލާދީ ރިޕޯޓްތައް ބުނެ އެވެ.
ސްކައިސްޕޯޓްސްގެ ސްޕެއިނު ފުޓްބޯޅައިގެ ތަޖުރިބާކާރު ގުއިލެމް ބަލަގޫ ދާދި ފަހުން ބުނީ އިނިއެސްޓާ އިނގިރޭސި ޕްރިމިއާ ލީގުގައި ކުޅެން ބޭނުންވާނަމަ ގާޑިއޯލާ އޭނާ އަށް އެ ފުރުސަދު ދޭން ތައްޔާރަށް ހުރި ކަމަށާއި ސިޓީން އަންނަ އަހަރު ވެސް އޭނާ އަށް ދެ އަހަރުގެ އެއްބަސްވުމެއް ހުށަހަޅަން ތައްޔާރަށް އޮތް ކަމަށެވެ.
އިޓަލީގެ މީޑިއާތަކުން ރިޕޯޓްކުރާ ގޮތުގައި އިނިއެސްޓާ ހޯދުމަށް ޔުވެންޓަސް އިން ވެސް އަންނަނީ މަސައްކަތް ކުރަމުންނެވެ. އަދި ޔުވެންޓަސްގެ ބައެއް އޮފިޝަލުން ދާދި ފަހުން އިނިއެސްޓާއާ މަޝްވަރާ ބައްދަލުވުންތަކެއް ވެސް ބާއްވާފައިވާ ކަމަށް ވެސް ރިޕޯޓްކޮށްފައިވެ އެވެ.
ސްޕެއިނުގެ މީޑިއާތަކުން ރިޕޯޓްކުރާ ގޮތުގައި އިނިއެސްޓާގެ އެއްބަސްވުމުގެ ކަންތައްތައް އެ ކްލަބްގެ ވެރިން އެ ޓީމުގެ ސަޕޯޓަރުންނަށް އޮޅުވާލަމުންދާތީ އެ ޓީމުގެ ބައެއް ސީނިއާ ކުޅުންތެރިން ވަނީ ކްލަބްގެ ހިންގާ ބޯޑަށް ނުރުހުންފާޅުކޮށްފަ އެވެ.