14 ސެޕްޓެމްބަރ 2017 - 20:40
ގދ. ގައްދު އާއި ހޯނޑެއްދު އާއި ގއ. ވިލިނގިލި އަދި ހއ. ދިއްދޫގައި އިމާރާތްކުރި ފްލެޓްތަކަށް ޝަރުތު ހަމަވާ މީހުންގެ ލިސްޓު ހައުސިން މިނިސްޓްރީން މިއަދު އިއުލާންކޮށްފި އެވެ.
މި ހަތަރު ރަށުން ފްލެޓަށް ހޮވުނު މީހުންގެ ލިސްޓު ގެޒެޓްކޮށް، ޝަކުވާ ހުށަހެޅުމުގެ ފުރުސަތު ވަނީ ހުޅުވާލައިފަ އެވެ. ވަގުތީ ލިސްޓާ މެދު އެއްވެސް ޝަކުވާއެއް އޮތް ނަމަ މި މަހުގެ 24 ގެ ކުރިން ހުށަހަޅަން ހައުސިން މިނިސްޓްރީން އެދެ އެވެ.
ލިސްޓުގައިވާ ގޮތުން ގައްދޫގައި އިމާރާތްކުރި ފްލެޓްތަކަށް 40 މީހުން، އަދި ހޯނޑެއްދޫ ފްލެޓްތަކަށް ވެސް 40 މީހަކު ޝަރުތުހަމަވެފައިވެ އެވެ. ވިލިނގިލިން 42 މީހަކަށް ފްލެޓް ލިބޭއިރު، ދިއްދޫން ދޫކުރާ ފްލެޓަށް 138 މީހަކު ޝަރުތު ހަމަވެފައިވާ ކަމަށް ހައުސިން މިނިސްޓްރީން ބުންޏެވެ.
މި ހަތަރު ރަށުން ފްލެޓް ލިބުނު މީހުންގެ ވެސް ލިސްޓު އާއްމުކޮށްފައި ވަނީ ފޯމު ނަމްބަރު އެކަނި ހިމަނައިގެންނެވެ. ފްލެޓް ލިބުނު މީހުންނާއި ގޭގެ ނަމެއް ހިމަނާފައެއް ނުވެ އެވެ.
ގެދޮރުވެރިކަމުގެ މަޝްރޫއުގައި ހުޅުމާލެ އިން ދޫކުރި ފްލެޓްތަކަށް ޝަރުތު ހަމަވި 661 މީހުންގެ ނަން ސިއްރުކޮށް، ހަމައެކަނި ފޯމު ނަމްބަރު އާއްމުކުރި މައްސަލާގައި މިނިސްޓްރީ އަށް ވަނީ ފާޑުކިއުން އަމާޒުވެފަ އެވެ. މިއީ، ފްލެޓަށް ކުރިމަތިލީ އެތައް ބައެއްގެ ހައްގު ގެއްލިގެންދާ ކަމެއް ކަމަށް ބުނެ ދެފުށްފެންނަ އިންސާފުވެރި އުސޫލަކުން ފްލެޓް ދޫކުރުމަށް ސަރުކާރަށް ދަނީ ގޮވާލަމުންނެވެ.