03 ސެޕްޓެމްބަރ 2017 - 19:58
މިއަންމާގެ ރޮހިންޖާގެ މުސްލިމުންނާ މެދު އެ ގައުމުގެ ސަރުކާރުން ހިންގާ ލާއިންސާނީ އަމަލުތަކާ ގުޅިގެން، ރާއްޖެ އާއި އެ ގައުމާ ދެމެދު އޮންނަ ވިޔަފާރީގެ ގުޅުން ކަނޑާލުމަށް ދިވެހި ސަރުކާރުން މިއަދު ނިންމައިފި އެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ ރޮހިންޖާގެ މުސްލިމުންނާ ދެކޮޅަށް ހިންގާ އިންސާނިއްޔަތާ ޚިލާފު އަމަލުތައް ކުށްވެރިކުރާ ކަމަށެވެ. އެ މިނިސްޓްރީން ބުނިގޮތުގައި ރާއްޖެ އާއި މިއަންމާއާ ދެމެދު އޮތް ވިޔަފާރީގެ ގުޅުން ކަނޑާލީ، މުސްލިމުންނާ ދެކޮޅު ހަރަކާތްތައް ހުއްޓުވުމަށް އެ ގައުމުގެ ސަރުކާރުން ފިޔަވަޅު އެޅުމާ ހަމައަށެވެ.
ރާއްޖެ އިން ވަނީ ރޮހިންޖާގައި އިންސާނީ ހައްގުތަކަށް އަރައިގަންނަ މައްސަލަ ބެލުމަށް އދ. ގެ ސެކްރެޓަރީ ޖެނެރަލަށާއި ހިއުމަން ރައިޓްސް ކައުންސިލަށް ވެސް ގޮވާލައިފަ އެވެ.
ރޮހިންޖާގައި ހަމަނުޖެހުން އުފެދުނީ ރޮހިންޖާގެ ބަޔަކު މިދިޔަ މަހުގެ 25 ގައި އަސްކަރީ ޕޯސްޓަކަށް ދިން ހަމަލާއާ ގުޅިގެންނެެ. އޭގެ ބަދަލުގައި ސިފައިން ދޭން ފެށި ހަމަލާތަކުގައި އެތައް ބަޔަކު ވަނީ މަރުވެފަ އެވެ. އަދި މި ހަމަނުޖެހުންތަކާ ގުޅިގެން އާއްމުންގެ އެތައް ބަޔަކު ދަނީ ރަކީން ސްޓޭޓް ދޫކޮށް ބަންގްލަދޭޝްގެ ބޯޑަރު ކައިރިއަށް ޖަމާވަމުންނެވެ.
މިއަންމާ ސިފައިންގެ އަނިޔާވެރިކަން ހައްދުފަހަނަޅައި ދިއުމުން އެ ގައުމުގައި މުސްލިމުން ދިރިއުޅޭ ރަކީން ސްޓޭޓުން ފިލަންދާ ރެފިއުޖީންގެ އަދަދު 40،000 އަށް ވުރެ މައްޗަށް އަރާފައިވާ ކަމަށް އދ. އިން ވަނީ ބުނެފަ އެވެ.