05 ސެޕްޓެމްބަރ 2017 - 06:31
ސިލްވެސްޓާ ސްޓެލޯން އާއި މައިކަލް ބީ ޖޯޑަންގެ 2015 ގެ ސްޕޯޓްސް ޑްރާމާ "ކްރީޑް" ގެ ދެވަނަ ބައެއް ހަދަން ނިންމައިފި އެވެ.
ސްޓެލޯން ވަނީ އިސްޓަގްރާމްގައި އެކަން ކަށަވަރުކޮށްދީފަ އެވެ. އޭނާ އާއި ޖޯޑަން ހިމެނޭ ބޮކްސިން ފިލްމްގެ މަންޒަރެއްގެ ފޮޓޯއާ އެކު ސްޓެލޯން ބުނީ "ކްރީޑް" ވަރުގަދަވާން އަދި އޮތީ ކަމަށާއި މީގެ ދެވަނަ ބައި އަންނަ އަހަރަށް އޮތީ ރާވައިފައި ކަމަށެވެ.
"ކްރީޑް" އުފެއްދި އެމްޖީއެމްގެ ތަރުޖަމާނާ ހަވާލާދީ ވެރައިޓީން ބުނީ "ކްރީޑް 2" މިހާރު އޮތީ ސްކްރިޕްޓިން މަރުހަލާގައި ކަމަށެވެ. އެހެންވެ ފިލްމާ ބެހޭ އިތުރު އެއްވެސް ތަފުސީލެއް އޭނާ ނުދެ އެވެ.
ޖުމްލަ 40 މިލިއަން ޑޮލަރުގެ ބަޖެޓަކުން އުފެއްދި "ކްރީޑް" ޑައިރެކްޓްކޮށްފައި ވަނީ ރަޔަން ކޫގްލާ އެވެ. މީގެ ސްކްރީންޕްލޭ ލިޔެފައި ވަނީ އޭނާ އާއި އާރޮން ކޮވިންގްޓަން އެވެ.
ކްރިޓިކުންގެ ތައުރީފު ވެސް ވަރަށް ބޮޑަށް އޮހުނު "ކްރީޑް" އަށް ބޮކްސް އޮފީހުގައި 173.6 މިލިއަން ޑޮލަރުގެ އާމްދަނީއެއް ލިބުނެވެ.
މި ފިލްމުން ސްޓެލޯން އަށް އެންމެ މޮޅު ސަޕޯޓިން އެކްޓަރުގެ ގޯލްޑެން ގްލޯބް ވެސް ލިބިފައިވާ އިރު، އެ އަހަރުގެ އޮސްކާގެ އެންމެ މޮޅު ސަޕޯޓިން އެކްޓަރުގެ ރޯލަށް ނޮމިނޭޓް ވެސް ވި އެވެ.