27 އޯގަސްޓް 2017 - 19:08
ޔަންގޫން (އޮގަސްޓް 27) - މިއަންމާގެ ރަކީން ސްޓޭޓުން ފިލަންދާ މުސްލިމުން ގަޔަށް އެ ގައުމުގެ ސިފައިން ބަޑި ޖަހަމުންދާ ކަމަށް އޮފިޝަލުން ބުނެފި އެވެ.
ބަންގްލަދޭޝްގެ ބޯޑަރު ހުރަސްކޮށް އެ ގައުމަށް ވަންނަންދާ ރޮހިންޖާ މުސްލިމުންނަށް ހަމަލާދޭ ކަމަށް އޭއެފްޕީގެ ރިޕޯޓަރަކު ވެސް ވަނީ ބުނެފަ އެވެ. ހަމަލާ އަމާޒުކުރާ ފަރާތްތަކުގެ ތެރޭގައި އަންހެނުންނާއި ކުޑަ ކުދިން ހިމެނޭ ކަމަށް ވެސް ބުނެފައިވެ އެވެ.
ރަކީން ސްޓޭޓުގައި އެންމެ ފަހުން ހިނގަން ފެށި ހަމަނުޖެހުންތަކުން ސަލާމަތްވުމަށް ދަތުރު ކުރި އެތައް ހާސް ބަޔަކު މިހާރު ވެސް ވަނީ ބަންގްލަދޭޝްގެ ބޯޑަރު ކައިރީ ތާށިވެފަ އެވެ. ރޮހިންޖާ މުސްލިމުންނާއި މިއަންމާ ސިފައިންނާ މެދު ހުކުރު ދުވަހުން ފެށިގެން ހިނގަމުންދާ ހަމަނުޖެހުންތަކުގައި ވަނީ 92 މީހުން މަރުވެފަ އެވެ.
ރޮހިންޖާ މުސްލިމުން ބަންގްލަދޭޝްގެ ބޯޑަރު ކައިރިއަށް ޖަމާވި ނަމަވެސް އެ މީހުން އެ ގައުމަށް ވަނުމުގެ ހުއްދަ ދީފައެއް ނުވެ އެވެ. ރޮހިންޖާ ލީޑަރެއް ކަމަށްވާ މުހައްމަދު ނޫރު ވިދާޅުވީ ބަންގްލަދޭޝް ބޯޑަރު ކައިރީ ލައްކައެއްހާ ރޮހިންޖާ މުސްލިމުން ތިބޭނެ ކަމަށް ލަފާ ކުރެވޭ ކަމަށެވެ.
ރަކީންގައި މިލިއަނެއްހާ މުސްލިމުން ދިރިއުޅެ އެވެ. އެކަމަކު ރަކީންގެ އަޣުލަބިއްޔަތު އޮންނަ ބުޑިސްޓުން ބުނަނީ އެއީ ގަވާއިދާ ޚިލާފަށް އެތެރެވެފައިވާ ބައެއް ކަމަށެވެ. ރަކީންގައި މުސްލިމުންނާ ދެކޮޅަށް ބުޑިސްޓުން 2012 ވަނަ އަހަރު ދިން ހަމަލާތަކުގައި 100،000 މުސްލިމުން ހާލުގައި ޖެހުނެވެ. ރޮހިންޖާ މުސްލިމުންނަކީ މިއަންމާގެ ރައްޔިތުންގެ ގޮތުގައި އެ ގައުމުގެ ސަރުކާރުން ވެސް ބަލައިގެންފައެއް ނުވެ އެވެ. އެކަމަކު އެ މީހުން މިއަންމާގެ ދިރިއުޅޭތާ އެތައް ޒަމާނެއް ވެއްޖެ އެވެ.