25 އޯގަސްޓް 2017 - 16:12
މައްކާ (އޮގަސްޓް 25) - މި އަހަރުގެ ހައްޖުގެ އަޅުކަން އަދާކުރުމަށް އިއްޔެގެ ނިޔަލަށް 1.4 މިލިއަން މީހުން ސައުދީ އަރަބިއާ އަށް ހިނގައްޖެ ކަމަށް އޮފިޝަލުން ބުނެފި އެވެ.
ސައުދީގެ ރަސްމީ ނޫސް އެޖެންސީން ބުނީ ހައްޖުގެ އަޅުކަން އަދާކުރުމަށް ވައިގެ މަގުން މިހާތަނަށް 1،313،946 މީހުން އަދި އެއްގަމު މަގުން 79،501 މީހުން ސައުދީ އަށް އެތެރެވެފައިވާ ކަމަށެވެ. މީގެ އިތުރުން ކަނޑުމަގުން ވެސް 12،477 މީހުން ހައްޖަށް އައިސްފައިވާ ކަމަށް ވެސް ބުނެފައިވެ އެވެ.
މި އަހަރު ހައްޖަށް ދިޔަ މީހުންގެ ތެރޭގައި ގަތަރުގެ 400 މީހުން ވެސް ހިމެނެ އެވެ. ސައުދީން މިދިޔަ ޖޫން މަހު ގަަތަރާ ސިޔާސީ ގުޅުން ކަނޑާލި ފަހުން ގަތަރު މީހުން ސައުދީ އަށް ދިއުން ވަނީ މަނާކޮށްފަ އެވެ. ނަމަވެސް ގަތަރުން ހައްޖަށް ދާން ބޭނުންވާ މީހުންނަށް ފުރުސަތު ދިން ނަމަވެސް އެ މީހުން ދަތުރު ކުރުމުގައި ވަނީ ދަތިތައް ދިމާވެފަ އެވެ. އީރާނުން މިދިޔަ އަހަރުގެ ހައްޖުގެ އަޅުކަން ބޮއިކޮޓް ކުރި ނަމަވެސް މި އަހަރު ވަނީ އެ ގައުމުގެ މީހުން ވެސް ހައްޖަށް ގޮސްފަ އެވެ.
މި އަހަރުގެ ހައްޖުގެ އަޅުކަމުގައި ދެ މިލިއަން މީހުން ބައިވެރިވާނެ ކަމަށް ސައުދީގެ ހައްޖު މިނިސްޓްރީން ބުނެ އެވެ. މިދިޔަ އަހަރު ވަނީ 1.8 މިލިއަން މީހުން ހައްޖުގެ އަޅުކަން އަދާކޮށްފަ އެވެ.