24 އޯގަސްޓް 2017 - 09:38
މެޑްރިޑް (އޮގަސްޓް 24) – ސްޕެނިޝް ފެޑެރޭޝަނުގެ ސަސްޕެންޝަނެއްގައި ހުރި ކްރިސްޓިއާނޯ ރޮނާލްޑޯ ރޭ ވައްދާލި ހިތްގައިމު ގޯލާ އެކު، ފިއޮރެންޓީނާ 2-1 އިން ބަލިކޮށް ރެއާލް މެޑްރިޑުން ޓްރޮފެއޯ ސެންޓިއާގޯ ބެރްނެބުއޭ ކާމިޔާބުކޮށްފި އެވެ.
މިއީ ރެއާލް މެޑްރިޑުގެ ކުރީގެ ރައީސް އަދި ކްލަބުގެ ސްޓޭޑިއަމުގެ ނަން ނިސްބަތްވާ ސެންޓިއާގޯ ބެރްނެބުއޭގެ ޝަރަފުގައި 1979 ވަނަ އަހަރުން ފެށިގެން ކޮންމެ ސީޒަނެއްގެ ކުރީކޮޅު ރެއާލް މެޑްރިޑުން ކުޅޭ އެކުވެރިކަމުގެ މެޗެކެވެ.
ރޮނާލްޑޯ އާއި މާކޯ އަސެންސިއޯ އާއި ސާޖިއޯ ރާމޯސް ފިޔަވައި މި މެޗުގެ ފުރަތަމަ އެގާރައިގައި މެޑްރިޑުން ހިމެނެނީ ރިޒާވް ކުޅުންތެރިންނެވެ. މި މެޗުގެ ދެ ވަނަ ހާފުގައި މެޑްރިޑުގެ ގޯލް ބެލެހެއްޓީ އެ ޓީމުގެ ކޯޗު ޒައިނުއްދީން ޒިދާންގެ ދަރިފުޅު ލޫކާ ޒިދާނެވެ.
ޔުއެފާ ސުޕަ ކަޕުގެ ފުރަތަމަ ލެގުން ބާސެލޯނާ އަތުން 3-1 އިން މެޑްރިޑް މޮޅުވި މެޗުގައި ރަތްކާޑު ދެއްކުމުން ހިތްހަމަނުޖެހިގެން ރެފްރީ ކޮއްޕާލާފައިވާތީ ރޮނާލްޑޯ ހުރީ ފަސް މެޗުގެ ސަސްޕެންޝަނެއްގަ އެވެ. އެކަމަކު ރޭގެ މެޗަކީ އެކުވެރިކަމުގެ މެޗަކަށް ވާތީ އޭނާ ބައިވެރިވީ އެވެ.
މި މެޗުގެ ހަތަރު ވަނަ މިނެޓުގައި ޖޯޑަން ވެރެޓޫ ވަނީ ފިއޮރެންޓީނާ އަށް ލީޑު ނަގައިދީފަ އެވެ. މެޑްރިޑުން އެއްވަރުކުރީ ހަތް ވަނަ މިނެޓުގައި ބޯޖާ މަޔޮރަލް ޖެހި ލަނޑުންނެވެ. އަދި 33 ވަނަ މިނެޓުގައި ރޮނާލްޑޯ ވަނީ މޮޅު ގޯލެއް ޖަހައި މެޑްރިޑަށް ލީޑު ނަގައިދީފަ އެވެ. އަރިމަތިން ލިބުނު ބޯޅަ ކޮންޓްރޯލް ކުރުމަށް ފަހު ފިއޮރެންޓީނާ ކުޅުންތެރިއެއް ކައިރިން ނައްޓާލުމަށް ފަހު އޭރިއާ ތެރެއަށް ވަދެ އޭނާ ވަނީ އެ ބޯޅަ ގޯލުގެ މަތީ ކަނަށް އޮއްސާލައިފަ އެވެ. މި މެޗުގައި ރޮނާލްޑޯ ފުލްކޮށް ކުޅުނެވެ.
"އެއީ މި ކުޅުންތެރިއާގެ ހުނަރުވެރިކަން ހުރިވަރަކީ. އޭނާ މި ޓީމުގައި ހުރުމަކީ ބޮޑު އުފަލެއް،" ޒިދާން ބުންޏެވެ.