24 އޯގަސްޓް 2017 - 13:34
ކ. ތިލަފުށީ ގޮނޑަށް ގިނަ އަދަދެއްގެ ގުރުއާން ތަރުޖަމާތަކެއް އުކާލާފައި ހުއްޓާ ފެނިއްޖެ އެވެ.
ސޯޝަލް މީޑިއާގައި މިހާރު ދައުރުވަމުންދާ ފޮޓޯތަކުން ފެންނަ ގޮތުގައި ވަރަށް އާ އަދި ފޮށިތަކުގައި ހުރި ދިވެހި ތަރުޖަމާތަކެއް ވެސް އޭގެ ތެރޭގައި އެބަހުއްޓެވެ.
އިސްލާމިކް މިނިސްޓްރީގެ އޮފިޝަލަކު ވިދާޅުވި ގޮތުގައި އެއީ މިނިސްޓްރީން ކުރި ކަމެއް ނޫނެވެ، އަދި އެކަން ހިނގައިދިޔަގޮތް ބަލަމުންދާ ކަމަށް އެތަނުން ބުންޏެވެ.
"މިނިސްޓްރީން މި ދަނީ އެކަން ވީ ގޮތް ބަލަމުން. މިނިސްޓްރީން ކުރި ކަމެއް ނޫން އެއީ. އެންމެ ފަހުން ރޫޅާލި ދެ މިސްކިތުގައި ހުރި ގުރުއާނާއި އޭގެ ތަރުޖަމާތައް ވެސް ރައްކާކުރަންޖެހޭ ގޮތަށް ރައްކާކޮށްފައި ހުންނާނީ. އެހެންވީމަ އެއީ އާއްމުންގެ ފަރާތުން ކުރި ކަމެއް،" އޮފިޝަލް ވިދާޅުވި އެވެ.
ތިލަފުށީގައި ކުނި މެނޭޖުކުރަމުން އަންނަ ވެމްކޯގެ އޮފިޝަލަކު ވިދާޅުވި ގޮތުގައި ގުރުއާނާއި މުހިއްމު ލިޔެކިޔުންތައް ގެންނައިރު އަމަލުކުރަންޖެހޭ ވަކި އުސޫލެއް އޮންނަ ކަމަށެވެ. ނަމަވެސް އިއްޔެ ގުރުއާނުގެ ތަރުޖަމާތައް ގެނައިރު އެ އުސޫލަށް އަމަލުކޮށްފައިނުވާ ކަމަށް ބުންޏެވެ.
އޭނާ ވިދާޅުވީ އެއީ ގުރުއާނުގެ ތަރުޖަމާތަކެއްކަން އެނގުުނު ހިސާބުން ރައްކާތެރި ތަނަކަށް ގެންގޮސްފައިވާ ކަމަށެވެ.
"ވަކި ހާއްސަ އުސޫލެއް އޮންނާނެ މުހިއްމު ލިޔެކިޔުންތަކާއި ގުރުއާން ފަދަ އެއްޗެހި ނައްތާލާއިރު. އެކަމަކު އިއްޔެ ފޮށިތައް ގެނައިރު އެ އުސޫލަށް އަމަލުކޮށްފައެއް ނުވޭ. އެހެންވެގެން އަޅުގަނޑުމެންގެ މުވައްޒަފުންނަށް ވެސް އެކަން ނޭނގުނީ. އެނގުނު ހިސާބުން އެ ތަރުޖަމާތައް ރައްކާތެރި ތަނަކަށް ބަދަލުކުރީ،" އޮފިޝަލް ވިދާޅުވި އެވެ.
އުކާލުމަށް ތިލަފުއްޓަށް 1000އެއްހާ ތަރުޖަމާ ގެންދިޔަ ކަމަށް ވެ އެވެ.