20 އޯގަސްޓް 2017 - 14:28
ހަރާރޭ (އޮގަސްޓް 20) - ޒުވާން މޮޑެލްއަކަށް ހަމަލާ ދިނުމުން ސައުތު އެފްރިކާ ފުލުހުން ހޯދަން ބޭނުންވެފައިވާ ޒިމްބާބުވޭގެ ރައީސް ރޮބަޓް މުގާބޭގެ އަނބިކަނބަލުން ގްރޭސް މުގާބޭ އެނބުރި ގައުމަށް ވަޑައިގެންފި ކަމަށް އެ ގައުމުގެ ރަސްމީ ޓީވީން ބުނެފި އެވެ.
ޒެޑްބީސީ އިން ބުނީ ގްރޭސް ޒިމްބާބުވޭ އަށް ވަޑައިގެންނެވީ އެ ގައުމުގެ ގައުމީ އެއާލައިނުގެ ބޯޓެއްގައި ފިރިކަލުންނާ އެކު މިއަދު ހެނދުނު ކަމަށެވެ. ގްރޭސް ޒިމްބާބުވޭ އަށް ވަޑައިގެންނެވިއިރު ސައުތު އެފްރިކާ ފުލުހުން ދިޔައީ އެކަމާނާ ހޯދުމުގެ މަސައްކަތް ކުރަމުންނެވެ. އަދި އެކަމަނާ ހައްޔަރުކޮށްފާނެތީ ޒިމްބާބުވޭ އިން ވަނީ ޑިޕްލޮމެޓިކް އިމްތިޔާޒް ހޯދަން މަސައްކަތް ކޮށްފަ އެވެ.
ރޮބަޓް މުގާބޭ ސައުތު އެފްރިކާ އަށް މިދިޔަ ބުދަ ދުވަހު ވަޑައިގެންނެވީ ސަރަހައްދީ ގައުމުތަކުގެ ވެރިންގެ ސަމިޓެއްގައި ބައިވެރިވެވަޑައިގަތުމަށެވެ. މި ސަމިޓުގައި ގްރޭސް ވެސް ބައިވެރިވެވަޑައިގަންނަވާ ގޮތަށް އޮތް ނަމަވެސް އެކަމަނާ ސަމިޓަށް ވަޑައިގެންފައެއް ނުވެ އެވެ. މުގާބޭ ވަނީ ސަމިޓުގެ ދެ ވަނަ ދުވަހުގެ ބައްދަލުންތައް ކެންސަލް ކުރައްވާ އަނބިކަނބަލުންނާ އެކު އެނބުރި ގައުމަށް ވަޑައިގެންފަ އެވެ.
ސައުތު އެފްރިކާ ފުލުހުން ބުނެފައި ވަނީ އުމުރުން 52 އަހަރުގެ ގްރޭސް އެ ގައުމު ދޫކޮށް ވަޑައިގެންފާނެތީ އެލާޓްގައި ތިބި ކަމަށެވެ.
ޖޮހަނަސްބާގުގެ ހޮޓަލެއްގެ ތެރޭގައި ކުރި ޒުވާބެއްގައި ގްރޭސް ވަނީ އުމުރުން 20 އަހަރުގެ މޮޑެލްގެ މޫނުމަތީގައި ކަރަންޓް ސޮކެޓް ބޯޑަކުން ޖަހާ ނިިތްކުރި ފަޅާލައިފަ އެވެ.