16 އޯގަސްޓް 2017 - 06:15
އިންޑިއާގެ ދަ ފެޑެރޭޝަން އޮފް ވެސްޓާން އިންޑިއާ ސިނެ އެމްޕްލޯއީޒް (އެފްޑަބްލިޔުއައިސީއީ) އިން އިއްޔެއިން ފެށިގެން ވަކި މުއްދަތެއް ނެތް ގޮތަށް ހަޅުތާލެއް ފަށައިފި އެވެ.
މި ހަޅުތާލުގެ ސަބަބުން އެއްވެސް ޝޯއެއްގެ ޝޫޓިން ކުރިޔަކަށް ނުގެންދެވޭނެ އެވެ. މަރާޓީ، ހިންދީ 40 ވަރަކަށް ސިލްސިލާ އާއި 10 ހިންދީ ފިލްމެއްގެ ޝޫޓިންއަށް މި ހަޅުތާލުގެ ސަބަބުން ބުރޫއަރާނެ ކަމަށް ބެލެވެ އެވެ.
ޓީވީ އިންޑަސްޓްރީގައި މަސައްކަތްކުރާ އެތައް ހާސް މުވައްޒަފުންނެއް މި ހަޅުތާލު ފަށާފައިމިވަނީ މުސާރަ ބޮޑުކޮށްދިނުމަށާއި މަސައްކަތްކުރާ ވަގުތު އަށް ގަޑިއިރަށް ހަދައިދިނުމަށް އެމީހުން ހުށަހެޅި ހުށަހެޅުންތަކަށް ޕްރޮޑިއުސަރުން އެކަށީގެންވާ ގޮތެއްގައި އިޖާބަ ދީފައި ނުވާތީ އެވެ.
މި ހަޅުތާލު ފަށާތީ ޕްރޮޑިއުސަރުންނާއި ބްރޯޑްކާސްޓަރުން ވަނީ ވަރަށް ކަންބޮޑުވެފަ އެވެ. ސަބަބަކީ އިންޑިއާގެ އެކި ޗެނަލްތަކުން ދައްކާ ގިނަ ޝޯތަކަކީ މާ ގިނަ އެޕިސޯޑްތަކެއް އިތުރަށް ކުޅެފައިވާ ސިލްސިލާ ތަކަކަށް ނުވުމެވެ. ކޮންމެ ހަފުތާއެއްގެ ވެސް ސިލްސިލާތައް ޝޫޓް ކުރެވެނީ ކިރިޔާ އެ ހަފުތާ އަކަށް ވާ ވަރަށެވެ. އެހެންވެ މި މައްސަލަ ވީހާވެސް އަވަހަކަށް ހައްލުކޮށް ހަޅުތާލު ހުއްޓުވާނެ ގޮތެއް ފެނޭތޯ ޕްރޮޑިއުސަރުން ވެސް ވަނީ މަސައްކަތް ފަށައިފަ އެވެ.
ނަމަވެސް މިހާރު ބެލެވޭ ގޮތުގައި އެންމެ މަދުވެގެން ވެސް، ކުރިޔަށް އޮތް ދެ ދުވަހު އެއްވެސް ސިލްސިލާއެއްގެ ޝޫޓިންއެއް ނުބޭއްވޭނެ އެވެ. އަދި މުމްބައިގެ ފިލްމު ސިޓީ އާއި ފިލްމިސްތާން ސްޓޫޑިއޯ، ފިއުޗާ ސްޓޫޑިއޯ، ކްލިކް ނިކްސަން، ސިނެވިސްޓާ ސްޓޫޑިއޯ ފަދަ ތަންތަނުގައި ހުންނާނީ ބަންދުކޮށްފަ އެވެ. ސަބަބަކީ ހިންދީ ސިލްސިލާތަކުގެ ތެރެއިން ގިނަ ޝޯތަކެއްގެ ޝޫޓިންތައް ބާއްވަނީ މި ސްޓޫޑިއޯތަކުގައި ކަމަށް ވާތީ އެވެ.
މިގޮތަށް 2015 ގައި ވެސް ޓީވީ އިންޑަސްޓްރީގެ މަސައްކަތްތެރިން ހަޅުތާލެއް ފެށި އެވެ. އެ ފަހަރުވެސް އެމީހުން އެދެމުން ދިޔައީ މުސާރަ ބޮޑުކޮށްދިނުމަށާއި މަސައްކަތްކުރާ ވަގުތު އަށް ގަޑިިއިރުކަމަށް ކަނޑައަޅައި ދިނުމަށެވެ. އަދި މެޑިކަލް އިންޝުއަރެންސް، ސޭފްޓީ އަދި ވަޒީފާގެ ރައްކާތެރިކަމަށް ވެސް އެ ފަހަރު އެމީހުން އެދުނެވެ. އަދި އެ ފަހަރު އެމީހުން ހަޅުތާލު ހުއްޓާލީ އެދިފައިވާ ގޮތަށް ކަންތައްތައް ކޮށްދޭނެކަމުގެ ޔަގީންކަން ޕްރޮޑިއުސަރުންގެ ޖަމިއްޔާތަކުން ދިނުމުންނެވެ. ނަމަވެސް އެފްޑަބްލިޔުއައިސީއީގެ ރައީސް ބިރެންދުރަ ނާތު ތިވާރީ އާއި ސެކްރެޓަރީ ޖެނެރަލް ދިލިޕް ޕިޓާވާ ބުނަނީ ޕްރޮޑިއުސަރުން ވައުދުވީ ކަންތައްތައް މިއަދާ ހަމައަށް ވެސް ފުއްދައިނުދޭ ކަމަށެވެ. އެ ފަހަރުގެ ހަޅުތާލު ވެސް ހަފުތާއަކަށް ވުރެ ގިނަ ދުވަހަކަށް ދެމިގެން ގޮސް ވަރަށް ގިނަ ސިލްސިލާތަކަކާއި ޝޯތަކެއް މުޅިން ހުއްޓުމަކަށް އައެވެ. އެކަމުގެ ސަބަބުން ކުރީގައި ދައްކާފައިވާ އެޕިސޯޑްތައް އިޝްތިހާރުތަކާ ނުލައި ދައްކަން ޗެނަލްތަކަށް މަޖުބޫރުވި އެވެ.
އޭގެ ފަހުން ދެ އަހަރު ފާއިތުވެފައިވީ ނަމަވެސް ޕްރޮޑިއުސަރުން ވައުދު ފުއްދާފައިނުވާތީ އަލުން ހަޅުތާލު ފަށަނީ ކަމަށް އެފްޑަބްލިޔުއައިސީއީ އިން ބުންޏެވެ.
ފިލްމު އިންޑަސްޓްރީގެ މަސައްކަތްތެރިންގެ ހައްގުގައި މަސައްކަތްކުރާ މި ބޮޑީން ބުނި ގޮތުގައި ޕްރޮޑިއުސަރުން ބޭނުންވަނީ މުވައްޒަފުން ލައްވާ ކޮންމެ ގޮތަކަށް މަސައްކަތް ކުރުވައިގެން ނަމަވެސް ފައިސާ ހޯދާށެވެ. މިހާރު ގިނަ މީހުން ދުވާލަކު 20 ގަޑިއިރު މަސައްކަތް ކުރާ ކަމަށާއި ކުރާ މަސައްކަތާ އެއްވަރުގެ އުޖޫރައެއް ނުދޭ ކަމަށް އެމީހުން ބުނެ އެވެ.
އެފްޑަބްލިޔުއައިސީއީގައި 250000 މަސައްކަތްތެރިން މެމްބަރުންގެ ގޮތުގައި ރަޖިސްޓްރީ ކޮށްފައިވެ އެވެ. އަދި މުމްބައިގައި ކުރިޔަށްދާ ގިނަ ޝޫޓިންތަކަކީ މި މުވައްޒަފުން ކުރިޔަށް ގެންދާ ޝޫޓިންތަކެވެ.
މި މަހުގެ 14 ވަނަ ދުވަހުގެ ރޭ މެންދަމު 12:00 އިން ފެށިގެން އެއްވެސް ޝޫޓިންއެއް ކުރިއަށް ނުގެންދަން ވަނީ ނިންމައިފަ އެވެ.