15 އޯގަސްޓް 2017 - 08:55
ބާސެލޯނާ (އޮގަސްޓް 15) – ޗައިނާގެ ގުއަންޒޫ އެވަގްރޭންޑުގެ ބްރެޒިލް މިޑްފީލްޑަރު ޕައުލީނިއޯ 40 މިލިއަން ޔޫރޯ އަށް ގަންނަން ބާސެލޯނާ އިން އެއްބަސްވުމަކަށް އަތުވެއްޖެ އެވެ.
އޭނާ ބުރާސްފަތި ދުވަހު ބާސެލޯނާގެ މެޑިކަލް ޓެސްޓް ހެދުމަށް ފަހު އެ ކްލަބަށް ސޮއިކުރާނެ އެވެ. މިއީ 222 މިލިއަން ޔޫރޯގެ އަގަކަށް ނޭމާ ބާސެލޯނާ ދޫކޮށްލި ފަހުން ބާސެލޯނާ އިން ގެންނަ ފުރަތަމަ ކުޅުންތެރިއާ އެވެ. އެކަމަކު ޕައުލީނިއޯ އަކީ އޭގެ ކުރިން ވެސް ބާސެލޯނާ އިން ގެންނަން މަސައްކަތްކުރަމުން އައި ކުޅުންތެރިއެކެވެ.
ބްރެޒިލްގެ ކޮރިންތިއަންސްގައި ވިދާލި ޕައުލީނިއޯ ވަނީ 2013 އިން 2015 އަށް ޕްރިމިއާ ލީގުގެ ޓޮޓެންހަމް ހޮޓްސްޕާސް އަށް ކުޅެފަ އެވެ. އޭނާ ގުއަންޒޫއާ 2015 ވަނަ އަހަރު ގުޅުނީ 14 މިލިއަން ޔޫރޯ އަށެވެ. ބްރެޒިލް ގައުމީ ޓީމަށް 2011 ވަނަ އަހަރުން ފެށިގެން ކުޅެމުން އަންނަ ޕައުލީނިއޯ އަށް އާ ކޯޗު ޓީޓޭއާ އެކު އަންނަނީ ގިނަ ފުރުސަތުތަކެއް ލިބެމުންނެވެ.
ގުއަންޒޫ އިން މިދިޔަ ސީޒަނުގެ ޗައިނީސް ސުޕަ ލީގު ކާމިޔާބުކުރިއިރު އުމުރުން 29 އަހަރުގެ ޕައުލީނިއޯ ވަނީ މޮޅު ކުޅުމެއް ދައްކައިފަ އެވެ.
ބާސެލޯނާގެ މެދުތެރެ ވަރުގަދަކުރުމަށް އެ ޓީމުން އެންމެ ފުރަތަމަ މަސައްކަތްކުރީ ޕީއެސްޖީގެ އިޓަލީ މިޑްފީލްޑަރު މާކޯ ވެރާޓީ ގަތުމަށެވެ. އެކަމަކު އެކަން ކާމިޔާބެއް ނުވި އެވެ. އެ ޓީމުން އަންނަނީ ލިވަޕޫލުގެ ބްރެޒިލް މިޑްފީލްޑަރު ފިލިއްޕޭ ކުޓީނިއޯ އާއި ބޮރޫޝިއާ ޑޯޓްމަންޑުގެ ފްރާންސް ވިންގާ އޮސްމާނޭ ޑެމްބެލޭ ގެންނަން ވެސް މަސައްކަތްކުރަމުންނެވެ.