23 އޯގަސްޓް 2017 - 11:44
މިދިޔަ އަހަރުގެ ތެރޭގައި ބީއެމްއެލް ސެލްފް ސާވިސް ހިދުމަތްތައް ބޭނުން ކޮށްގެން ހަތަރު މިލިއަނަށް ވުރެ ގިނަ މުއާމަލާތް ކޮށްފައިވާ ކަމަށް އެ ބޭންކުން ބުނެފި އެވެ.
ރާއްޖޭގެ އެންމެ ބޮޑު ބޭންކުން ބުނީ މިހާރު އެ ކުންފުނީގެ 90 ޕަސެންޓް މުއާމަލާތްތައް ހިނގަނީ ބްރާންޗްތަކުން ނޫން ކަމަށެވެ. މިހާރު ގިނަ މުއާމަލާތްތައް ކުރަނީ ސެލްފް ސާވިސް އާއި އޭޓީއެމްތަކާއި އޮންލައިން ބޭންކިން އަދި މޯބައިލް އެޕް މެދުވެރިކޮށް ކަމަށް ވެސް އެ ބޭންކުން ބުންޏެވެ.
ބީއެމްއެލް އިން ބުނީ ސެލްފް ސާވިސް ހިދުމަތްތައް ފުޅާ ކުރުމަށް އިތުރު މަސައްކަތް ކުރަމުން އަންނަ ކަމަށެވެ. އެގޮތުން ކުރިއަށް އޮތް ދެ މަހެއްހާ ދުވަހުގެ ތެރޭގައި ހުޅުމާލޭގައި އާ އޭޓީއެމްތަކެއް ބަހައްޓަން ނިންމާފައިވާ ކަމަށް އެ ބޭންކުން ބުންޏެވެ.
ހުޅުމާލޭގެ އިތުރުން މަހެއްހާ ދުވަހުގެ ތެރޭގައި ހުވަދު އަތޮޅުގައި ހަތަރު ސެލްފް ސާވިސް އޭޓީއެމް ބަހައްޓާނެ ކަމަށް ވެސް އެ ބޭންކުން ބުންޏެވެ. އެ އޭޓީއެމްތައް ބަހައްޓާނީ ގއ. ކޮލަމާފުށި، ކޫއްޑޫ އަދި ގެމަނަފުށީގެ އިތުރުން ގދ. ފަރެސްމާތޮޑާގަ އެވެ.
"ސެލްފް ސާވިސް ބޭންކިން ސެންޓަރުތައް މެދުވެރިކޮށް އެންމެ ޒަމާނީ ފެންވަރު ރަނގަޅު އަދި ރައްޔިތުންގެ ދިރިއުޅުމަށް ފަސޭހަކޮށްދެވޭނެ ޚިދުމަތްތައް ފޯރުކޮށްދެވޭ. ސެލްފް ސާވިސް އޭޓީއެމްތަކާ އެކު އާންމު ރައްޔިތުންނަށާއި ވިޔަފާރިތަކަށާއި އަދި ޖުމްލަ ގޮތެއްގައި އިގްތިދާސަށް ފައިދާތަކެއް ފޯރުކޮށްދިނުމަކީ ބީއެމްއެލަށް ލިބޭ އުފަލެއް،" ބީއެމްއެލް އިން ބުނެފައިވެ އެވެ.
ބީއެމްއެލް އިން 2014 ވަނަ އަހަރު ތައާރަފްކުރި ސެލްފް ސާވިސް އޭޓީއެމްތަކުގެ ޖުމްލަ މިހާރު ވަނީ 29 އިތުރުވެފަ އެވެ. ބީއެމްއެލް އިން މިހާރު އަންނަނީ ޖުމްލަ 88 އޭޓީއެމް އޮޕަރޭޓް ކުރަމުންނެވެ.