10 އޯގަސްޓް 2017 - 11:58
ކޮލަމްބޯ (އޮގަސްޓް 10) - ސްރީ ލަންކާގެ ފޮރިން މިނިސްޓަރު ރަވީ ކަރުނަނަޔަކަ މަގާމުން ދުރުކުރުމަށް ސްރީ ލަންކާ ފްރީޑަމް ޕާޓީ (އެސްއެލްއެފްޕީ) ގެ ބައެއް މިނިސްޓަރުން ރައީސް މައިތުރިޕާލާ ސިރިސޭނާ އަށް ދަންނަވައިފި އެވެ.
ވަޒީރުންގެ މި ހުށަހެޅުން އައިސްފައި ވަނީ ރައީސްގެ ރަސްމީ ގެކޮޅުގައި އިއްޔެ ބޭއްވި ކެބިނެޓުގެ ކުއްލި ބައްދަލުވުމެއްގަ އެވެ.
ރިޔާސީ ސެކްރެޓޭރިއަޓުގައި އިއްޔެ ވަނީ މިނިސްޓަރު ރަވީއާ އެކު ރައީސް ސިރިސޭނާ އާއި ބޮޑު ވަޒީރު ރަނިލް ވިކްރަމަސިންހަ ބައްދަލުވުމެއް ބާއްވައިފަ އެވެ. ގަޑިއެއްހާ އިރުގެ މި ބައްދަލުވުން ބާއްވާފައި ވަނީ ކެބިނެޓުގެ ބައްދަލުވުމަށް ފަހު އެވެ.
ލަންކާ ޕާލަމެންޓުގެ ނައިބް ރައީސް ތިލަންގާ ސުމަތިޕާލާ އިއްޔެ ވަނީ ސަރުކާރުގެ އަގު ހިފެހެއްޓުމުގެ ގޮތުން ވެސް ރަވީ އިސްތިއުފާ ދެއްވުމަށް އެދިވަޑައިގެންފަ އެވެ. އޭނާ ވިދާޅުވީ ރަވީ މަގާމުގައި ދެމިހުންނެވުމަށް މަސައްކަތް ކުރައްވާ ނަމަ ސަރުކާރަށް އިތުރު މާޔޫސްކަން ކުރިމަތިވާނެ ކަމަށެވެ.
ރަވީގެ އިތުބާރު ނެތްކަމުގެ މައްސަލައާ މެދު ޕާލަމެންޓުގެ ރައީސް މިއަދު ގޮތެއް ނިންމާނެ އެވެ. ކަރުނަނަޔަކަގެ އިތުބާރު ނެތްކަމުގެ މައްސަލަ މިދިޔަ ބުރާސްފަތި ދުވަހު ޕާލަމެންޓަށް ހުށަހެޅީ ޖޮއިންޓް އޮޕޮޒިޝަން (ޖޭއޯ) ގެ 32 މެންބަރުންގެ ސޮޔާ އެކު އެވެ.
ކަރުނަނަޔަކަގެ މައްޗަށް އިތުބާރު ނެތް ކަމަށް ފާސް ކުރަން ހުށަހެޅީ މަރުކަޒީ ބޭންކުގެ ބޮންޑުގެ މައްސަލާގައި ތުހުމަތުކޮށްފައިވާ ވިޔަފާރިވެރިޔާ އަރްޖުނާ އަލޮއިސިއަސްއާ ގުޅުން އޮންނަ މައްސަލައިގަ އެވެ. މަރުކަޒީ ބޭންކުގެ ކުރީގެ ގަވަރުނަރު އަރުޖުނާ މަހެންދުރަގެ ޅީ ދަރިފުޅެއް ކަމަށްވާ އަލޮއިސިއަސް ވަނީ ކަރުނަނަޔަކަގެ އާއިލާ އަށް ލަގްޒަރީ އެޕާޓްމަންޓެއް ގަނެދީފަ އެވެ.
މިއީ ކަރުނަނަޔަގެ މައްޗަށް އިތުބާރު ނެތްކަމުގެ މައްސަލައެއް ވެއްދި ދެ ވަނަ ފަހަރެވެ. މާޗް 2016 ގައި ވަނީ ކަރުނަނަޔަކަ މާލީ ވަޒީރަކަށް ހުންނެވި އިރު ޖޭއޯގެ 37 މެންބަރުން ސޮއިކޮށް އިތުބާރު ނެތްކަމުގެ މައްސަލައެއް ޕާލަމެންޓަށް ވައްދައިފަ އެވެ. އެ ފަހަރު މައްސަލަ ހުށަހެޅީ އޭނާގެ މާލީ ވަޒީރުކަމުގައި ގައުމުގެ އިގްތިސާދު ހީނަރުވަމުން ދާން ފެށުމުންނެވެ. ނަމަވެސް ޖޫން 2016 ގައި ނެގި ވޯޓުން ކަރުނަނަޔަކަ ވަނީ ސަލާމަތްވެފަ އެވެ.