10 އޯގަސްޓް 2017 - 11:15
ލަންޑަން (އޮގަސްޓް 10) - ދުރު ނޫން މުސްތަގުބަލެއްގައި އިނގިރޭސި ޕްރިމިއާ ލީގުގެ ކްލަބްތަކުން އަންހެން ކޯޗުން ފެނުމުގެ ފުރުސަތު އެބައޮތް ކަމަށް އާސެނަލްގެ ކޯޗު އާސެން ވެންގާ ބުނެފި އެވެ.
ފިރިހެން ފުޓްބޯޅައިގައި ޔޫރަޕްގެ އެންމެ މަތީ ފަންތީގައި މަސައްކަތްކުރާ ހަމައެކަނި އަންހެން ކޯޗަކީ ފްރާންސްގެ ލީގު 2ގެ ކްލާމޮން ފޫޓް އަށް 2014 އިން ފެށިގެން އިރުޝާދު ދެމުން އަންނަ ކޮރީން ޑިއާރޭ އެވެ.
ވެންގާ ބުނީ ފުޓްބޯޅަ ކޯޗުކަމަށް މުސްތަގުބަލުގައި އަންނާނީ ހަމައެކަނި ފުޓްބޯޅަ ސްޕެޝިއަލިސްޓުން ނޫން ކަމަށާއި އެކި ގޮތްގޮތުން ފުޓްބޯޅަ ދިރާސާ ކުރާ އަންހެނުންނަށް ވެސް ފުރުސަތު އެބައޮތް ކަމަށެވެ.
"އަންހެން ކޯޗުންނަށް ޕްރިމިއާ ލީގުން ދުރު ނޫން މުސްތަގުބަލެއްގައި ފުރުސަތު ލިބޭނެ. މިއީ އަހަރެން ދެކޭ ގޮތް. އަހަރެން ދެކޭ ގޮތުގައި ފުޓްބޯޅަ ސްޕެޝިއަލިސްޓުންނަކަށް ނޫން ފުރުސަތު ބޮޑީ. ގާތްގަނޑަކަށް ކުރިއަށް އޮތް 10 ނޫނީ 15 ވަރަކަށް އަހަރު ތެރޭގައި ވަރަށް ގިނަ ކަންތައްތައް ޕްރިމިއާ ލީގުގައި ބަދަލުވާނެ،" ފުޓްބޯލް ރައިޓާސް އެސޯސިއޭޝަނުން ލަންޑަންގެ ފަޔާ ރިލީޑް ފަންޑަށް ފައިސާ ހޯދުމަށް ބޭއްވި ލައިވް އިވެންޓެއްގައި ސުވާލަކަށް ޖަވާބު ދެމުން ވެންގާ ބުންޏެވެ.
އޭނާ ބުނީ ފުޓްބޯޅަ އަށް އެންމެ ބޮޑު ބަދަލެއް ކުރިއަށް އޮތްތަނުގައި އަންނާނީ ޓެކްނޮލޮޖީގެ ޒަރިއްޔާއިން ކަމަށެވެ.
ވެންގާ ބުނީ މިދިޔަ ސީޒަނުގައި އޭނާގެ މުސްތަގުބަލާ ގުޅޭގޮތުން ނިންމާގޮތެއް އިއުލާން ކުރުން ލަސްކުރުމަކީ ހެދުނު ގޯހެއް ކަމަށާއި އެހެން ނަމަވެސް ކްލަބުގައި މަޑުކުރަން މާ ކުރިން ނިންމާފައިވާ ކަމަށެވެ.
"ކްލަބް އެހެން ލެވެލަކަށް ގެންދެވޭނެ މީހަކާ ހަވާލުކުރަން އަހަރެން ބޭނުންވީ. އެކަމަކު އަހަރެންގެ ވިސްނުން ހުރީ ދެން އަންނަ ކޯޗެއް އަންނައިރު އޭނާ އަށް ވެސް ކޯޗުކޮށްދޭން ފަސޭހަ ގޮތަކަށް މި ކްލަބް ބައްޓަންވެފައި އޮންނަން،" ވެންގާ ބުންޏެވެ.
ޕްރިމިއާ ލީގުގެ އާ ސީޒަނުގެ ފުރަތަމަ މެޗުގައި ހުކުރު ދުވަހުގެރޭ އާސެނަލް އަމިއްލަ ދަނޑުގައި ނުކުންނާނީ ލެސްޓާ ސިޓީއާ ދެކޮޅަށެވެ.