05 އޯގަސްޓް 2017 - 07:04
ވަރުގަދަ ފިލްމުތަކަށް ކެމެރާ އުފެއްދުމުގައި މަޝްހޫރުކަން ހޯދާފައިވާ "ރެޑް" ކުންފުނިން ސްމާޓްފޯނެއް އުފައްދަން ނިންމިކަން މިދިޔަ މަހު އިއުލާނުކުރުމާ އެކު ވަރަށް ބޮޑު ސަމާލުކަމެއް ލިބުނެވެ. "ހައިޑްރޮޖެން ވަން" ގެ ނަން ދީފައިވާ މި ފޯނާ ބެހޭ މާގިނަ މައުލޫމާތެއް އޭރު ހާމަކޮށްފައެއް ނުވެ އެވެ.
އެކަމަކު ފޯނުގައި ހިމަނާނެ "ވަރުގަދަ ފީޗާތައް" ސުރުހީއެއްގެ ގޮތުގައި ބުނެދީ، މީހުންގެ ސަމާލުކަން މި ވަނީ އިތުރަށް ހޯދައިފަ އެވެ. މި މީހުން ބުނަނީ މިއީ ފެންވަރު ރަނގަޅު ކެމެރާއަކުން ކުރެވޭނެ ބޭނުންތަކާ އެކު އުފައްދާ ފޯނެއް ކަމަށެވެ. "ހޮލޮގްރަފިކް" ޑިސްޕްލޭއެއް ހިމަނާނެ ކަމަށާއި އެހެންވެ ތްރީޑީ ކަހަލަ ގޮތަކަށް މަންޒަރުތައް ފެންނާނެ ކަމަށް ވެސް ވަނީ ބުނެފަ އެވެ.
ފޯނުގެ ޓީޒާ އިމޭޖެއް ދައްކާލާފައި ވާއިރު އެއީ ބަލައިލަން ހުތުރު ފޯނެއް ވެސް ނޫނެވެ. އެމަކަކު ނަން މަޝްހޫރު ފޯނުތަކުގެ ޑިޒައިނާ މުޅިން ތަފާތެވެ.
މި ފޯނުގެ އަގު ވަރަށް ބޮޑުވާނެ އެވެ. ޕްރީއޯޑާ ފެށެނީ ވެސް 1،195 ޑޮލަރުންނެވެ.