01 އޯގަސްޓް 2017 - 23:43
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ މައްޗަށް ކުރާ ޝަހްސު އޮޅުވާލުމުގެ ދައުވާގެ ޝަރީއަތް މަޑުޖައްސާލުމުގެ އަމުރަކަށް އެދި އޭނާގެ ފަރާތުން ހައި ކޯޓަށް މިއަދު ހުށަހަޅައިފި އެވެ.
ޕީޕީއެމްގެ ދިދަ އާއި ލޯގޯ ގަވާއިދާ ޚިލާފަށް ބޭނުންކުރި ކަމަށް ބުނެ، ކުރީގެ ރައީސް އަދި ޕީޕީއެމްގެ ބާނީ މައުމޫން އަބްދުލް ގައްޔޫމްގެ ދަރިކަލުން ފާރިސް އަށް ކުރާ ދައުވާ އާއި އެ މައްސަލައިގެ ޝަރީއަތާ ގުޅިގެން ފާރިސްގެ ފަރާތުން ހައި ކޯޓަށް މައްސަލަ ހުށަހެޅީ "ބެލެނިވެރިކަމުގެ އިހްތިސާސްގެ" ދަށުން، ފާރިސްގެ ޝަރީއަތާ ގުޅިގެން ވަކި ކަންތައްތަކެއް ކުރުމަށް ދައުލަތުގެ މައްޗަށާއި ކްރިމިނަލް ކޯޓުގެ މައްޗަށް އަމުރުކޮށް ދިނުމަށް އެދި އެވެ.
ފާރިސްގެ ފަރާތުން ހައި ކޯޓުގައި މައިގަނޑު ތިން ކަމަކަށް އެދިފައިވެ އެވެ. އަދި އެކަންކަމާ މެދު ހައި ކޯޓުން ގޮތެއް ނިންމަންދެން ދަށު ކޯޓުގައި ހިނގަމުންދާ ފާރިސްގެ ޝަރީއަތް މަޑުޖައްސާލަން ކްރިމިނަލް ކޯޓުގެ މައްޗަށް ރިޓް އޮފް ޕްރޮހިބިޝަންގެ އަމުރެއް ނެރެ ދިނުމަށް އެދިފައިވެ އެވެ.
ފާރިސްގެ ފަރާތުން ފުރަތަމަ ކަމެއްގެ ގޮތުގައި ހައި ކޯޓުގައި އެދިފައިވަނީ އޭނާ އަށް ކުރާ ޝަހްސު އޮޅުވާލުމުގެ ދައުވާ އަށް ޖަވާބުދާރީވުމަށް ބޭނުންވާ ހެކިތައް ދިނުމަށާއި ދިފާއު ތައްޔާރު ކުރުމަށް ބޭނުންވާ ވަސީލަތްތަކާއި އިންތިޒާމް ހަމަޖެއްސުމަށް ދައުލަތުގެ މައްޗަށް މެންޑަމާސް އަމުރެއް ނެރެ ދިނުމަށެވެ.
ދެވަނަ ކަމެއްގެ ގޮތުގައި އެދިފައި ވަނީ ޝަހްސު އޮޅުވާލުމުގެ ކުރިއަށް ގެންދެވޭނެ ކަމަށް ކްރިމިނަލް ކޯޓުން ނިންމި ނިންމުން ބާތިލްކޮށް، އެ ދައުވާ ކުރިއަށް ގެންދިއުމާ މެދު ގޮތެއް ނިންމަން ޖެހޭނީ ދިފާއުވުމަށް ވަގުތާއި ވަސީލަތްތައް ދިނުމަށް ފަހު ފާރިސްގެ ފަރާތުން ޖަވާބުދާރީވުމުން ކަމަށް ކަނޑައަޅައި، މެންޑަމާސް އަމުރެއް ނެރެ ދިނުމަށެވެ.
ތިން ވަނަ އަށް އެދުނީ އެ ދައުވާއާ ގުޅިގެން ޝަރީއަތް ފެށުމުގެ ކުރިން ދެ ފަރާތުން ހުށަހަޅަން ޖެހޭ ހުށަހެޅުންތައް ހުށަހަޅަން ޖެހޭނީ ޖިނާއީ އިޖުރާއަތުގެ ގާނޫނުގައި ބުނާ އެކަމަށް ވަކި ޚާއްސަ ފޯމަކުން ކަމަށް ކަނޑައަޅައި، ކްރިމިނަލް ކޯޓުގެ އަމުރެއް ނެރެ ދިނުމަށެވެ.
އެފަދަ އަމުރަކަށް ފާރިސްގެ ފަރާތުން އެދުނުއިރު އެ ދައުވާ ކުރިއަށް ގެންދެވޭނެ ކަމަށް ނިންމައި، ޝަރީއަތް ފެށުމުގެ ކުރިން ދެ ފަރާތުން ހުށަހަޅަން ބޭނުންވާ ހުށަހެޅުންތައް މި މަހުގެ 10 ވަނަ ދުވަހު ބާއްވާ އަޑުއެހުމުގައި ހުށަހަޅަން ދެ ފަރާތަށް ވެސް ކްރިމިނަލް ކޯޓުން އޮތީ ކުރިން އަންގައިފަ އެވެ.
ޝަހްސު އޮޅުވާލުމުގެ ދައުވާ ފާރިސްގެ މައްޗަށް ކުރާއިރު މަޖިލީހުގެ މެމްބަރުންނަށް ރިޝްވަތު ދޭން އުޅުނުކަމުގެ ތުހުމަތުގައި ފާރިސް މިހާރު ހުރީ ހައްޔަރުކޮށް، އެ ޝަރީއަތް ނިމެންދެން ބަންދުކޮށްފަ އެވެ. އެކަމަކު އެ މައްސަލައިގެ ތަހުގީގު އަދިވެސް ނުނިމެ އެވެ.