28 ޖުލައި 2017 - 15:44
ވިލިނގިލީ ދާއިރާގެ މެމްބަރު ސައުދު ހުސައިން ހޯދަން ފުލުހުން އިއުލާންކުރި ސަބަބެއް ހޯދަން އޭނާ މިއަދު ފުލުސް އޮފީހަށް ވަޑައިގަތުމުން ހައްޔަރުކޮށްފި އެވެ.
ސައުދު ހޯދަން ރޭ ފުލުހުން އިއުލާންކުރީ ބަލަމުންދާ މައްސަލައަކާ ގުޅިގެން ކަމަށް ބުނެ އެވެ. އެކަމަކު ސައުދު ވިދާޅުވެފައި ވަނީ އޭނާ އުޅުއްވަނީ ފިއްލަވައިގެން ނޫން ކަމަށެވެ.
މިދިޔަ ހޯމަ ދުވަހު ރައްޔިތުންގެ މަޖިލީހުގެ އިދާރާ ސަލާމަތީ ބާރުތަކުން ބަންދުކޮށްފައި ވަނިކޮށް އެތަނަން ވަން ކަމަށް ބުނެ ކޯޓު އަމުރެއްގެ ދަށުން ސައުދު ކުރިން ހައްޔަރުކުރި އެވެ. އެކަމަކު ކޯޓު އަމުރުގައި މައްސަލަތަކެއް ހުރުމުން އޭނާ އެރޭ ދޫކޮށްލި އެވެ.
ސައުދު ކުރިން ހައްޔަރުކުރީ މަޖިލީހުގެ މެމްބަރެއްގެ ގޮތުގައި ނުހިމެނޭ ބަޔަކު މަޖިލީހަށް ވަން ކަމަށް ބުނާ މައްސަލައިގަ އެވެ. އިންތިހާބުވި އިރު ހުރި ޕާޓީ ނޫން އެހެން ޕާޓީއަކަށް ބަދަލުވެއްޖެ ނަމަ، ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މަޖިލީހުގެ މެންބަރުކަން ގެއްލޭނެ ކަމަށް ސުޕްރީމް ކޯޓުން ކުރި ހުކުމަށް ފަހު ޕީޕީއެމުން ވަކިކުރުން ގޮނޑި ގެއްލުނު ކަމަށް ބުނާ މެންބަރުންގެ ތެރޭގައި ސައުދު ހިމެނިވަޑައިގަންނަވަ އެވެ.
މަޖިލީހުގެ މެންބަރުކަމުން ވަކިކޮށްފައި ވަނިކޮށް މަޖިލީހަށް ވަން ކަމަށް ބުނާ މައްސަލާގައި މަޑުއްވަރީ ދާއިރާގެ މެމްބަރު މުހައްމަދު އަމީތާއި ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް ވެސް ވަނީ ހައްޔަރުކޮށްފަ އެވެ. އަދި ދިއްގަރު ދާއިރާގެ މެންބަރު ފާރިސް މައުމޫން ވެސް ހުންނެވީ މެންބަރުންނަށް ރިޝްވަތު ދިން ކަމުގެ ތުހުމަތުގައި ހައްޔަރުކޮށްފަ އެވެ.
ސުޕްރީމް ކޯޓުގެ ހުކުމަށް ފަހު ހަ މެންބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި މައްސަލަ އޭގެ ތެރެއިން ހަތަރު މެމްބަރެއްގެ ފަރާތުން ސުޕްރީމް ކޯޓަށް މިހާރު ވަނީ ހުށަހަޅައިފަ އެވެ. އެ މައްސަލަ އެ ކޯޓުން އޮތީ ބަލައިގެންފަ އެވެ. އެހެންވެ ސުޕްރީމް ކޯޓުން ހުކުމެއް ނުކުރާހާ ހިނދަކު އެއީ މަޖިލީހުގެ މެންބަރުން ކަމަށް ގާނޫނީ ބައެއް ބޭފުޅުން އަންނަނީ ވިދާޅުވަމުންނެވެ.