23 ޖުލައި 2017 - 13:46
މިއަދު ރާއްޖޭގައި ރައްޔިތުންގެ މަޖިލިހެއް ނެތް ކަމަށް އެމްޑީޕީގެ މެމްބަރު އަދި ރައްޔިތުންގެ މަޖިލިހުގެ ކުރީގެ ރައީސް އަބްދުﷲ ޝާހިދު މިއަދު ވިދާޅުވެއްޖެ އެވެ.
ދިއްގަރު ދާއިރާގެ މެމްބަރު ފާރިސް މައުމޫންގެ މައްޗަށް ކުރާ "ޝަހުސު އޮޅުވާލުމު"ގެ ޝަރީއަތް ކްރިމިނަލް ކޯޓުގައި ކުރިއަށް ދިޔައިރު އޭނާ މިނިވަންކުރަން އެދި ކޯޓު ބޭރުގައި އޮތް އެއްވުމުގައި މީޑިއާއާ ވާހަކަދައްކަވަމުން ހެންވޭރު އުތުރު ދާއިރާގެ ޝާހިދު ވިދާޅުވީ މިއަދު ދިވެހިންނަށް އޮތް ހުރިހާ ވެސް ހިތާމައަކީ "ރައްޔިތުންގެ މަޖިލިހެއް ނެތުން" ކަމަށެވެ.
ރައްޔިތުންގެ މަޖިލިހުގެ ރައީސްގެ "މަގާމުގައި އިންނަވާ ބޭފުޅަކަށް މެމްބަރުންގެ އަގުލަބިއްޔަތު ނެތް ހިސާބަށް ދިޔައިމާ ދެން ޖެހޭނީ އިސްތިއުފާ ދެއްވަން،" ޝާހިދު ވިދާޅުވި އެވެ.
"އެއީ ޑިމޮކްރެޓިކް އުސޫލަކީ. ސަރުކާރުން ވަކި މީހަކު އެ މަގާމުގައި ބައިންދަން، މެމްބަރުން ވަކިކޮށް، ޖަލަށް ލާ ކަމަށް ވަންޏާ އެއީ ރައްޔިތުންގެ ވެރިކަމެކޭ ނުބުނެވޭނެ."
ރައްޔިތުންގެ މަޖިލިހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ، ރައްޔިތުންގެ މަޖިލިހުގެ މެޖޯރިޓީއަށް ވުރެ ގިނަ މީހުންގެ ސޮޔާ އެކު ވެއްދި ފަހުން ސުޕްރީމް ކޯޓު މެދުވެރިކޮށް ސަަރުކާރުން ވަނީ، ވަކި މެމްބަރުންތަކެއްގެ ގޮނޑި ގެއްލޭނެ ހުކުމެއް ނެރެފަ އެވެ. އެ ހުކުމަށް ބިނާކޮށް މިހާތަނަށް ހަތަރު މެމްބަރެއްގެ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ކަނޑައަޅާ، ބައި އިލެކްޝަން ވެސް ވަނީ އިއުލާންކޮށްފަ އެވެ.
ރައްޔިތުންގެ މަޖިލިހުގެ މެމްބަރެއްގެ ގޮނޑި ގެއްލިއްޖެ ކަމާ މެދު ހިޔާލު ތަފާތުވެއްޖެ ނަމަ އެކަން ނިންމާނީ ސުޕްރީމް ކޯޓުން ކަމަށް ގާނޫނުއަސާސީގައި ބުނެފައި އޮތުމުން އެ މެމްބަރުންގެ ފަރާތުން ސުޕްރީމް ކޯޓަށް މިދިއަ ބުރާސްފަތިދުވަހު ވަނީ މައްސަލަ ވައްދައިފަ އެވެ. އެކަމަކު އެ މައްސަލައިގެ އަޑުއެހުން ބާއްވާނެ ދުވަހެއް، ނުވަތަ ސުޕްރީމް ކޯޓުން ވަކި ގޮތެއް ކަނޑައަޅާނެ ވަގުތެއް އަދި ނޭނގެ އެވެ.
ޝާހިދު ވިދާޅުވި ގޮތުގައި މަސީހުގެ އިތުބާރު ނެތްކަމުގެ މައްސަލަ މާދަމާ އަށް އެޖެންޑާކޮށްފައި އޮއްވާ އެ ޖަލްސާ ނޯންނާނެ ކަމަށް ނައިބު ރައީސް ރީކޯ މޫސާމަނިކު ސޮއިކުރައްވައި އެންގި އެންގުމަކީ މަޖިލިހުގެ ގަވާއިދާ ހިލާފު ނިންމުމެކެވެ.
މެމްބަރުންގެ ގޮނޑި ގެއްލުމާއި މަސީހުގެ އިތުބާރު ނެތްކަމުގެ މައްސަލަ އެޖެންޑާ ކުރި ޖަލްސާއާ މެދު ކަން ކުރި ގޮތް މަޖިލިހުގެ އަމީންއާންމު އަހުމަދު މުހައްމަދާއި ކައުންސެލް ޖެނެރަލް ފިލްޒާ ރައްޔިތުންނަށް އަންގަވަން ޖެހޭނެ ކަމަށް ވެސް ޝާހިދު ވިދާޅުވި އެވެ.
މަސީހުގެ ޖަލްސާ ކެންސަލްކުރީ، 42 މެމްބަރުންގެ ސޮއި ހަމަނުވާކަމަށް ބުނެ އެވެ. ޖުމްލަ 45 މެމްބަރުންގެ ސޮޔާ އެކު ހުށަހެޅި މައްސަލާގައި އެގޮތަށް ނިންމީ، ސުޕްރީމް ކޯޓުގެ ހުކުމާ އެކު އޭގެ ތެރެއިން ހަތަރު މެމްބަރެއްގެ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން އެންގުމުންނެވެ. އޭގެ ފަހުން އިތުރު ދެ މެމްބަރެއްގެ ގޮނޑި ވެސް ގެއްލިއްޖެ ކަމަށް ވަނީ ކަނޑައަޅައިފަ އެވެ.
އެކަމަކު އިދިކޮޅު ފަރާތްތަކުން ބުނަނީ އެގޮތަށް މައްސަލަ ކެންސަލް ކުރުމުގެ ގާނޫނީ ހައިސިއްޔަތެއް، ސުޕްރީމް ކޯޓުގެ ހުކުމް އައުމުގެ އެއް ދުވަސް ކުރިން ޕީޕީއެމާ ގުޅިވަޑައިގެންނެވި، މޫސައަށް ލިބިވަޑައިގެންފައި ނުވާ ކަމަށެވެ.
ޝާހިދު ވިދާޅުވީ މަޖިލިހުގެ ރައީސްގެ އިތުބާރު ނެތްކަމުގެ މައްސަލައެއް ހުށަހަޅައިފި ނަމަ އިދާރީ ގޮތުން ކުރަން ޖެހޭ ހުރިހާ ކަމެއް، ކައުންސެލް ޖެނެރަލްގެ ލަފާގެ މަތިން ކުރަން ޖެހޭނީ އަމީންއާންމު ކަމަށެވެ. ޖަލްސާގެ ނޯޓިސް އަމީންއާންމު ފޮނުއްވީ އެ ހައިސިއްޔަތުން ކަމަށް ވެސް ވިދާޅުވި އެވެ.
"ނައިބު ރައީސްގެ ހައިސިއްޔަތަކަށް ވާން ޖެހޭނީ ޖަލްސާ އޮންނަ ދުވަހު ރިޔާސަތު ބެލެހެއްޓެވުން. އެ ވާޖިބު އަދާކުރައްވަން ޖެހޭނީ،" ޝާހިދު ވިދާޅުވި އެވެ.
މަސީހުގެ މައްސަލަ ޖުލައި 3 ގައި ވެއްދި ފަހުން ރައްޔިތުންގެ މަޖިލިހުގެ ޖަލްސާއެއް ނުބާއްވަ އެވެ. އަދި އޭގެ ކުރިން އެމަނިކުފާނާ ދެކޮޅަށް ނަގަން އުޅުނު އިތުބާރު ނެތްކަމުގެ ވޯޓާ ގުޅިގެން ވެސް ޖަލްސާތައް މަދުވަމުން ގޮސް މަޖިލިސް އޮތީ ގާތްގަނޑަކަށް ހުއްޓިފަ އެވެ.