26 ޖޫން 2016 - 08:06
ޕްރިޔާ ރުންޗަލް އާއި ފިލްމު އެކްޓަރު ޖޯން އެބްރަހަމް ކައިވެނިކުރީ 2014ގަ އެވެ. ކައިވެންޏަށް މިހާރު ދެ އަހަރަށް ވުރެ ގިނަ ދުވަސްވެފައިވާއިރު ދަރިން ހޯދައި އެ ކުދިންގެ ޒިންމާ އުފުލަން ޖޯން އަދިވެސް ތައްޔާރު ނޫން ކަމަށް އޭނާ ބުނެ އެވެ.
އިންޑިއާގެ ނޫސް އެޖެންސީއަކުން ޖޯން އާ ސުވާލު ކުރުމުން ބުނެފައި ވަނީ ދަރިން ހޯދުމާ މެދު ވިސްނި ކަމަށާއި ނަމަވެސް އަދި އެކަމަށް ތައްޔާރު ނޫން ކަމަށެވެ.
"އަދި މި އުޅެނީ ގެ ވެސް ބޭނުންވާގޮތަށް ސެޓް ނުކުރެވިގެން. ނޯތުއީސްޓް ޔުނައިޓެޑް އެފްސީ ކިޔާ އަމިއްލަ ފުޓުބޯޅަ ޓީމެއް އެބައޮތް. އެއީ އަބަދުވެސް ވިސްނަން ޖެހިފައި އޮންނަ ކަމެއް. އަނެއްކާ އަމިއްލަ ޕްރޮޑަކްޝަން ހައުސް އެއް އެބަހުރި. އެކްޓަރެއްގެ ގޮތުން ގިނަ ފިލްމުތަކެއް އެބަ ކުޅެން. މި ހުރިހާ ކަމަކަށް ދިރިއުޅުމުގެ ގިނަ ވަގުތުތައް ހުސްކުރަން ޖެހޭ،" ދަރިން ހޯދަން މިވަގުތަށް ބޭނުން ނުވާ ސަބަބުތައް ޖޯން ކިޔައިދިނެވެ.
ޖޯން ކިޔައިދިން ގޮތުގައި ދަރިންނަކީ ވަރަށް ބޮޑު ޒިންމާ އެކެވެ. އެކަހަލަ ކަންތައްތައް މާބޮޑަށް ރާވައިގެން ނުކުރެވުނު ނަމަވެސް އޭނާ ދަރިން ހޯދަން ބޭނުންވަނީ އެކުއްޖާއަށް ބޭނުންވާ ވަގުތު ދެވޭނެ އިރަކުން ކަމަށް ޖޯން ބުންޏެވެ. އޭނާ ބުނީ ދަރިންނާ އަޅާ ނުލެވޭ ނަމަ ދަރިން ހޯދަން ބޭނުން ނުވާ ކަމަށެވެ.