26 ޖޫން 2016 - 08:08
މި މަހުގެ 19 ވަނަ ދުވަހު އެކްސިޑެންޓްގައި މަރުވި ޒުވާން އެކްޓަރު އެންޓަން ޔެލްޗިންގެ މަތިން އަބަދުވެސް ހަނދާން ކުރާނެ ކަމަށާއި އޭނާގެ ވާހަކަ އަބަދުވެސް ދައްކާނެ ކަމަށް ބަތަލާ ޒޯ ސަލްދަނާ ބުނެފި އެވެ.
އަންނަ މަހުގެ 22 ގައި ރިލީޒް ކުރާ "ސްޓާ ޓްރެކް ބިޔޯންޑް" ގައި ޔެލްޗިން، 27، އާ އެކު މަސައްކަތް ކުރި ބަތަލާ ބުނީ އޭނާގެ ކުއްލި ވަކިވުމަކީ ލިބުނު ވަރަށް ބޮޑު ހިތްދަތި ކަމެއް ކަމަށެވެ.
"އެއީ އެކުގައި މަސައްކަތްކޮށްލަން ވަރަށް މަޖާ، އެހާމެ ހިތްހެޔޮ އެކްޓަރެއް. އަހަރެން އަބަދުވެސް އޭނާ މަތިން ހަނދާން ކުރާނަން. އަދި އޭނާގެ ވާހަކަ އެންމެން ކައިރީގައި އަބަދު ވެސް ދައްކާނަން،" ޔެލްޗިންގެ ފޮޓޯއަކާ އެކު ޒޯގެ އިސްޓަގްރާމްގައި ލިޔެފައިވެ އެވެ.
އޭނާ ބުނީ ޔެލްޗިންއަކީ ވަރަށް ހުނަރުވެރި އުންމީދީ އެކްޓަރެއް ކަމަށެވެ. އަދި އޭނާ އެކު މަސައްކަތްކޮށްލަން ފުރުސަތު ލިބުމަކީ އުފަލެއް ކަމަށް ޒޯ ބުންޏެވެ.
ޔެލްޗިން ދުއްވި ޖިޕް އެކްސިޑެންޓްވެ، އޭނާ މަރުވި ހާދިސާ ކެލިފޯނިއާގެ ފުލުހުން އަންނަނީ ތަހުގީގު ކުރަމުންނެވެ.
ބައެއް ރިޕޯޓްތައް ބުނާ ގޮތުން އޭނާ އެކްސިޑެންޓްވީ ވެހިކަލްގެ މައްސަލައަކާ ހުރެ އެވެ.