11 ޖުލައި 2017 - 06:26
"ބަޖްރަންގީ ބައިޖާން"ގައި ކަރީނާ ކަޕޫރުގެ މަންމަގެ ރޯލު އަދާކުރި އަދި "ކުއީން"ގައި ކަންގަނާގެ މަންމަގެ ރޯލު ކުޅުނު އަލްކާ ކައުޝަލް ދެ އަހަރު ދުވަހަށް ޖަލަށް ލައިފި އެވެ. އޭނާ ޖަލަށް ލާފައިވަނީ ބައުންސް ޗެކެއްގެ މައްސަލައިގަ އެވެ.
ޓީވީ ސިލްސިލާއެއް އުފެއްދުމަށްޓަކައި އަލްކާ އާއި އޭނާގެ މަންމަ ވަނީ ދަނޑުވެރިއެއް ކަމަށްވާ އަވްތާރު ސިންގް އަތުން 50 ލައްކަ ރުޕީސްގެ ލޯނެއް ނަގާފަ އެވެ. ނަމަވެސް އެެ ދެމައިން ލޯނުގެ ފައިސާ އަނބުރާ ދައްކާފައެއް ނުވެ އެވެ. އަވްތާރު ސިންގް ފައިސާ ދޭން އެދެން ފެށުމުން އެ ދެމައިން ދީފައިވަނީ 25 ލައްކަ ރުޕީސްގެ ދެ ޗެކެވެ. އެ ދެ ޗެކް ވެސް ބައުންސްވެ ދެ މައިންނަށް މައްސަލަތަކާ ކުރިމަތިވީ ކަމަށް އަވްތާރު ސިންގްގެ ގާނޫނީ ވަކީލު ސުކްބިރް ސިންގް ބުންޏެވެ.
މި ދެ މައިން ޖަލަށް ލާން ލޯކަލް ކޯޓަކުން ފުރަތަމަ ހުކުމް ކުރީ 2015 ގަ އެވެ. ނަމަވެސް އަލްކާ އާއި އޭނާގެ މަންމަ ވަނީ މި މައްސަލަ މަތީ ކޯޓެއްގައި އިސްތިއުނާފު ކޮށްފަ އެވެ. ނަމަވެސް ބުދަ ދުވަހު އެ ކޯޓުން ވެސް ވަނީ ދަށު ކޯޓުގެ ހުކުމަށް ތާއީދުކޮށް އެ ދެމައިން ޖަލަށް ދާން ޖެހޭ ކަމަށް ނިންމާފަ އެވެ. އެހެންކަމުން އަލްކާ އާއި އޭނާގެ މަންމަ މިހާރު ވަނީ ސަންގްރޫރް ޑިސްޓްރިކްޓް ޖަލުގައި ބަންދުކޮށްފަ އެވެ.
ބޮލީވުޑް ފިލްމުތަކުގެ އިތުރަށް އަލްކާ އަކީ މަރާޓީ ފިލްމުތަކުގައި ވެސް މަގްބޫލު އެކްޓަރެކެވެ. އަދި ވަރަށް މަޝްހޫރު ހިންދީ ސިލްސިލާތަކުގައި ވެސް އަލްކާ މަސައްކަތް ކޮށްފައިވެ އެވެ. އެގޮތުން "ގަބޫލު ހޭ"، "ސްވަރާގިނީ" އަދި "ކުމްކުމް"ގައި އަލްކާގެ މުހިއްމު ރޯލުތަކެއް ހިމެނެ އެވެ.