05 ޖުލައި 2017 - 13:08
ވެކޭޝަންސް އެކްސްޕޯ އަށް ޒިޔާރަތް ކުރާ ފަރާތްތަކުގެ މެދުގައި ނަގާ ގުރުއަތުން ހޮވޭ މީހަކަށް ތުރުކީގެ އިސްތަންބޫލަށް ދެކޮޅު ޓިކެޓް ދޭން، ޓާކިޝް އެއާލައިން އިން ނިންމައިފި އެވެ.
މި އަހަރުގެ ވެކޭޝަންސް އެކްސްޕޯ އޮންނާނީ އާޓް ގެލަރީގައި މާދަމާ އިން ފެށިގެން އަންނަ ހޮނިހިރު ދުވަހާ ހަމައަށެވެ. ގުރުއަަތުލުން އޮންނާނީ އެކްސްޕޯގެ އެންމެ ފަހު ދުވަހު އެވެ.
ތުރުކީގެ ގައުމީ އެއާލައިން އަދި ދުނިޔޭގައި ވެސް އެންމެ ބޮޑު އެއާލައިންތަކުގެ ތެރޭގައި ހިމެނޭ ޓާކިޝް އެއާލައިނުން ކުރާ ދަތުރުތަކުގެ ޓިކެޓްގެ އަގުތަކުގެ މައުލޫމާތު ވެކޭޝަންސް އެކްސްޕޯ އިން ލިބޭނެ އެވެ.
ރާއްޖޭގައި އިވެންޓް މެނޭޖްކުރާ ކުންފުންޏެއް ކަމަށްވާ ހައިރައިސް އިން ކުރިއަށް ގެންދާ މި އެކްސްޕޯ ހުޅުވާފައި ހުންނާނީ މެންދުރުފަހު 2:00 އިން އިރުއޮއްސި 6:00 އަށް އަދި ރޭގަނޑު 8:00 އިން 11:00 އަށެވެ.
އެކްސްޕޯގެ މަގްސަދަކީ ދަތުރުފަތުރުކުރުމާ ބެހޭ މައުލޫމާތު ދިވެހިންނާއި ރާއްޖޭގައި ވަޒީފާ އަދާކުރާ ބޭރު މީހުންނަށް ފޯރުކޮށްދިނުމެވެ. އެކްސްޕޯގެ ސަބަބުން ރާއްޖޭގައި ދަތުރުފަތުރުކުރުން ފަސޭހަވެ، ޓޫރިޒަމްގެ ސިނާއަތު ވެސް ކުރިއަރާނެ ކަމަށް ހައިރައިސް އިން އުންމީދުކުރެ އެވެ.