02 ޖުލައި 2017 - 14:41
ކޮލަމްބޯ (ޖުލައި 2) - ލަންކާގައި އަންހެނުން އެކަނި ކުރޮޅި އަށް ނޭރުމަށް ކޮލަމްބޯގައި ހުންނަ އެމެރިކާ އެމްބަސީން އިލްތިމާސްކޮށްފި އެވެ.
އެމެރިކާ އެމްބަސީގެ ވެބްސައިޓުގައި ލިޔެފައިވާ މެސެޖެއްގައި ބުނެފައި ވަނީ ކުރޮޅި ޑްރައިވަރުންގެ ފަރާތުން ޖިންސީ ފުރައްސާރަ ކުރުމުގެ ޝަކުވާ ލިބިފައިވާ ކަމަށެވެ. އެހެންވެ އަންހެނުން އެކަނި ކުރޮޅިތަކުގައި ދަތުރު ނުކުރުމަށް ވަނީ އިލްތިމާސްކޮށްފަ އެވެ.
"ޓުކް ޓުކް ޑްރައިވަރުންގެ ފަރާތުން އަންހެނުންނަށް ނޭދެވޭ އަމަލުތައް ހިންގާ ކަމުގެ ޝަކުވާ ފަހަކަށް އައިއެސް އިތުރުވެފައިވާކަން އެމެރިކާ އެމްބަސީ އަށް ވަނީ ފާހަގަކުރެވިފައި. އޭގެ ތެރޭގައި އަންހެނުންގެ ގައިގައި ޑްރައިވަރުން އަތްލުން ވެސް ހިމެނޭ. މިފަދަ ހާދިސާތައް ބޮޑަށް ހިނގަނީ ކޮލަމްބޯ އޭރިއާގައި،" އެމްބަސީގެ ބަޔާނުގައި ބުނެފައިވެ އެވެ.
އެމްބަސީން ބުނީ އަންހެނުންނަށް ގޯނާ ކުރުމުގެ ހާދިސާތައް ބޮޑަށް ހިނގަނީ ދަތުރު ނިމުމުން ކަމަށެވެ. އަދި ދަތުރު ކުރުމުގެ ކުރިން ޑްރައިވަރުގެ ފޮޓޯ އާއި ރަޖިސްޓްރީ ނަމްބަރުގެ ފޮޓޯ ނެގުމަށް ވެސް އެމްބަސީން ވަނީ އިލްތިމާސްކޮށްފަ އެވެ.
ލަންކާގައި 1.2 މިލިއަން ކުރޮޅި ދުއްވާ ކަމަށްވެ އެވެ. ޕަބްލިކް ޓްރާންސްޕޯޓަށް އިތުބާރު ނުކުރެވޭތީ ގިނަ މީހުން އެއްތަނުން އަނެއް ތަނަށް ދިއުމަށް އާއްމުކޮށް ބޭނުން ކުރަނީ ކުރޮޅި އެވެ.