28 ޖޫން 2017 - 11:16
ފުލުހުންގެ އިންސްޓިޓިއުޓް ފޯ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް އިން ހިންގާ ކޯހެއްގައި ބައިވެރިވުމުގެ ފުރުސަތު އާންމުކޮށް ހުޅުވާލައިފި އެވެ.
ފުލުހުން ބުނީ 30 ޖާގައާ އެކު އަންނަ މަހު ފަށާ ކޯހަކީ ސެޓްފިކެޓް 3 އިން ސެކިއުރިޓީ އޮޕަރޭޝަންސް ޕްރޮގްރާމެއް ކަމަށެވެ.
މި ކޯހުގައި ބައިވެރިވުމަށް ޝައުގުވެރިވާ މީހުންނަށް ކުރިމަތިލުމުގެ ފުރުސަތު އަންނަ މަހުގެ ހަތްވަނަ ދުވަހާ ހަމައަށް ވަނީ ހުޅުވާލައިފަ އެވެ.
ފުލުހުން ބުނީ ތިން މަސް ދުވަހުގެ މުއްދަތަށް ކުރިއަށް ގެންދާ ކޯހުގައި ބައިވެރިވުމަށް 1،500ރ. ގެ ފީއެއް ދައްކަން ޖެހޭނެ ކަމަށެވެ.
ކޯހުގައި ބައިވެރި ކުރާނީ ގްރޭޑް 7 ނިންމާފައިވާ ނުވަތަ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ގަބޫލްކުރާ ލެވެލް 2 ގެ ސަނަދެއް ހާސިލްކޮށްފައިވާ މީހުން ކަމަށް ފުލުހުން ބުންޏެވެ. އަދި ކޯހަށް މީހުން ހޮވުމުގައި ކޯހާ ގުޅުން ހުރި ދާއިރާގެ މަސައްކަތު ތަޖުރިބާ އަށް އިސްކަން ދޭނެ ކަމަށް ވެސް ބުންޏެވެ.