19 ޖޫން 2017 - 12:13
ރައްޔިތުންގެ މަޖިލިހުގެ އިތުރު ޖަލްސާއެއް ފިތުރު އީދުގެ ކުރިން ނުބާއްވާނެ ކަމަށް ބައެއް މެމްބަރުން ވިދާޅުވެއްޖެ އެވެ.
މަޖިލިހުގެ ޕީޕީއެމްގެ ބައެއް މެމްބަރުން ވިދާޅުވި ގޮތުގައި ޖަލްސާތައް މި ހަފްތާގައި ނުބާއްވަން ނިންމީ އެޖެންޑާ ކުރާނެ މާ މުހިންމު ކަމެއް މި ވަގުތަށް ނެތުމުންނެވެ. އަދި ގުނަމުން މި ދަނީ ރޯދަ މަހުގެ ފަހު ދިހައަކަށް ވާތީ، އެއީ ޖަލްސާތައް ނުބާއްވަން ނިންމި އެއް ސަބަބު ކަމަށް ވެސް އެ މެމްބަރުން ވިދާޅުވި އެވެ.
"ބޮޑަށް ބެލެވެނީ ފަހު ދިހައަކަށް ވާތީ މެމްބަރުން އަޅުކަމުގައި އިތުރު ވަގުތު ހޭދަކުރަން ފުރުސަތު ދިނީ ކަމަށް. ޖަލްސާތައް އަލުން ފަށާނީ އަންނަ މަހު،" ޕީޕީއެމްގެ މެމްބަރަކު ވިދާޅުވި އެވެ.
މި މަހުގެ ފަހު ހަފްތާގައި ދިވެހިންނާ ބައްދަލު ކުރާނީ ފިތުރު އީދެވެ. ސަރުކާރުން ވަނީ ފިތުރު އީދުގެ ބަންދުގެ ގޮތުގައި ގާތްގަނޑަކަށް ހަފްތާއެއް ދީފަ އެވެ.
މަޖިލީހުގެ އަމީން އާންމު އަހުމަދު މުހައްމަދު ވިދާޅުވީ މަޖިލިހުގެ ޖަލްސާއެއް މިއަދު ބާއްވަން ނިންމާފައި ނުވާ ކަމަށެވެ. އަދި މާދަމާ ޖަލްސާއެއް އޮންނާނެ ކަން ވިދާޅުވާން އަދި އެނގިވަޑައިނުގަންނަވާ ކަމަށް އޭނާ ވިދާޅުވި އެވެ.
މަޖިލިހުގެ ގަވާއިދުގައި ބުނާ ގޮތުން ކޮންމެ ހަފްތާއަކު ހޯމަ، އަންގާރަ އަދި ބުދަ ދުވަހު ޖަލްސާ ބާއްވަން ޖެހެ އެވެ. މަޖިލިހުގެ ދެވަނަ ދައުރުގެ ޖަލްސާތައް ފެށި ފަހުން މިހާތަނަށް ހަ ޖަލްސާއެއް ބޭއްވި އެވެ.
ބައެއް މެމްބަރުން ގަބޫލު ކުރެއްވި ގޮތުގައި ދެވަނަ ދައުރުގެ ޖަލްސާތަކުގައި ރައްޔިތުންނަށް ފައިދާ ހުރި ގިނަ މަސައްކަތްތަކެއް މިހާތަނަށް ވަނީ ކުރެވިގެން ގޮސްފަ އެވެ. ހާއްސަކޮށް އެ މެމްބަރުން ފާހަގަ ކުރައްވަނީ ތެލުގެ ޑިއުޓީ ކުޑަކޮށް، ޕެޓްރޯލާއި ޑީސަލްގެ އަގު ހެޔޮ ކުރުމެވެ. އަދި ހައި ކޯޓުގެ ފަނޑިޔާރުންގެ އަދަދު އިތުރު ކުރުމަކީ ޝަރީއަތްތައް ބާރުމިނެއްގައި ކުރިއަށް ދާނެ ކަމެއް ކަން އެ މެމްބަރުން ވިދާޅުވި އެވެ.
މީގެ އިތުރުން މަޖިލިހުން ވަނީ އެޗްއާރުސީއެމްގެ މެމްބަރު ކަމަށް ކުރިން އެ ކޮމިޝަންގެ މެމްބަރު މުހައްމަދު ޒާހިދު އައްޔަން ކުރުމަށާއި ރާއްޖެއިން ތައިލެންޑަށް ކަނޑައަޅާ ސަފީރަކަށް ޑީއާރުޕީގެ ލީޑަރު މުހައްމަދު ނަޝީދު (ކާނަލް) އާއި އެލްޖީއޭ އަށް ތިން ބޭފުޅަކު އައްޔަން ކުރަން ފެންނަ ކަމަށް ރުހުން ދީފަ އެވެ. އަދި ވަޒީރުން މަޖލިހަށް ހާޒިރުކޮށް އެ ބޭފުޅުންނާ މެމްބަރުން ސުވާލު ކުރެއްވި އެވެ.
ޕީޕީއެމްގެ މެމްބަރުންގެ މެދުގައި ހިޔާލު ތަފާތުވުން އެންމެ ބޮޑަށް އުފެދުނީ ބޮޑެތި އިސްލާހުތަކާ އެކު ސަރުކާރުން ހުށަހެޅި، ޖިނާއީ އިޖުރާއަތުގެ ގާނޫނުގެ އިސްލާހުގެ ބިލާ މެދު އެވެ. ބިލާ މެދު ޕީޕީއެމްގެ މެމްބަރުންގެ މެދުގައި ހިޔާލު ތަފާތުވުން އުފެދުމާ ގުޅިގެން އެ ބިލް ވަނީ އަނބުރާ ގެންގޮސްފަ އެވެ.