17 ޖޫން 2017 - 12:16
މެންޗެސްޓާ (ޖޫން 17) - ޗެލްސީގެ މިޑްފީލްޑަރު ނިމެންޔާ މަޓިޗް ހޯދަން ކުރަމުން އައި މަސައްކަތް ހުއްޓާލައި މެންޗެސްޓާ ޔުނައިޓެޑުން ޓޮޓެންހަމްގެ އެރިކް ޑަޔާ އަށް ފާރަލަން ފަށާފައިވާ ކަަމަށް ރިޕޯޓްތައް ބުނެފި އެވެ.
ޓީމުގެ މެދުތެރެ ވަރުގަދަ ކުރުމުގެ ގޮތުން، ކުރިން ހޯސޭ މޮރީނިއޯގެ ކޯޗުކަމުގައި ޗެލްސީ އަށް ކުޅުނު މަޓިޗް ގެންނަން ޔުނައިޓެޑުން ވަނީ އޭނާގެ އޭޖެންޓާ މަޝްވަރާތަކެއް ބާއްވައިފަ އެވެ. އެހެން ނަމަވެސް ރަސްމީކޮށް އެއްވެސް ބިޑެއް ޔުނައިޓެޑުން ނުކުރެ އެވެ.
ރިޕޯޓްތައް ބުނާގޮތުން ޔުނައިޓެޑުގެ ވިސްނުން މިހާރު ހުރީ މަޓިޗްގެ ބަދަލުގައި ޓޮޓެންހަމްގެ ޑަޔާ އަށެވެ. އުމުރުން 23 އަހަރުގެ ޑަޔާ އަކީ ޑިފެންސްގެ ކޮންމެ މަގާމެއްގެ އިތުރުން މެދުތެރެއަށް ވެސް ރަނގަޅު ކުޅުމެއް ދައްކަމުން އަންނަ ކުޅުންތެރިއެކެވެ. ޓޮޓެންހަމަށް ފާއިތުވި ދެ ސީޒަނުގައި މޮޅު ކުޅުމެއް ދެއްކި ޑަޔާ އަންނަނީ ފަހަކަށް އައިސް އިންގްލެންޑް ގައުމީ ޓީމުގެ ފުރަތަމަ އެގާރައިގައި ގަވާއިދުން ކުޅެމުންނެވެ.
ޑަޔާ ވަނީ މިދިޔަ އަހަރު ޓޮޓެންހަމްއާ އެކު ދިގު މުއްދަތުގެ އެއްބަސްވުމެއްގައި ސޮއިކޮށްފަ އެވެ. އެ ކޮންޓްރެކްޓްގައި ބުނާގޮތުން 2021 ވަަނަ އަހަރުގެ ކުރިން ޑަޔާ އަށް ކްލަބް ބަދަލުކުރެވޭނީ އޭނާ ގަންނަން 50 މިލިއަން ޕައުންޑް މަދުވެގެން ހުށަހަޅައިފިނަމަ އެވެ.
ސްޕޯޓިން ލިސްބަންގެ އެކެޑަމީން ފުޓްބޯޅަ ކެރިއަރު ފެށި ޑަޔާ ޓޮޓެންހަމަށް ބަދަލުވީ 2014 ވަނަ އަހަރު ހަތަރު މިލިއަން ޕައުންޑަށެވެ.
ޔުނައިޓެޑުން ވަނީ މިދިޔަ ހަފްތާގައި ބެންފީކާ އަށް ކުޅެމުން އަންނަ ސްވިޑަން ޑިފެންޑަރު ވިކްޓަ ލިންޑެލޯފް 35 މިލިއަން ޔޫރޯ އަށް އެ ޓީމަށް ގެނެސްފަ އެވެ. ލިންޑެލޯފްގެ އިތުރުން އަދި އެއް ޑިފެންޑަރަކު އެ ޓީމާ ގުޅޭނެ ކަމަށް ޔުނައިޓެޑުން ބުނެ އެވެ.
ރިޕޯޓްތައް ބުނާގޮތުން ޔުނައިޓެޑުން ވަނީ އިތުރު ޑިފެންޑަރަކު ގަތުމަށް ލޫކް ޝޯ އާއި ކްރިސް ސްމޯލިން ވިއްކާލަން ނިންމައިފަ އެވެ. އަދި އެ ދެ ކުޅުންތެރިން ވިއްކައިގެން އާ ޑިފެންޑަރެއް ގަތުމަށް ބަޖެޓް ހޯދުމަށެވެ.