08 ޖޫން 2017 - 12:28
ސައުތު އޭޝިއާ އޮލިމްޕިކް ކައުންސިލް (އެސްއޭއޯސީ) އަސާސީ ގަވާއިދަށް އިންގިލާބީ ބަދަލުތަކެއް ގެނައުމަށް ފަހު ބާއްވާ ފުރަތަމަ އިންތިހާބީ ބައްދަލުވުން މި އަހަރު ފަހުކޮޅު ނުވަތަ އަންނަ އަހަރު ކުރީކޮޅު ދިވެހިރާއްޖޭގައި ބާއްވަން ނިންމައިފި އެވެ.
ބޫޓާނުގެ ވެރިރަށް ތިމްޕޫގައި އިއްޔެ ބޭއްވި އެސްއޭއޯސީގެ ބައްދަލުވުމުގައި ވަނީ ސައުތު އޭޝިއަން ފެޑެރޭޝަނުގެ ނަމުގައި 1981 ވަނަ އަހަރު އުފެއްދި ޖަމިއްޔާގެ އަސާސީ ގަވާއިދަށް 33 އަހަރަށް ފަހު ބޮޑު ބަދަލެއް ގެނައުމަށް ނިންމައިފަ އެވެ. އާ އަސާސީ ގަވާއިދުގެ ޑްރާފްޓަށް މެމްބަރު ގައުމުތަކުން ރުހުން ދީފައިވާއިރު ސެޕްޓެމްބަރު 19 ވަނަ ދުވަހު ބާއްވާ ބައްދަލުވުމުގައި އަސާސީ ގަވާއިދު ފާސްކުރާނެ އެވެ.
ބައްދަލުވުމުގައި ބައިވެރިވެވަޑައިގަތުމަށް މި ވަގުތު ތިމްޕޫގައި ހުންނެވި މޯލްޑިވްސް އޮލިމްޕިކް ކޮމިޓީގެ ސެކްރެޓަރީ ޖެނެރަލް އަހުމަދު މަރުޒޫގު (މަރޭ) ވިދާޅުވީ އާ އަސާސީ ގަވާއިދާ އެކު އަންނާނެ އެންމެ ބޮޑު ބަދަލަކީ އެސްއޭއޯސީގައި އިންތިހާބުކުރެވޭ އެގްޒެކެޓިވް ކޮމިޓީއެއް އޮތުން ކަމަށެވެ.
މިހާރު މި އޮންނަނީ މެމްބަރު ގައުމުތަކުން އެއްވެލާފައި ބައްދަލުވުންތަކެއް ބާއްވާ އުސޫލެއް. ޗެއާމަންގެ މަގާމް އޮޓޮމެޓިކުން މި ލިބެނީ އެ ފަހަރެއްގެ ސައުތު އޭޝިއަން ގޭމްސް އޮންނަ ގައުމަކަށް. އޭގެ ސަބަބުން އެ ގައުމެއް ޖަވާބުދާރީ ނުކުރެވޭ. ގޭމްސް ހަތަރު އަހަރު ފަސް އަހަރަށް ފަސްވެގެންދާއިރު އެކަމާ ގުޅިގެން ޖަވާބުދާރީކުރުމުގެ މަސައްކަތެއް ނުކުރެވޭ،" މަރުޒޫގު ވިދާޅުވި އެވެ.
އާ އަސާސީ ގަވާއިދާ އެކު އެސްއޭއޯސީގެ އެގްޒެކެޓިވް ކޮމިޓީ ބިނާވެގެންދާނީ ރައީސާއި ދެ ނައިބް ރައީސުންނާއި ހަޒާންދާރު އަދި ތިން މެމްބަރުންގެ މައްޗަށެވެ. އިންތިހާބު ބޭއްވިގެންދާނީ ހަތް މަގާމުގެ ތެރެއިން ކޮންމެވެސް އެއް މަގާމެއް ކޮންމެ މެމްބަރު ގައުމަކަށް ލިބޭ ގޮތަށެވެ.
ސެޕްޓެމްބަރު 19 ވަނަ ދުވަހު ބާއްވާ ބައްދަލުވުމުގައި އަސާސީ ގަވާއިދު ފާސްކުރުމަށް ފަހު، ތާރީހީ އިންތިހާބު ބާއްވާނީ މި އަހަރު ޑިސެމްބަރު ނުވަތަ އަންނަ އަހަރުގެ ޖެނުއަރީ މަހު ރާއްޖޭގަ އެވެ. މޯލްޑިވްސް އޮލިމްޕިކް ކޮމިޓީގެ ރައީސްގެ މަގާމް މަރްހޫމް ޒާހިރު ނަސީރު ފުރުއްވިއިރު ރާއްޖޭގައި ސައުތު އޭޝިއަން ފެޑެރޭޝަންގެ ބައްދަލުވުމެއް ބޭއްވި އެވެ.
ރާއްޖޭގައި މި ފަހަރު ބާއްވާ ބައްދަލުވުމުގައި ދެން ނިންމާނެ އެންމެ މުހިއްމު ކަމަކީ 2021 ވަނަ އަހަރުގެ ގޭމްސް ބާއްވާނެ ގައުމެކެވެ. ދައުރުވާ އުސޫލުން އެ ފުރުސަތު ޕާކިސްތާނަށް ވަނީ ލިބިފަ އެވެ. އެކަމަކު ސެޕްޓެމްބަރު 19 ވަނަ ދުވަހާ ހަމައަށް އެ ގައުމުން އެކަމަށް ރަސްމީކޮށް ޖަވާބެއް ނުދީފި ނަމަ ގޭމްސް ބޭއްވުމުގެ ފުރުސަތު އާއްމުކޮށް ހުޅުވާލާނެ އެވެ. އަދި ކުރިމަތިލާ ގައުމުތަކުގެ ތެރެއިން ބާއްވާނެ ގައުމެއް ކަނޑައަޅާނީ ރާއްޖޭގައި ބާއްވާ ބައްދަލުވުމުގަ އެވެ.
އެސްއޭއޯސީ ހިންގުމަށް ދެން ގެންނަ އެންމެ މުހިއްމު ބަދަލަކީ ޖަމިއްޔާގެ ދާއިމީ އޮފީހެއް ގާއިމްކުރުމެވެ. އެ ފުރުސަތު ދީފައިވަނީ ނޭޕާލަށެވެ. އެއީ އެ ގައުމުގައި ސާކުގެ އިދާރާ ވެސް ހުރުމާ އެކު އެވެ.
އެ ފުރުސަތުގެ ބޭނުން ހިފާނެތޯ ނުވަތަ ނޫންތޯ ނިންމަން ނޭޕާލަށް ސެޕްޓެމްބަރު 19 ވަނަ ދުވަހާ ހަމައަށް ވަނީ ފުރުސަތު ދީފަ އެވެ.
ނޭޕާލަށް އެ ފުރުސަތުގެ ބޭނުން ހިފެން ނެތް ނަމަ އެ ފުރުސަތު މެމްބަރު ގައުމުތަކަށް ހުޅުވާލާނެ އެވެ. އަދި ކުރިމަތިލާ ގައުމުތަކުގެ ތެރެއިން އޮފީސް ގާއިމްކުރާނެ ގައުމެއް ކަނޑައަޅާނީ ރާއްޖޭގައި ބާއްވާ ބައްދަލުވުމުގަ އެވެ.
އޮފީސް ގާއިމްކުރުމަށް ރާއްޖޭން ޝައުގުވެރިތޯ އެހުމުން މަރުޒޫގު ވިދާޅުވީ ނޭޕާލަށް ނުވާ ނަމަ ނަމަ ރާއްޖޭން ވެސް އެކަމާ ވިސްނަފާނެ ކަމަށާއި އެކަމަކު އެކަން ކުރެވޭނީ ފުޅާ ދާއިރާއެއްގައި މަޝްވަރާކޮށްގެން ކަމަށެވެ.
"އޮފީސް ގާއިމްކުރާ ގައުމެއްގެ ސަރުކާރުން އެބަޖެހޭ އޮފީހުގެ ހަރަދުތަކާއި ޑިރެކްޓަރުގެ ހުރިހާ ކަމެއް ބަލަހައްޓަން. އެހެންކަމުން އެފަދަ ކަމަކަށް ކުރިމަތިލުމުގެ ކުރިން މަޝްވަރާކުރަން އެބަޖެހޭ،" މަރުޒޫގު ވިދާޅުވި އެވެ.
މަރުޒޫގު ވިދާޅުވީ ދާއިމީ އޮފީހެއް ގާއިމްވުމާ އެކު އެސްއޭއޯސީގެ ހިންގުން ވަރަށް ބޮޑަށް ހަރުދަނާ ވެގެންދާނެ ކަމަށާއި މިހާރު އިދާރީ ރެކޯޑްތައް ބެލެހެއްޓުން ފަދަ ކަންކަން ވެސް ދަނީ އެހާ ރަނގަޅަށް ނޫން ކަމަށެވެ.
މީގެ އިތުރުން ގޭމްސްތަކުގެ ކަންކަން ބެލެހެއްޓުމަށް ކޯޑިނޭޝަން ކޮމިޓީއެއް ގާއިމްކުރުމާއި ގޭމްސްތަކުގެ ރައިޓްސް ކޮމާޝަލީ ވިއްކުމަށް ފަހު އޭގެ ތެރެއިން 25 ޕަސެންޓް އެސްއޭއޯސީ އަށް ލިބޭ ގޮތަށް ހެދުމަށް ވެސް މަޝްވަރާކޮށްފައިވާ ކަމަށް މަރުޒޫގު ވިދާޅުވި އެވެ.
"އަޅުގަނޑުމެންނަށް ކުރިއަށް ދެވެން އޮތީ މިފަދަ މުހިއްމު ބަދަލުތަކެއް ގެނެސްގެން. އެސްއޭއޯސީގެ ހިންގުމަށް ބޮޑެތި ބަދަލުތަކެއް އަންނާނެ އާ އަސާސީ ގަވާއިދާ އެކު،" މަރުޒޫގު ވިދާޅުވި އެވެ.
ސައުތު އޭޝިއަން ގޭމްސް ތާރީހަށް ނުބޭއްވޭތީ އެތުލީޓުންގެ އިތުބާރު ވަނީ ވަރަށް ބޮޑަށް ގެއްލިފަ އެވެ. އެގޮތުން 2010 ވަނަ އަހަރު ބަންގްލަދޭޝްގައި ގޭމްސް ބޭއްވުމަށް ފަހު އިތުރު ގޭމްސް އެއް ބޭއްވިފައިވަނީ ހަ އަހަރު ފަހުން މިދިޔަ އަހަރުގެ ކުރީކޮޅު އިންޑިއާގަ އެވެ. ގޭމްސް ބާއްވަން ފަސް ފަހަރެއްގެ މަތިން ތާރީހު ކަނޑައެޅި ނަމަވެސް ތަފާތު ސަބަބުތަކާ ހުރެ ފަސްވީ އެވެ. ދެން އޮންނަ ގޭމްސް އޮންނާނީ 2019 ވަނަ އަހަރުގެ މާޗު މަހު ނޭޕާލުގެ ވެރިރަށް ކަތުމަންޑޫގަ އެވެ. އެ ގައުމުގައި ވަނީ މީގެ ކުރިން 1984 އަދި 1999 ވަނަ އަހަރު ގޭމްސް ބާއްވައިފަ އެވެ.